ព័ត៌មានអន្ដរជាតិ

អាមេរិក ថា ចិន និងរុស្ស៊ី អត់ចេះអៀនខ្មាសការពារកូរ៉េខាងជើង

បានផុស

៥ ខែ មុន

នៅ

ថ្ងៃអង្គារ ៥ វិច្ឆិកា ២០២៤

ដោយ

Chheang

សហរដ្ឋអាមេរិក កាលពីថ្ងៃទី៤ខែវិច្ឆិកាបានចង្អុលមុខចំៗដាក់រុស្ស៊ី និងចិននៅក្រុមប្រឹក្សាសន្តិសុខអង្គការសហប្រជាជាតិ ថា «មិនចេះអៀនខ្មាសការពារ» និងជំរុញឲ្យកូរ៉េខាងជើងបំពានបន្ថែមលើទណ្ឌកម្មរបស់អង្គការសហប្រជាជាតិ ខណៈដែលទីក្រុងព្យុងយ៉ាងបានប្ដេជ្ញាថានឹងពន្លឿនការកសាង «កម្លាំងនុយក្លេអ៊ែរ» របស់ខ្លួន។

ការតាំងបង្ហាញមីស៊ីលរបស់ក្រុងព្យុងយ៉ាង កាលពីខែកុម្ភៈឆ្នាំ២០២៤ (រូបភាព៖ KCNA)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឯកអគ្គរដ្ឋទូតរងសហរដ្ឋអាមេរិកប្រចាំអង្គការសហប្រជាជាតិ លោក Robert Wood បាននិយាយថា ព្រោះមានខ្នងបង្អែកពីរុស្ស៊ី និងចិន ទើបក្រុងព្យុងយ៉ាងហ៊ានជំរុញបន្តនូវកម្មវិធីនុយក្លេអ៊ែរ មីស៊ីលប៉ាលិស្ទិក និងអាវុធប្រល័យលោកដោយខុសច្បាប់។

ក្រុមប្រឹក្សាដែលមានសមាជិកមកពី១៥ប្រទេស កំពុងប្រជុំគ្នា បន្ទាប់ពីការបាញ់សាកល្បងមីស៊ីលអន្តរទ្វីបរបស់កូរ៉េខាងជើងកាលពីថ្ងៃព្រហស្បតិ៍សប្ដាហ៍មុន។ លោក Wood បាននិយាយថា រុស្ស៊ី និងចិន បានរារាំងក្រុមប្រឹក្សាមិនឲ្យចេញសេចក្តីថ្លែងការណ៍ថ្កោលទោស ដែលជាវិធានការមួយដែលត្រូវការការឯកភាពគ្នា។

ឯកអគ្គរដ្ឋទូតអង្គការសហប្រជាជាតិរបស់កូរ៉េខាងជើង លោក Kim Song បានប្រាប់ក្រុមប្រឹក្សាសន្តិសុខថា ទីក្រុងព្យុងយ៉ាងនឹងពន្លឿនការកសាងកម្លាំងនុយក្លេអ៊ែររបស់ខ្លួន ដើម្បី «ប្រឆាំងនឹងការគំរាមកំហែងណាមួយដែលបង្ហាញដោយរដ្ឋអាវុធនុយក្លេអ៊ែរអរិភាព»។

លោក Kim Song បានលើកឡើងថា ការគំរាមកំហែងនុយក្លេអ៊ែររបស់សហរដ្ឋអាមេរិកប្រឆាំងនឹងកូរ៉េខាងជើង បានឈានដល់ចំណុចរសើបខ្លាំងរួចទៅហើយ។ លោកបន្តថា វិធានការព្រហើនរបស់អាមេរិកនេះ បាននាំឲ្យស្ថានភាពបច្ចុប្បន្នកំពុងខិតកៀកទៅនឹងការផ្ទុះសង្គ្រាមធំ។

កូរ៉េខាងជើង បានស្ថិតនៅក្រោមការដាក់ទណ្ឌកម្មរបស់ក្រុមប្រឹក្សាសន្តិសុខអង្គការសហប្រជាជាតិចាប់តាំងពីឆ្នាំ២០០៦ ហើយវិធានការនេះត្រូវបានពង្រឹងជាលំដាប់ក្នុងរយៈពេលជាច្រើនឆ្នាំក្នុងគោលបំណងបញ្ឈប់ការអភិវឌ្ឍអាវុធនុយក្លេអ៊ែរ និងមីស៊ីលប៉ាលិស្ទិករបស់ទីក្រុងព្យុងយ៉ាង៕

ដោយ៖ ឈាង