រដ្ឋធានី​របស់​ប្រទេស​ឥណ្ឌា​បិទ​សាលារៀន​ដោយសារ​ផ្សែង​អ័ព្ទ

រដ្ឋធានីញូវដែលីរបស់ប្រទេសឥណ្ឌាបានប្តូរទៅរៀនអនឡាញវិញ​ចាប់ពីថ្ងៃចន្ទ១៨​វិច្ឆិកា រហូតដល់មានការជូនដំណឹងបន្ថែមដើម្បីបន្ធូរបន្ថយវិបត្តិសុខភាពដោយសារតែផ្សែងអ័ព្ទពុលកាន់តែអាក្រក់ទៅៗ។ នេះបើយោងតាមការចេញផ្សាយរបស់សារព័ត៌មាន CNA​នៅថ្ងៃទី១៨ខែវិច្ឆិកានេះ។

កម្រិតនៃការបំពុល PM2.5 ដែលជាមីក្រូភាគល្អិតបង្កមហារីកដ៏គ្រោះថ្នាក់ដែលចូលទៅក្នុងចរន្តឈាមតាមរយៈសួត ត្រូវបានកត់ត្រានៅ ៥៧ ដង លើសពីកម្រិតអតិបរមាប្រចាំថ្ងៃរបស់អង្គការសុខភាពពិភពលោក (WHO) ដែលបានណែនាំកាលពីល្ងាចថ្ងៃអាទិត្យ។

ទីក្រុងនេះត្រូវបានគ្របដណ្ដប់ដោយផ្សែងអ័ព្ទយ៉ាងខ្លាំងជារៀងរាល់ឆ្នាំ ដែលភាគច្រើនត្រូវបានស្តីបន្ទោសលើការដុតកម្ទេចចោលដោយកសិករក្នុងតំបន់ជិតខាង ដើម្បីបោសសម្អាតវាលស្រែរបស់ប្រជាពលរដ្ឋសម្រាប់ការភ្ជួររាស់ ក៏ដូចជារោងចក្រ និងផ្សែងពីចរាចរ។

ការរឹតបន្តឹងនេះត្រូវបានដាក់ចេញដោយអាជ្ញាធរទីក្រុងក្នុងកិច្ចខិតខំប្រឹងប្រែងដើម្បីការពារការចុះខ្សោយបន្ថែមទៀត នៃគុណភាពខ្យល់។ សាលាបឋមសិក្សាត្រូវបានបញ្ជារួចហើយឱ្យបញ្ឈប់ថ្នាក់រៀនផ្ទាល់ខណៈរដ្ឋាភិបាលបានជំរុញកុមារ និងមនុស្សចាស់ ក៏ដូចជាអ្នកដែលមានបញ្ហាសួត ឬបេះដូងស្នាក់នៅក្នុងផ្ទះឱ្យបានច្រើនតាមដែលអាចធ្វើទៅបាន។ ទោះយ៉ាងណាមនុស្សជាច្រើននៅក្នុងទីក្រុងមិនអាចមានលទ្ធភាពទិញមាសបាន ហើយក៏មិនមានផ្ទះដែលអាចបិទបាំងយ៉ាងមានប្រសិទ្ធភាពពីខ្យល់ពុលដែលមានក្លិនស្អុយដែលបណ្ដាលឲ្យមានការស្លាប់មុនអាយុរាប់ពាន់នាក់។

គួរបញ្ជាក់ថាទីក្រុងញូវដេលី និងតំបន់ជុំវិញទីក្រុង ដែលមានប្រជាជនជាង ៣០ លាននាក់ ជាប់ចំណាត់ថ្នាក់កំពូលពិភពលោកសម្រាប់ការបំពុលខ្យល់ក្នុងរដូវរងា។ សីតុណ្ហភាពត្រជាក់ជាងមុន និងខ្យល់បក់យឺតបានធ្វើឱ្យស្ថានភាពខ្យល់ពុលកាន់តែអាក្រក់ទៅៗ ដោយអូសបន្លាយពីពាក់កណ្តាលខែតុលា រហូតដល់យ៉ាងហោចណាស់ខែមករា៕

អត្ថបទ៖ ប៊ុន សុភាព