លោក ពូទីន ទៅ​ទស្សនកិច្ច​ Chechnya ដ៏​ភ្ញាក់ផ្អើល ​ក្រោយអ៊ុយក្រែន​​វាយបក​​ចូល​ទឹកដី​

ប្រធានាធិបតីរុស្ស៊ី លោក វ្ល៉ាឌីមៀ ពូទីន កាលពីថ្ងៃអង្គារបានធ្វើដំណើរទស្សនកិច្ចដោយមិនគ្រោងទុកទៅកាន់ Chechnya ដែលជាសាធារណរដ្ឋមូស្លីមនៅក្នុងសហព័ន្ធរុស្ស៊ី និងជាដំណើរទស្សនកិច្ចលើកដំបូងរបស់គាត់ក្នុងរយៈពេលជិត១៣ឆ្នាំ ខណៈដែលការលុកលុយឆ្លងព្រំដែនដ៏ខ្លាំងក្លារបស់អ៊ុយក្រែនទៅកាន់ភាគខាងលិចនៃប្រទេសរុស្ស៊ីបានឈានចូលដល់សប្តាហ៍ទីបី។​ នេះបើយោងតាមការចេញផ្សាយរបស់ទីភ្នាក់ព័ត៌មាន​APនៅថ្ងៃទី២១ខែសីហានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងដំណើរទស្សនកិច្ចនោះលោកពូទីនត្រូវបានស្វាគមន៍ដោយមេដឹកនាំសំខាន់ៗ​ នៅ Chechnya ដូចជាលោក Ramzan Kadyrov ជាអ្នកនយោបាយរុស្ស៊ី និងជាប្រមុខនៃសាធារណរដ្ឋនេះ នាពេលបច្ចុប្បន្នមុនពេលទៅទស្សនាសាលាទ័ពពិសេសដែលមានឈ្មោះផ្ទាល់ខ្លួនរបស់លោក Kadyrov។ លោក ពូទីន បានសរសើរអ្នកស្ម័គ្រចិត្តដែលហ្វឹកហាត់នៅទីនោះមុនពេលដាក់ពង្រាយនៅអ៊ុយក្រែនថា«ដរាបណារុស្ស៊ីមានបុរសខ្លាំងៗដូចពួកគេ រុស្ស៊ីនឹងឈ្នះអ៊ុយក្រែន»។

លោក Kadyrov ក៏បានបង្ហោះនៅលើបណ្តាញ Telegram ផ្លូវការរបស់គាត់ថា យុទ្ធជនជាង៤៧០០០នាក់ រួមទាំងអ្នកស្ម័គ្រចិត្តបានហ្វឹកហាត់នៅឯកន្លែងនោះចាប់តាំងពីទីក្រុងមូស្គូបានចាប់ផ្តើម«ប្រតិបត្តិការយោធាពិសេស» របស់ខ្លួននៅក្នុងទឹកដីអ៊ុយក្រែន។ ទោះយ៉ាងណាគិតត្រឹមល្ងាចថ្ងៃអង្គារ ទាំងវិមានក្រឹមឡាំង និងលោក Kadyrov មិនបានចែករំលែកព័ត៌មានលម្អិតអំពីគោលបំណង និងពេលវេលានៃដំណើរទស្សនកិច្ចដែលមិននឹកស្មានដល់របស់លោក ពូទីននោះទេ។

នៅក្នុងដំណើរទស្សនកិច្ចកាល​ពី​ថ្ងៃ​អង្គារ លោក ពូទីន បាន​ទៅ​មើល​ផ្នូរ​ឪពុក​របស់លោក Kadyrov អតីត​មេដឹកនាំ Chechen (ដែលជាផ្នែកមួយនៃជនជាតិ Nakh និងជាចម្បងនៃជំនឿមូស្លីម) នៅ Akhmat Kadyrov ជា​ប៉ុស្តិ៍​បញ្ជាការ និង​វិហារ​ឥស្លាម​មួយ​ក្នុង​រដ្ឋធានី Grozny។ នៅបញ្ចប់នៃដំណើរទស្សនកិច្ចនោះ លោកបានជួបពិភាក្សាជាមួយមេដឹកនាំនានា នៃអ្នកបម្រុងត្រៀមខ្លួនដើម្បីប្រយុទ្ធប្រឆាំងនឹងអ៊ុយក្រែន ខណៈរបាយការណ៍​មិន​បាន​បញ្ជាក់​ថា​តើ​អ្នកបម្រុងទាំងនេះអាច​ត្រូវ​បាន​បញ្ជូន​ទៅ​វាយ​លុក​ក្រុង Kyiv ឬ​យ៉ាង​ណា​នោះ​ទេ។

