ជំងឺមហារីកលិង្គអុកឡុកប្រេស៊ីល, មនុស្សជាង ៦ ៥០០នាក់ ត្រូវកាត់លិង្គចោល 

តាមការចុះផ្សាយរបស់ BBC នៅថ្ងៃសៅរ៍ទី២២ខែមិថុនាឆ្នាំ២០២៤, ក្រសួងសុខាភិបាលប្រេស៊ីល បានចេញរបាយការណ៍ថា ត្រឹមរយៈពេលមួយទសវត្សរ៍ គិតចាប់ពីចន្លោះឆ្នាំ២០១២ដល់២០២២ ប្រទេសនេះមានមនុស្សកើតជំងឺមហារីកលិង្គចំនួន ២១ ០០០ករណី ដោយក្នុងនោះមានជាង ៤ ០០០នាក់ស្លាប់ ហើយជាង ៦ ៥០០នាក់ត្រូវកាត់លិង្គចោលតែម្តង ពោលគឺជាមធ្យម ២ថ្ងៃមានអ្នកជំងឺម្នាក់ត្រូវកាត់លិង្គចោល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងនោះគេរកឃើញថា រដ្ឋក្រីក្របំផុតរបស់ប្រេស៊ីលគឺ Maranhão ជាកន្លែងកើតជំងឺនេះខ្ពស់ជាងគេ ពោលគឺមានបុរស ៦.១នាក់ ក្នុងចំណោម ១០០ ០០០នាក់។

ជំងឺនេះភាគច្រើនបណ្តាលមកពីមេរោគ HPV ដែលឆ្លងតាមរយៈការរួមភេទ។ ជាទូទៅ រោគ​សញ្ញា​នៃ​ជំងឺ​មហារីក​លិង្គ កើតឡើងដំបូងជាមួយការឈឺ​នៅ​លើ​លិង្គ និង​មាន​ក្លិនមិនល្អ ខណៈមនុស្សមួយចំនួនក៏ជួបប្រទះការហូរឈាម និងប្តូរពណ៌លិង្គផងដែរ។

ទោះបីជាយ៉ាងណាក៏ដោយ បើពិនិត្យឃើញទាន់ពេល ជំងឺនេះអាចព្យាបាលជាសះស្បើយតាមរយៈការវះកាត់យកដំបៅចេញ ការព្យាបាលដោយវិទ្យុសកម្ម និងប្រើគីមី ប៉ុន្តែ​ប្រសិនបើ​មិន​ព្យាបាល​ទេ អ្នកជំងឺត្រូវកាត់លិង្គចោលទាំងមូលឬកាត់ចោលមួយផ្នែក ព្រមទាំងឈានដល់ការកាត់សរីរាង្គផ្សេងទៀតនៅក្បែរនោះផងដែរ។

យ៉ាងណា បើយោងតាមរបាយការណ៍ចុងក្រោយ ករណីជំងឺមហារីកលិង្គ មិនមែនកំពុងកើនឡើងខ្លាំងតែនៅក្នុងប្រទេសប្រេស៊ីលប៉ុណ្ណោះទេ ពោលគឺវាកំពុងហក់ឡើងទូទាំងពិភពលោកតែម្តង។

ក្នុងឆ្នាំ២០២២ ទស្សនាវដ្តី JMIR Public Health and Surveillance បានចេញផ្សាយលទ្ធផលនៃការវិភាគទ្រង់ទ្រាយធំ ដែលដកស្រង់ទិន្នន័យពីប្រទេសចំនួន៣៤ដោយរកឃើញថា អត្រាជំងឺមហារីកលិង្គហក់ឡើងខ្ពស់បំផុតនៅចន្លោះឆ្នាំ២០០៨ដល់២០១២ គឺក្នុងប្រទេសអ៊ូហ្គង់ដា (២.២នាក់ក្នុង ១០០ ០០០នាក់) បន្ទាប់មកគឺប្រេស៊ីល (២.១នាក់ក្នុង ១០០ ០០០នាក់) និងថៃ (១.៤នាក់ក្នុង ១០០ ០០០នាក់) ហើយអ្វីដែលកាន់តែព្រួយបារម្ភគឺថា បើតាមការបញ្ជាក់ពីអង្គការតាមដានជំងឺមហារីកជាសកល, ត្រឹមឆ្នាំ២០៥០ ជំងឺមហារីកលិង្គនឹងឡើងជាង៧៧%ឯណោះ៕

អត្ថបទ៖ សុខ សុវណ្ណ

ចុចអាន៖ រុស្ស៊ី ប្រាប់ឲ្យពិភពលោក ត្រៀមទទួលដំណឹងល្អ អំពីថ្នាំព្យាបាលជំងឺមហារីក