កូរ៉េខាងត្បូង ជួបព្យុះព្រឹលសាហាវបំផុត, មនុស្សស្លាប់បន្តកើនឡើង ឯជើងហោះហើរក៏លុបចោល

រយៈពេល២ថ្ងៃមកនេះ ប្រទេសកូរ៉េខាងត្បូង បានជួបប្រទះព្យុះព្រឹលខ្លាំងក្លាបំផុត មិនធ្លាប់មានសោះក្នុងប្រវត្តិសាស្រ្ត ដោយរំខានដល់ការធ្វើដំណើរតាមផ្លូវអាកាស ផ្លូវគោក និងផ្លូវទឹក ខណៈគិតត្រឹមថ្ងៃសុក្រទី២៩ខែវិច្ឆិកាឆ្នាំ២០២៤ មានសេចក្តីរាយការណ៍ថា មានមនុស្សចំនួន៥នាក់ហើយ ដែលបាត់បង់ជីវិតដោយសារគ្រោះធម្មជាតិនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មិនត្រឹមប៉ុណ្ណឹង បើតាមការចុះផ្សាយរបស់ Reuter, ព្យុះព្រឹលដ៏កាចសាហាវបំផុតចាប់តាំងពីឆ្នាំ១៩០៧មកមួយនេះ ក៏បណ្តាលឲ្យសំណង់ហេដ្ឋារចនាសម្ព័ន្ធមួយចំនួនដួលរលំ ផងដែរ។

ក្នុងចំណោមអ្នកស្លាប់ គេបានរាយការណ៍ថា មានមនុស្ស៤នាក់ ត្រូវសំណង់បាក់សង្កត់ដោយសារព្រឹលធ្លាក់ខ្លាំងពេក ចំណែកម្នាក់ទៀត បាត់បង់ជីវិត ដោយសារគ្រោះថ្នាក់ចរាចរណ៍លើផ្លូវដែលរអិលព្រឹលខ្លាំង។

ទីក្រុងសេអ៊ូល ជាកន្លែងដែលរងគ្រោះខ្លាំង ដោយមានព្រឹលធ្លាក់កម្ពស់ដល់ទៅ៤០សង់ទីម៉ែត្រ ហើយនៅទូទាំងប្រទេស ជើងហោះហើរជាង១៤០ជើងត្រូវលុបចោល ខណៈសេវាដឹកជញ្ជូនតាមស្រឡាង ក៏ត្រូវផ្អាកផងដែរ។

នៅអាកាសយានដ្ឋានអន្តរជាតិ Incheon ដែលជាមជ្ឈមណ្ឌលមមាញឹកបំផុតរបស់ប្រទេសកូរ៉េខាងត្បូង, អ្នកដំណើរត្រូវប្រឈមនឹងការពន្យារពេលជាមធ្យមពីរម៉ោង ខណៈទិន្នន័យពី Flightradar24 បង្ហាញថា ៣១% នៃជើងហោះហើរគឺត្រូវពន្យារពេល ហើយ១៦% បានសម្រេចលុបចោលកាលពីថ្ងៃព្រហស្បតិ៍។

លើសពីនេះ ព្យុះព្រឹលក៏ធ្វើឲ្យមនុស្សរាប់ម៉ឺននាក់ គ្មានអគ្គិសនីប្រើប្រាស់នៅក្នុងតំបន់កណ្តាលនិងភាគខាងជើងផងដែរ។ អាជ្ញាធររាយការណ៍ថា សាលារៀនចំនួន ១ ២៨៥កន្លែហ នៅក្នុងខេត្ត Gyeonggi រួមទាំងសាលាមត្តេយ្យផងដែរ ត្រូវបានបិទដោយសារហេតុផលសុវត្ថិភាព៕

អត្ថបទ៖ សុខ សុវណ្ណ

ចុចអាន៖ យ៉ាងហោច​ណាស់​មនុស្ស​បី​នាក់​បាន​ស្លាប់ ខណៈ​កូរ៉េខាងត្បូង​ប្រឈមនឹង​ធ្លាក់​ព្រិល​ខ្លាំង