រដ្ឋមួយ​នៅ​ឥណ្ឌាហាមឃាត់ការបរិភោគសាច់គោនៅ​ទី​សាធារណៈ

រដ្ឋ Assam ភាគឦសាននៃប្រទេសឥណ្ឌាបានហាមឃាត់ការទទួលទានសាច់គោនៅកន្លែងសាធារណៈ រួមទាំងភោជនីយដ្ឋាន និងនៅក្នុងកម្មវិធីផ្សេងៗទៀត។ នេះបើយោងតាមការចេញផ្សាយរបស់សារព័ត៌មាន​ BBC នៅថ្ងៃទី៦ខែធ្នូនេះ។

​អភិបាល​រដ្ឋ លោក Himanta Biswa Sarma បាននិយាយកាលពីថ្ងៃពុធថា នេះគឺជាការពង្រីកពីច្បាប់មុនដែលដាក់កម្រិតលើការលក់សាច់គោនៅជិតកន្លែងសាសនាមួយចំនួន ដូចជា ទីតាំង​ប្រាសាទ ប៉ុន្តែនៅតែអាចទិញបានពីហាងនានា ហើយបរិភោគនៅក្នុងផ្ទះ ឬគ្រឹះស្ថានឯកជនក្នុងរដ្ឋ។

ការទទួលទានសាច់គោគឺជាបញ្ហាដ៏រសើបមួយនៅក្នុងប្រទេសឥណ្ឌា ដោយសារសត្វគោត្រូវបានគោរពដោយពួកហិណ្ឌូ ដែលមានចំនួន៨០%នៃចំនួនប្រជាជនរបស់ប្រទេសនេះ។ រដ្ឋជាច្រើនដែលគ្រប់គ្រងដោយគណបក្សជាតិនិយមហិណ្ឌូ Bharatiya Janata (BJP) របស់នាយករដ្ឋមន្ត្រី Narendra Modi បានបង្ក្រាបយ៉ាងខ្លាំងលើការសម្លាប់សត្វគោក្នុងប៉ុន្មានឆ្នាំថ្មីៗនេះនៅក្នុងរដ្ឋ Assam។

ប្រហែល២ភាគ៣នៃរដ្ឋចំនួន២៨របស់ប្រទេសឥណ្ឌា ដែលភាគច្រើនគ្រប់គ្រងដោយគណបក្ស BJP បានហាមឃាត់ការសម្លាប់សត្វគោ ដោយផ្នែក​ឬទាំងស្រុង។ នៅតំបន់ជាច្រើននៃប្រទេសឥណ្ឌា ជារឿយៗមានការវាយប្រហារយ៉ាងសាហាវទៅលើអ្នកលក់សាច់មូស្លីម និងពាណិជ្ជករគោក្របី។

គួររម្លឹកថានៅរដ្ឋ Assam នេះការលក់ និងទិញសាច់គោត្រូវបានហាមឃាត់នៅឆ្នាំ ២០១នៅក្នុងតំបន់ដែលជនជាតិហិណ្ឌូ ចេន និងស៊ីក ដែលជាធម្មតាមិនបរិភោគសាច់គោទេ។ ច្បាប់​នោះ​ក៏​ហាម​មិន​ឲ្យ​មាន​ការ​លក់​សាច់​គោ​នៅ​ក្បែរ​ប្រាសាទ​ដែរ ខណៈការហាមប្រាមថ្មីលើការប្រើប្រាស់ជាសាធារណៈនឹងត្រូវបញ្ចូលទៅក្នុងច្បាប់ដែលមានស្រាប់នោះ។

គួរបញ្ជាក់ថា ការសម្រេចចិត្តនេះកើតឡើងប៉ុន្មានថ្ងៃបន្ទាប់ពីសមាជគណបក្សប្រឆាំងដ៏សំខាន់របស់ប្រទេសឥណ្ឌាបានអះអាងថាលោក Sarma បានប្រើច្បាប់ហាមការបរិភោគសាច់គោដើម្បីឈ្នះការបោះឆ្នោតនៅ Samaguri ដែលជាមណ្ឌលបោះឆ្នោតភាគច្រើនកាន់សាសនាឥស្លាម ដែលជាការចោទប្រកាន់ដែលត្រូវបានបដិសេធដោយ BJP។

សមាជិកសភា Rakibul Hussain បាននិយាយថា តាមរយៈ «ការផ្តល់សាច់គោ» ដល់អ្នកបោះឆ្នោត នាយករដ្ឋមន្រ្តីបាន«ក្បត់» តម្លៃជាតិនិយមហិណ្ឌូរបស់គណបក្សគាត់ផ្ទាល់។ សេចក្តីថ្លែងការណ៍នេះបានជំរុញឱ្យមានការធ្លាក់ចុះផ្នែកនយោបាយ ដោយលោក Sarma កាលពីថ្ងៃពុធបាននិយាយថា លោកមានឆន្ទៈក្នុងការដាក់បម្រាមទាំងស្រុងលើសាច់​គោ​នៅក្នុងរដ្ឋ ប្រសិនបើ នោះជាអ្វីដែលសភាចង់បាន។

ទន្ទឹម​នឹង​នេះ គណបក្ស​នយោបាយ​ផ្សេង​ទៀត​បាន​រិះគន់​ការ​ហាមប្រាម​នេះ​ ដោយ​និយាយ​ថា ​វា​រំខាន​ដល់​សិទ្ធិ​របស់​ប្រជាជន​ក្នុង​ការ​ទទួល​ទាន​អ្វី​ដែល​ពួកគេ​ចង់​បាន។

ទោះបីជាយ៉ាងណាការលក់ និងការប្រើប្រាស់សាច់គោគឺស្របច្បាប់នៅក្នុងរដ្ឋមួយចំនួន រួមទាំង Goa និង Arunachal Pradesh ដែលគ្រប់គ្រងដោយគណបក្ស BJP៕

អត្ថបទ៖ ប៊ុន សុភាព