មន្ទីរពេទ្យហ្លួងម៉ែ ប្រាប់ពីរោគសញ្ញាសំខាន់ៗនៃជំងឺមហារីកក្រពេញប្រូស្តាត ដែលបុរសគ្រប់រូបគួរយល់ដឹង

ក្រពេញប្រូស្តាត (Prostate gland) គឺជាផ្នែកមួយដ៏សំខាន់នៃប្រព័ន្ធបន្តពូជរបស់បុរស ដែលមានទំហំប៉ុនផ្លែក្រូចឆ្មារ ហើយស្ថិតនៅខាងក្រោមប្លោកនោម និងនៅជុំវិញបង្ហួរនោម​។​ ក្រពេញនេះ មានតួនាទីផលិតសារធាតុរាវ​សម្រាប់ទឹកកាម។

បើតាមមន្ទីរហ្លួងម៉ែ ជំងឺមហារីកក្រពេញប្រូស្តាត គឺជាជំងឺមហារីកមួយដែលកើតឡើងនៅក្នុងក្រពេញប្រូស្តាត ហើយជាទូទៅ កើតលើបុរស ដែលមានអាយុចាប់ពី ៥០ឆ្នាំឡើងទៅ។ កត្តាហានិភ័យអាចរួមមាន អាយុ ប្រវត្តិក្នុងគ្រួសារ និងការប្រែប្រួលអរម៉ូន​។ ការសិក្សាជាច្រើនបានណែនាំថា បុរសដែលមានអាយុចាប់ពី ៥០ឆ្នាំឡើងទៅ គួរតែធ្វើការពិនិត្យសុខភាពជាប្រចាំ ដោយពិនិត្យឈាម Prostate-Specific Antigen (PSA) និងពិនិត្យក្រពេញប្រូស្តាតជាមួយគ្រូពេទ្យឯកទេស ដើម្បីរកឃើញជំងឺឱ្យបានឆាប់។

ចំពោះរោគសញ្ញានៃជំងឺមហារីកក្រពេញប្រូស្តាត នៅដំណាក់កាលដំបូង ជំងឺនេះអាចមិនបង្ហាញរោគសញ្ញាច្បាស់លាស់ទេ ប៉ុន្តែអាចមានរោគសញ្ញាដូចជា នោមញឹកញាប់ ជាពិសេសពេលយប់, កម្លាំងទឹកនោមខ្សោយ, ពិបាកចាប់ផ្តើមនោម, នោមឈាម ឬទឹកកាមមានឈាម និងឈឺចាប់នៅតំបន់ចង្កេះ ឬឆ្អឹងខ្នង (នៅដំណាក់ចុងក្រោយ)​។

ប្រសិនបើមិនបានរកឃើញ និងព្យាបាលទាន់ពេលវេលា អាចបង្កមានផលវិបាកដូចជា ការស្ទះនៃផ្លូវបង្ហូរនោម, នោមមិនចេញ, មហារីករាលដាលទៅឆ្អឹង ឬសរីរាង្គផ្សេងៗ និងខ្សោយតម្រងនោម​។

មន្ទីរពេទ្យហ្លួងម៉ែ បានណែនាំឱ្យបុរសៗដែលមានអាយុចាប់ពី ៥០ឆ្នាំឡើងទៅពិនិត្យសុខភាពជាប្រចាំ និងពិគ្រោះជាមួយគ្រូពេទ្យឯកទេស ដើម្បីធ្វើរោគវិនិច្ឆ័យ និងព្យាបាលឱ្យបានទាន់ពេលវេលា ដើម្បីការពារបញ្ហាធ្ងន់ធ្ងរដែលអាចប៉ះពាល់ដល់សុខភាព និងអាយុជីវិត៕