វិមានក្រឹមឡាំងបានពឹងផ្អែកលើក្រុម Kadyrov ដើម្បីរក្សាខេត្ត​នៅ​តំបន់​កូកាស (Caucasus)ខាងជើងឱ្យមានស្ថិរភាពបន្ទាប់ពីភាពចលាចលជាច្រើនឆ្នាំ។ ដោយឡែកក្រុមសិទ្ធិមនុស្សអន្តរជាតិបានចោទប្រកាន់កងកម្លាំងសន្តិសុខរបស់លោក Kadyrov ពីការសម្លាប់ក្រៅប្រព័ន្ធតុលាការ ការធ្វើទារុណកម្ម និងការចាប់ពង្រត់អ្នកប្រឆាំង ប៉ុន្តែអាជ្ញាធររុស្ស៊ីបានបិទការទាមទារម្តងហើយម្តងទៀតដើម្បីធ្វើការស៊ើបអង្កេត។

មុនពេលដំណើរទស្សនកិច្ចដ៏គួរឱ្យភ្ញាក់ផ្អើលរបស់គាត់ទៅកាន់ Chechnya លោកពូទីន នៅព្រឹកថ្ងៃអង្គារក៏បានទៅ Beslan ដែលជាទីប្រជុំជនក្នុងតំបន់​កូកាស​ ជាកន្លែងដែលគាត់បានជួបជាលើកដំបូងក្នុងរយៈពេលជិតពីរទសវត្សរ៍ជាមួយម្តាយរបស់កុមារដែលត្រូវបានសម្លាប់នៅក្នុងការវាយប្រហារសាលារៀនឆ្នាំ ២០០៤ដោយពួកសកម្មប្រយុទ្ធអ៊ីស្លាមដែលបណ្ដាលឲ្យស្លាប់មនុស្សជា៣៣០នាក់។

សាធារណរដ្ឋ Chechnya មិនត្រូវបានទទួលស្គាល់ជាអន្តរជាតិថាជារដ្ឋអធិបតេយ្យនោះទេ។ រដ្ឋ​នេះ​បានប្រកាសឯករាជ្យពីប្រទេសរុស្ស៊ីនៅខែកញ្ញាឆ្នាំ១៩៩១ ដោយបានយកឈ្មោះសាធារណរដ្ឋChechen។ ជាមួយគ្នានោះអ្នកប្រយុទ្ធមកពី Chechnya ដែលទាមទារឯករាជ្យបន្ទាប់ពីការដួលរលំសហភាពសូវៀតបាននាំឱ្យមានសង្រ្គាមជាច្រើនឆ្នាំជាមួយកងកម្លាំងរដ្ឋាភិបាលរុស្ស៊ី។ អ្នកស្ម័គ្រចិត្តគាំទ្រអ៊ុយក្រែនក្រោមការដឹកនាំរបស់លោក Dzhokhar Dudayev ដែលជាមេដឹកនាំគាំទ្រឯករាជ្យរបស់ Chechen គឺជាសត្រូវចម្បងរបស់កងកម្លាំងដែលគាំទ្រលោក ពូទីន និងលោក Kadyrov ។ ប៉ុន្តែក្រោយមកទៀតបានចូលរួមជាមួយរុស្ស៊ីក្នុងការឡោមព័ទ្ធកំពង់ផែសំខាន់របស់អ៊ុយក្រែននៃទីក្រុង Mariupol អស់រយៈពេលជាច្រើនខែ និងចំណុចសំខាន់ៗផ្សេងទៀតនៅភាគខាងត្បូង និងខាងកើតរបស់ប្រទេសអ៊ុយក្រែន៕

អត្ថបទ៖ ប៊ុន សុភាព