ព័ត៌មានអន្ដរជាតិ

តុលាការរុស្ស៊ី កាត់ទោសអ្នកកាសែតអាមេរិកម្នាក់ឲ្យជាប់គុក១៦ឆ្នាំ ពីបទចារកម្ម

បានផុស

១២ ខែ មុន

នៅ

ថ្ងៃសៅរ៍ ២០ កក្កដា ២០២៤

ដោយ

Chheang

តុលាការរុស្ស៊ី បានរកឃើញអ្នកយកព័ត៌មានអាមេរិក Evan Gershkovich មានពិរុទ្ធពីបទចារកម្ម កាលពីថ្ងៃសុក្រទី ១៩ ខែកក្កដា ហើយបានកាត់ទោសរូបលោកឲ្យជាប់គុក ១៦ឆ្នាំ ដែលជាទោសកម្រិតអតិបរមា។ កាសែត The Wall Street Journal ដែលជាកន្លែងការងាររបស់ Evan បានហៅការកាត់ទោសនេះថាជា “ការកាត់ទោសក្លែងបន្លំដ៏គួរឲ្យអាម៉ាស់”។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Gershkovich ជនជាតិអាមេរិកអាយុ ៣២ឆ្នាំ ដែលបានបដិសេធមិនធ្វើខុស ត្រូវបានគេយកទៅកាត់ទោសនៅទីក្រុង Yekaterinburg កាលពីខែមិថុនាកន្លងទៅ បន្ទាប់ពីរងការចោទប្រកាន់ពីបទព្យាយាមប្រមូលព័ត៌មានរស៊ើបអំពីរោងចក្រផលិតរថក្រោះរបស់រុស្ស៊ី។

លោកគឺជាអ្នកកាសែតអាមេរិកដំបូងគេ ដែលត្រូវបានចោទប្រកាន់ពីបទចារកម្មនៅក្នុងប្រទេសរុស្ស៊ី ចាប់តាំងពីសម័យសង្គ្រាមត្រជាក់ ហើយការចាប់ខ្លួនរបស់លោកធ្វើឡើងនៅក្នុងខែមីនា ឆ្នាំ២០២៣ ដែលបានជំរុញឲ្យអ្នកសារព័ត៌មានអាមេរិក និងលោកខាងលិចជាច្រើននាក់ទៀតមានភាពរអា និងបានចាកចេញពីទីក្រុងមូស្គូ។

ប្រធានាធិបតីអាមេរិក លោក ចូ បៃដិន បាននិយាយថា លោក Gershkovich មិនបានប្រព្រឹត្តបទឧក្រិដ្ឋណាមួយទេ ហើយការឃុំខ្លួនអ្នកកាសែតរូបនេះជារឿងមិនត្រឹមត្រូវនោះឡើយ។ លោក បៃដិន បាននិយាយនៅក្នុងសេចក្តីថ្លែងការណ៍មួយថា “យើងកំពុងជំរុញយ៉ាងខ្លាំងសម្រាប់ការដោះលែង Evan ហើយនឹងបន្តធ្វើដូច្នេះ។ សារព័ត៌មានមិនមែនជាឧក្រិដ្ឋកម្មទេ”។

សូមបញ្ជាក់ថា រោងចក្រដែលរុស្ស៊ីចោទលោក Gershkovich ថាលួចប្រមូលព័ត៌មានចារកម្ម មានឈ្មោះថា Uralvagonzavod ស្ថិតនៅទីក្រុង Nizhny Tagil។ វាជារោងចក្រផលិតរថក្រោះសម្រាប់ក្រុងមូស្គូ យកទៅប្រើប្រាស់នៅក្នុងសង្គ្រាមឈ្លានពានអ៊ុយក្រែន។ រោងចក្រនេះ ផលិតរថក្រោះចម្បាំងប្រភេទ T-90M និងធ្វើទំនើបកម្មរថក្រោះប្រភេទ T-72B3M។

ជាទូទៅ រុស្ស៊ីតែងកាត់ទោសតាមនិតិវិធីច្បាប់ប្រឆាំងនឹងជនបរទេសជាមុនសិន មុនយល់ព្រមធ្វើកិច្ចព្រមព្រៀងណាមួយលើការដោះដូរជនបរទេសទាំងអស់នោះ៕

ដោយ៖ ឈាង