ហ្វីលីពីន៖ ​៣​នាក់ស្លាប់​ និង​រាប់សិប​នាក់​​ធ្លាក់​ខ្លួន​ឈឺ​ ក្រោយ​​បរិភោគ​អណ្តើក​សមុទ្រ

មនុស្ស៣នាក់បានស្លាប់ និងយ៉ាងហោចណាស់៣២​នាក់ត្រូវបានបញ្ជូនទៅកាន់មន្ទីរពេទ្យនៅក្នុងប្រទេសហ្វីលីពីន បន្ទាប់ពី​ពួក​គេ​​បាន​បរិភោគអណ្តើកសមុទ្រស្ងោរ។ នេះបើយោងតាមការចេញផ្សាយរបស់សារព័ត៌មាន ​BBC នៅថ្ងៃទី៣ខែធ្នូនេះ។

ក្រុមមន្ត្រីបានឲ្យដឹងថា ជនជាតិដើមភាគតិច Teduray រាប់សិបនាក់ត្រូវបានរាយការណ៍ថា មានរោគសញ្ញាដូចជា រាគ ក្អួត និងចុកពោះ ចាប់តាំងពី​បរិភោគ​ម្ហូបដែលមានអណ្ដើកសមុទ្រកាលពីសប្តាហ៍មុននៅក្នុងទីក្រុងមាត់សមុទ្រក្នុងខេត្ត Maguindanao del Norte។

ប្រព័ន្ធផ្សព្វផ្សាយក្នុងស្រុកបានរាយការណ៍ថា អ្នកស្រុកភាគច្រើនដែលត្រូវបានបញ្ជូនទៅ​ព្យាបាល​នៅ​មន្ទីរពេទ្យចាប់តាំងពីពេលនោះមក ខណៈដែលអ្នកស្លាប់ទាំងបីនាក់ត្រូវបានបញ្ចុះភ្លាមៗ ស្របតាមប្រពៃណីក្នុងស្រុក។

បើតាម លោកស្រី Irene Dillo មន្ត្រីក្នុងតំបន់បានប្រាប់ BBC ថា សត្វឆ្កែ ឆ្មា និងមាន់មួយចំនួនដែលស៊ីអណ្តើកសមុទ្រនោះដូចគ្នាក៏ងាប់ដែរ ខណៈអាជ្ញាធរ​កំពុង​ស៊ើបអង្កេត​រក​មូលហេតុ​នៃ​ការ​ស្លាប់នេះ។

បើទោះបីវាខុសច្បាប់ក្នុងការ​នេសាទ​​ចាប់​បាន​ ឬបរិភោគអណ្តើកសមុទ្រក្រោមច្បាប់ការពារបរិស្ថានរបស់ប្រទេស​ហ្វីលីពីន សត្វសមុទ្រនៅតែត្រូវបានគេបរិភោគជាអាហារប្រពៃណីនៅក្នុងសហគមន៍មួយចំនួន ខណៈអណ្តើកសមុទ្រត្រូវបានចម្អិនជា adobo ដែលជាម្ហូបហ្វីលីពីនដ៏ពេញនិយមដែលមានសាច់ និងបន្លែចំហុយជាមួយទឹកខ្មេះ និងទឹកស៊ីអ៊ីវ។ ប៉ុន្តែអណ្តើកសមុទ្រវាស៊ីសារាយដែលមានមេរោគ រួមទាំងសត្វសមុទ្រមួយចំនួន អាចពុលនៅពេលចម្អិន និងបរិភោគ។

បន្ទាប់ពីឧប្បត្តិហេតុនេះលោក Datu Mohamad Sinsuat Jr ក្រុមប្រឹក្សាមូលដ្ឋាន បាននិយាយថា លោកបានប្រាប់មន្ត្រីមូលដ្ឋានឱ្យអនុវត្តយ៉ាងតឹងរឹងនូវការហាមឃាត់លើការនេសាទ​​ចាប់​សត្វអណ្តើកសមុទ្រនៅក្នុងតំបន់ ដោយ​ប្តេជ្ញា​ថា «ឧប្បត្តិហេតុពុលអាហារនេះនឹងមិនកើតឡើងម្តងទៀតទេ»។

គួរបញ្ជាក់ថា ប្រភេទសត្វអណ្តើកសមុទ្រភាគច្រើនត្រូវបានចាត់ថ្នាក់ថា «ជិតផុតពូជ» ហើយវាខុសច្បាប់នៅក្នុងប្រទេស​ហ្វីលីពីន​ក្នុងការបរបាញ់ ប្រមូលទិញ ឬសម្លាប់ពួកវាណាមួយ។ ទោះជាយ៉ាងណាក៏ដោយ អណ្តើកសមុទ្រត្រូវបានគេ​នេសាទ​​នៅក្នុងវប្បធម៌មួយចំនួន ដោយ​យកសាច់ និងស៊ុតរបស់ពួកវា ដោយសារគេជឿថាវាជាឱសថ។

ឧប្បត្តិហេតុស្រដៀងគ្នានេះក៏បានកើតឡើងក្នុងឆ្នាំ​២០១៣ ​ដោយកាលនោះមាន មនុស្សចំនួន​៦៨​នាក់នៅក្នុងខេត្ត Samar ភាគខាងកើតនៃប្រទេសហ្វីលីពីនបានធ្លាក់ខ្លួនឈឺ ហើយ​៤​នាក់ក្នុងចំណោមពួកគេបានស្លាប់ បន្ទាប់ពីបានញាំសាច់អណ្តើកសមុទ្រដែលបានរកឃើញនៅជិតភូមិរបស់ពួកគេ៕

អត្ថបទ៖ ប៊ុន សុភាព