ត្រឹមមួយថ្ងៃ វៀតណាម រញ្ជួយដី៤លើកផ្ទួនៗ រង្គើដល់ខេត្ត រតនគិរី របស់កម្ពុជា

ត្រឹមមួយថ្ងៃអាទិត្យទី២៨ខែកក្កដាឆ្នាំ២០២៤ ស្រុក Kon Plong នៃខេត្តភាគកណ្តាលប្រទេសវៀតណាម បានរងគ្រោះដោយការរញ្ជួយដីចំនួន៤លើកផ្ទួនៗ ដោយក្នុងនោះមានកម្រិត៤.១, ៣.៦, ៣.៣ និងចុងក្រោយ៥.០រ៉ិចទ័រ ដែលជាកម្រិតខ្ពស់បំផុតមិនធ្លាប់កើតមានសោះក្នុងតំបន់នេះ ហើយវាក៏បានធ្វើឲ្យរង្គើដល់ខេត្តរតនគិរី របស់ប្រទេសកម្ពុជាផងដែរ។ នេះបើតាមការឲ្យដឹងពីមន្ទីរព័ត៌មានរញ្ជួយដី និងការព្រមានអំពីរលកយក្សស៊ូណាមិវៀតណាម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ VN Express, ការរញ្ជួយដីកម្រិត ៥.០រ៉ិចទ័រ បានកើតឡើងនៅម៉ោង១១:៣៥នាទីនិង១០វិនាទី ជាមួយជម្រៅប្រហែល ៨.១គីឡូម៉ែត្រ។ 

ទោះបីជាយ៉ាងណាក៏ដោយ គ្រោះរញ្ជួយដីទាំង៤លើកខាងលើ មិនបង្កជាគ្រោះថ្នាក់ធ្ងន់ធ្ងរឬហានិភ័យនៃគ្រោះមហន្តរាយអ្វីទេ។

ភ្លាមៗបន្ទាប់ពីការរញ្ជួយដីបួនលើកជាប់ៗគ្នានេះ គណៈកម្មាធិការប្រជាជនស្រុក Kon Plong បានចេញសេចក្តីប្រកាសឲ្យមន្ត្រីនិងស្ថាប័នពាក់ព័ន្ធទាំងអស់ ត្រូវចាត់វិធានការបន្ទាន់ដើម្បីឆ្លើយតប និងដាក់ចេញវិធានការត្រៀមខ្លួនចំពោះការរញ្ជួយដីនាពេលខាងមុខ។

សូមបញ្ជាក់ថា បើតាមស្ថិតិ, ចាប់តាំងពីដើមឆ្នាំនេះមក ប្រទេសវៀតណាម ត្រូវរងគ្រោះដោយការរញ្ជួយដីចំនួន៦៥លើក ខណៈក្នុងនោះ មានរហូតដល់ទៅ៥៤លើកទៅហើយ ដែលកើតមាននៅក្នុងខេត្ត Kon Tum ជាមួយកម្រិតចាប់ពី ២.៥ដល់៤.០រ៉ិចទ័រ៕

អត្ថបទ៖ សុខ សុវណ្ណ

ចុចអាន៖ ថៃនិងវៀតណាម សុទ្ធតែជួបគ្រោះរញ្ជួយដី