ព័ត៌មានអន្ដរជាតិ

តៃវ៉ាន់ចាប់ខ្លួនអតីតមេទ័ពជើងទឹកចិន ដែលបើកទូកលឿនចូលកំពង់ផែតៃប៉ិ

បានផុស

១០ ខែ មុន

នៅ

ថ្ងៃអង្គារ ១១ មិថុនា ២០២៤

ដោយ

បុរសជនជាតិចិនម្នាក់ត្រូវបានចាប់ខ្លួន បន្ទាប់ពីបើកទូកល្បឿនលឿនចូលកំពង់ផែតៃប៉ិដោយខុសច្បាប់។ បុរសនោះត្រូវគេដឹងថាធ្លាប់ជាអតីតមេទ័ពជើងទឹកចិន ដែលសង្ស័យថាអាចមកស៊ើបអង្កេតនៅលើកោះតៃវ៉ាន់។ នេះបើយោងតាមការចេញផ្សាយរបស់ទីភ្នាក់ងារព័ត៌មាន Reuters នៅថ្ងៃទី ១១ ខែ មិថុនា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មន្ត្រីជាន់ខ្ពស់តៃវ៉ាន់ បានឲ្យដឹងថា ឆ្មាំសមុទ្ររបស់តៃវ៉ាន់ចាប់ខ្លួនបុរសនោះកាលពីថ្ងៃអាទិត្យនៅឆ្នេរសមុទ្រ Tamsui បន្ទាប់ពីទូករបស់គាត់បានចូលទៅក្នុងទន្លេដែលនាំទៅដល់ទីក្រុងតៃប៉ិ ខណៈបុរសរូបនោះធ្លាប់បម្រើការជាមេបញ្ជាការកងទ័ពជើងទឹកចិនពីមុនមក ដែលជាឧប្បត្តិហេតុមួយបានកើតឡើងចំពេលមានភាពតានតឹង រវាងតៃវ៉ាន់ និងចិន។ប្រទេសចិនចាត់ទុកកោះនេះជាទឹកដីរបស់ខ្លួន ប៉ុន្តែការអះអាងនេះត្រូវបានបដិសេធដោយក្រុងតៃប៉ិ។

ក្នុងរយៈពេលមួយឆ្នាំកន្លងមកនេះ មានករណីស្រដៀងគ្នាចំនួន ១៨ ដែលភាគច្រើនពាក់ព័ន្ធនឹងកោះដែលគ្រប់គ្រងដោយតៃវ៉ាន់ ដែលស្ថិតនៅជាប់ឆ្នេរសមុទ្រចិន។ រដ្ឋមន្ត្រីការពារជាតិតៃវ៉ាន់ ក៏បាននិយាយទៅកាន់អ្នកសារព័ត៌មាននៅឯសភាផងដែរថា ឧបទ្ទវហេតុទូកអាចជាមធ្យោបាយមួយផ្សេងទៀតនៃយុទ្ធសាស្ត្ររបស់ចិនប្រឆាំងនឹងកោះនេះ។

គួរបញ្ជាក់ថា តៃវ៉ាន់បានត្អូញត្អែរក្នុងរយៈពេលប៉ុន្មានឆ្នាំចុងក្រោយនេះថា ប្រទេសចិនបាននិងកំពុងប្រើប្រាស់មធ្យោបាយដែលត្រូវបានរចនាឡើងដើម្បីស៉ើបការណ៍តាមរបៀបផ្សេងៗ ដោយមិនងាកទៅរកការប្រយុទ្ធបើកចំហ ដូចជា បាឡុងឃ្លាំមើលអណ្តែតលើកោះជាដើម។

ពាក់ព័ន្ធនឹងបញ្ហានេះដែរកាលពីខែមីនា អ្នកនេសាទតៃវ៉ាន់ពីរនាក់បានវង្វេងចូលទៅក្នុងដែនទឹករបស់ចិននៅជិតកោះ Kinmen ដែលស្ថិតនៅជាប់នឹងឆ្នេរសមុទ្ររបស់ប្រទេសចិន ដោយម្នាក់ជាមន្ត្រីយោធាតៃវ៉ាន់ កំពុងស្ថិតក្នុងការឃុំខ្លួនក្នុងប្រទេសចិន ខណៈម្នាក់ទៀតត្រូវបានគេដោះលែងភ្លាមៗ៕