Connect with us

ព័ត៌មានអន្ដរជាតិ

រុស្ស៊ី ប្រាប់ឲ្យពិភពលោក ត្រៀមទទួលដំណឹងល្អ អំពីថ្នាំព្យាបាលជំងឺមហារីក

បានផុស

នៅ

តាមសេចក្តីរាយការណ៍របស់ RT កាលពីថ្ងៃអាទិត្យទី៩ខែមិថុនា ប្រទេសរុស្ស៊ី ប្រាប់ឲ្យពិភពលោកត្រៀមទទួលដំណឹងល្អអំពីថ្នាំចាក់ព្យាបាលជំងឺមហារីក ខណៈខ្លួនកំពុងធ្វើការយ៉ាងរលូនលើថ្នាំនេះ ហើយលទ្ធផលបឋម អាចបញ្ចេញនៅចុងឆ្នាំ២០២៤តែម្តង។

(រូបថត៖ Getty)
សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងនៅឯវេទិកាសេដ្ឋកិច្ចអន្តរជាតិ St. Petersburg លើកទី 27, រដ្ឋមន្ត្រីក្រសួងសុខាភិបាលរុស្ស៊ីលោក Mikhail Murashko បានគូសបញ្ជាក់ថា ថ្នាំចាក់ប្រភេទនេះ កំពុងស្ថិតក្នុងការធ្វើតេស្តបឋម ហើយក្រោយចេញលទ្ធផលជោគជ័យ វានឹងបន្តឆ្លងកាត់ការសាកល្បងគ្លីនិក មួយដំណាក់កាលទៀត ខណៈដំណើរការកំពុងតែរលូន។

ថ្នាំចាក់នេះ ត្រូវបានបង្កើតឡើងដោយវិទ្យាស្ថានស្រាវជ្រាវរោគរាតត្បាតនិងមីក្រូជីវសាស្ត្រ Gamaleya, មជ្ឈមណ្ឌលមហារីក Blokhin និងវិទ្យាស្ថានស្រាវជ្រាវជំងឺមហារីក Hertsen។

រដ្ឋមន្ត្រីក្រសួងសុខាភិបាលរុស្ស៊ីលោក Mikhail Murashko (រូបថត៖ វិមានក្រឹមឡាំង)

ទោះបីជាយ៉ាងណាក៏ដោយ ភ្លាមៗ លោកមិនទាន់បកស្រាយលម្អិតទេថាតើ ថ្នាំចាក់នេះ នឹងអាចយកទៅព្យាបាលជំងឺមហារីកអ្វីខ្លះ ប៉ុន្តែលោកបង្ហើបថា វាអាចព្យាបាលជំងឺមហារីកបានច្រើនប្រភេទ។

ដោយឡែក នៅក្នុងបទសម្ភាសជាមួយគេហទំព័រ Gazeta.ru កាលពីសប្តាហ៍មុន ប្រធានវិទ្យាស្ថាន Gamaleya លោក Aleksandr Gintsburg បានលើកឡើងថា ថ្នាំនេះត្រូវបានបង្កើតឡើងដោយផ្អែកលើបច្ចេកវិទ្យា mRNA ដូចទៅនឹងវ៉ាក់សាំងកូវីដ ដែលផលិតដោយក្រុមហ៊ុន Pfizer និង Moderna ដែរ ហើយវានឹងយកទៅចាក់ទៅលើអ្នកណាដែលពិនិត្យឃើញមានជំងឺមហារីកដំណាក់កាលមិនទាន់ធ្ងន់ធ្ងរ។

(រូបថត៖ Cleveland Clinic)

យោងតាមស្ថិតិ, ជំងឺមហារីក គឺជាមូលហេតុចម្បងមួយ នៃការស្លាប់មនុស្សនៅទូទាំងពិភពលោក។ WHO ប៉ាន់ប្រមាណថា ក្នុងឆ្នាំ២០២២ មានករណីមហារីកថ្មីប្រហែល២០លានករណី និងមនុស្សស្លាប់ចំនួន ៩.៧លាននាក់។

ដោយឡែកនៅក្នុងរបាយការណ៍ខែកុម្ភៈ  WHO​ ប៉ាន់ប្រមាណថា មនុស្សប្រហែលម្នាក់ក្នុងចំណោម៥នាក់ នៅទូទាំងពិភពលោក បានវិវត្តទៅកើតជំងឺមហារីកពេញមួយជីវិតរបស់ពួកគេ ខណៈបុរសប្រហែលម្នាក់ក្នុងចំណោម៩នាក់ និងស្ត្រីម្នាក់ក្នុងចំណោម១២នាក់ បានបាត់បង់ជីវិតដោយសារជំងឺនេះ៕

អត្ថបទ៖ សុខ សុវណ្ណ

ចុចអាន៖ ភ្ញាក់ផ្អើល ពេលដឹងតួលេខមនុស្សស្លាប់ដោយសារជំងឺមហារីក នៅវៀតណាម មួយឆ្នាំៗ

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម