ព័ត៌មានអន្ដរជាតិ

តៃវ៉ាន់ ប្រុងជើងការ ក្រោយនាវាចិន ជិត៩០គ្រឿង ចូលក្បែរដែនទឹករបស់ខ្លួន

បានផុស

៤ ខែ មុន

នៅ

ថ្ងៃចន្ទ ៩ ធ្នូ ២០២៤

ដោយ

កោះតៃវ៉ាន់ បានបង្កើនការប្រុងប្រយ័ត្នខ្ពស់ បន្ទាប់ពីចិន បញ្ជូននាវាកងទ័ពជើងទឹកនិងនាវាឆ្មាំសមុទ្រចិនជិត៩០គ្រឿង ក្នុងអ្វីដែលត្រូវបានគេសន្មត់ថា ការធ្វើសមយុទ្ធយោធាទ្រង់ទ្រាយធំបំផុតកំណត់គោលដៅលើកោះនេះទាំងមូល មិនធ្លាប់មានទាល់តែសោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការបញ្ជាក់ពីតៃវ៉ាន់នៅថ្ងៃចន្ទទី៩ខែធ្នូឆ្នាំ២០២៤, ចិន បានដាក់ចេញតំបន់ដែនអាកាសពិសេសចំនួន៧ក្នុងខេត្ត ហ្វូចៀន និង ចឺជាំង ហើយបានដាក់ពង្រាយនាវាកងទ័ពជើងទឹក នៅក្នុងតំបន់ទាំងនោះ ក្បែរកោះតៃវ៉ាន់, ប្រជុំកោះភាគខាងត្បូងប្រទេសជប៉ុន ព្រមទាំងសមុទ្រចិនខាងកើតនិងខាងត្បូង។

ស្របពេលជាមួយគ្នានោះ ទីក្រុងតៃប៉ិ បង្ហាញក្តីបារម្ភថា នេះអាចជាការត្រៀមលក្ខណៈរបស់ទីក្រុងប៉េកាំង ក្នុងការប្រើកម្លាំងយោធា វាយមកលើកោះតៃវ៉ាន់។

ទោះបីជាយ៉ាងណាក៏ដោយ ជុំវិញបញ្ហានេះភាគីចិន មិនទាន់និយាយអ្វីទេ ចំណែកសហរដ្ឋអាមេរិកដែលជាខ្នងបង្អែករបស់តៃវ៉ាន់ ក៏មិនទាន់មានប្រតិកម្មអ្វីដែរ។

សូមបញ្ជាក់ថា ចិនតែងទាមទារតៃវ៉ាន់ជាផ្នែកមួយនៃទឹកដីរបស់ខ្លួន និងប្រឆាំងចំពោះការទទួលស្គាល់ជាអន្តរជាតិលើកោះនេះ ហើយថែមទាំងជំទាស់នូវទំនាក់ទំនងផ្លូវការរវាងតៃវ៉ាន់ និងសហរដ្ឋអាមេរិកផងដែរ។

សហរដ្ឋអាមេរិក មិនមានទំនាក់ទំនងការទូតផ្លូវការជាមួយតៃវ៉ាន់ទេ ប៉ុន្តែទីក្រុងវ៉ាស៊ីនតោន គឺជា អ្នកគាំទ្រនិងផ្តល់អាវុធដ៏ធំបំផុត របស់តៃវ៉ាន់ជាយូរមកហើយ។

ដូចរដ្ឋាភិបាលពិភពលោកដទៃទៀតដែរ តៃវ៉ាន់បានអបអរសាទរជាសាធារណៈចំពោះជ័យជម្នះរបស់លោក ត្រាំ ក្នុងការបោះឆ្នោតប្រធានាធិបតីកាលពីដើមខែវិច្ឆិកា ត្បិតអីអំឡុងពេលយុទ្ធនាការឃោសនាបោះឆ្នោត លោក ត្រាំ បានប្រកាសក្ដែងៗថា តៃវ៉ាន់គួរតែបង់ប្រាក់ឲ្យអាមេរិកសម្រាប់ថ្លៃការពាររបស់ខ្លួន និងចោទប្រកាន់កោះនេះថាបានលួចឧស្សាហកម្មបន្ទះឈីប (semiconductor) របស់អាមេរិកក៏ដោយ៕

អត្ថបទ៖ សុខ សុវណ្ណ

ចុចអាន៖ លោក Lai៖ ទំនាក់ទំនងតៃវ៉ាន់ជាមួយលោក ត្រាំ នឹងកាន់តែជ្រាលជ្រៅ