លោក ពូទីន បញ្ជាក់មូលហេតុដែលទ័ពអ៊ុយក្រែន សម្រុកចូលដី រុស្ស៊ី

តាមការចុះផ្សាយរបស់ RT នៅថ្ងៃចន្ទទី២ខែកញ្ញាឆ្នាំ២០២៤ លោកប្រធានាធិបតី វ្ល៉ាឌីមៀរ ពូទីន បានបញ្ជាក់ច្បាស់ថា គោលបំណងអ៊ុយក្រែនដែលវាយលុកចូលតំបន់ Kursk របស់រុស្ស៊ី គឺចង់រារាំងកងទ័ពទីក្រុងមូស្គូ មិនឲ្យបន្តប្រតិបត្តិការនៅ Donbass ប៉ុន្តែពួកគេមិនទទួលបានជោគជ័យឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកកត់សម្គាល់ថា «ត្បិតអ៊ុយក្រែនប្រើវិធីសាស្រ្តនេះមែន តែរុស្ស៊ីបាននិងកំពុងបោះជំហានយ៉ាងរលូននៅតាមទីតាំងសំខាន់ៗនៃតំបន់ Donbass។ កងកម្លាំងប្រដាប់អាវុធរុស្ស៊ី កំពុងកាន់កាប់ទឹកដីមិនមែនត្រឹម ២០០ឬ៣០០ម៉ែត្រទេ ប៉ុន្តែឈានដល់រាប់រយគីឡូម៉ែត្រការ៉េតែម្តង»។

ស្របពេលជាមួយគ្នានោះ លោកពូទីនព្រមានថា «ទង្វើបង្កហេតុរបស់ទីក្រុងកៀវនៅតំបន់ Kursk ចៀសមិនផុតពីបរាជ័យឡើយ ហើយទីក្រុងមូស្គូ នឹងដោះស្រាយជាមួយក្រុមចោរអ៊ុយក្រែនដែលបានចូលទឹកដីរុស្ស៊ី ក្នុងគោលបំណងបង្កអស្ថិរភាពនៅព្រំដែន»។

សូមបញ្ជាក់ជាថ្មី កាលពីដើមខែមុន លោក ហ្សេលេនស្គី បានបញ្ជូនទាហានរាប់ពាន់នាក់សម្រុកចូលតំបន់ Kursk របស់រុស្ស៊ី ដែលនោះគឺជាការវាយលុកឆ្លងដែនទ្រង់ទ្រាយធំបំផុតរបស់ខ្លួន ចាប់តាំងជម្លោះផ្ទុះឡើងក្នុងឆ្នាំ២០២២។

យោងតាមការប៉ាន់ស្មានចុងក្រោយរបស់ទីក្រុងមូស្គូ, ចាប់តាំងប្រតិបត្តិការលុកលុយធ្វើឡើងនៅថ្ងៃទី៦ខែសីហាមក អ៊ុយក្រែន ស្លាប់ទាហានជាង៧ ៨០០នាក់ ខ្ទេចរថក្រោះ៧៥គ្រឿង និងរថពាសដែកជាង៥០០គ្រឿង។ យ៉ាងណាក្តី ភាគីអ៊ុយក្រែន មិនបានបញ្ចេញប្រតិកម្មអ្វីពាក់ព័ន្ធការអះអាងនេះទេ៕ 

អត្ថបទ៖ សុខ សុវណ្ណ

ចុចអាន៖ មេទ័ពអ៊ុយក្រែន ប្រកាសវាយចូលដីរុស្ស៊ីដល់ទៅ ៣៥គីឡូម៉ែត្រ