សភាកូរ៉េខាងត្បូង អនុម័តសេចក្តីព្រាងច្បាប់ តែងតាំងរដ្ឋអាជ្ញាពិសេស ស៊ើបអង្កេតលើលោក Yoon 

នៅថ្ងៃអង្គារទី១០ខែធ្នូឆ្នាំ២០២៤ រដ្ឋសភាកូរ៉េខាងត្បូង បានសម្រេចអនុម័តសេចក្តីព្រាងច្បាប់តែងតាំងរដ្ឋអាជ្ញាពិសេស ដើម្បីចាប់ផ្តើមការស៊ើបអង្កេតលើលោកប្រធានាធិបតី Yoon Suk Yeol និងឈានដល់ការចាប់ខ្លួនពីបទក្បត់ជាតិ ជុំវិញការប្រកាសច្បាប់អាជ្ញាសឹកយ៉ាងតក់ក្រហល់បំផុតកាលពីសប្តាហ៍មុន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ Korea Herald សេចក្តីព្រាងច្បាប់នេះ ត្រូវបានអនុម័តដោយសំឡេង២១០ទល់នឹង៦៣ ខណៈអនុបវាទ១៤សំឡេង។ សំណើច្បាប់នេះ ត្រូវបានដាក់ជូនរដ្ឋសភាកាលពីសប្តាហ៍មុន តែយ៉ាងណាសំណើច្បាប់នេះ ចាំបាច់ត្រូវមានការអនុម័តពីសំណាក់ប្រធា​នាធិបតីព្រោះលោក Yoon នៅតែកាន់អំណាច ហើយប្រធានាធិបតីមានសិទ្ធិចុចឈ្មោះរដ្ឋអាជ្ញាពិសេសដែលគាត់ចង់បាន តាមការដាក់ជូនដោយគណៈកម្មការនៃអ្នកជំនាញច្បាប់ ប៉ុន្តែគាត់មិនអាចវេតូបានឡើយ។​ គាត់មានសិទ្ធិត្រឹមពន្យារពេលការជ្រើសរើសរដ្ឋអាជ្ញាប៉ុណ្ណោះ។

ក្រៅ​ពី​លោក Yoon, រដ្ឋអាជ្ញា​ពិសេស​ ក៏នឹងបើកការស៊ើបអង្កេតលើអតីត​រដ្ឋមន្ត្រី​ការពារ​ជាតិ Kim Yong-hyun, នាយសេនាធិការកងទ័ព Park An-su ដែលត្រូវបានតែងតាំងជាមេបញ្ជាការច្បាប់អាជ្ញាសឹក, នាយករដ្ឋមន្ត្រី Han Duck-soo, មេបញ្ជាការប្រឆាំងចារកម្ម Yeo In-hyung និង​តំណាង​រាស្រ្តគណបក្ស​អំណាច​ប្រជាជន​លោក Choo Kyung-ho ដែល​ទើប​ចុះ​ចេញ​ពី​តំណែង​ជា​ប្រធាន​ជាន់​ខ្ពស់​នៃ​គណបក្ស​កាន់​អំណាចផងដែរ។ អ្នកទាំងអស់ សុទ្ធតែ​ត្រូវរងការចោទ​ប្រកាន់​ថា ​ជំរុញឲ្យមាន​ការ​បះបោរ​ដោយ​ផ្ទាល់​ឬ​ចូលដៃចូលជើង​ឃុបឃិត​គ្នា​ក្នុង​អំពើ​បះបោរ។

ក្នុងករណីដែលសំណើនេះបានក្លាយទៅជាច្បាប់ពេញលេញហើយនោះ ការស៊ើបអង្កេតដាច់ដោយឡែកដោយប៉ូលិសនិងអង្គភាពប្រឆាំងអំពើពុករលួយលើមន្ត្រីជាន់ខ្ពស់ដទៃ នឹងត្រូវផ្អាកជាបណ្តោះអាសន្នសិន ដើម្បីយកកម្លាំងមកជួយក្នុងការស៊ើបអង្កេតរបស់រដ្ឋអាជ្ញាពិសេស។

ការអនុម័តនេះកើតឡើងមួយថ្ងៃ បន្ទាប់ពីក្រសួងយុត្តិធម៌កូរ៉េខាងត្បូង ដាក់បម្រាមធ្វើដំណើរចេញក្រៅប្រទេសលើលោក Yoon ជាផ្លូវការ ហើយមុននេះ អតីតរដ្ឋមន្ត្រីការពារជាតិកូរ៉េខាងត្បូង Kim Yong-hyun ក៏ត្រូវប៉ូលិសចាប់ដែរ ជុំវិញតួនាទីរបស់គាត់ក្នុងការប្រកាសច្បាប់អាជ្ញាសឹកពីសំណាក់លោក Yoon។

ជម្លោះនយោបាយ កំពុងរួបរឹត​ប្រទេសកូរ៉េខាងត្បូង ក្រោយការប្រកាសច្បាប់នេះ ខណៈគណបក្សប្រឆាំង បានចោទប្រកាន់លោក Yoon ពីបទក្បត់ជាតិ រីឯប្រជាជនយ៉ាងច្រើន បាននាំគ្នាចេញធ្វើបាតុកម្មទាមទារឲ្យលោកចុះចេញពីតំណែង។

ក្រោយការប្រកាសច្បាប់នោះមិនបានប៉ុន្មានផង គណបក្សប្រឆាំងបានដាក់ញត្តិប្តឹងដកតំណែងលោក Yoon ប៉ុន្តែគ្រប់យ៉ាងត្រូវបរាជ័យ។ សភា​កូរ៉េខាងត្បូង​ មិនអាចបោះឆ្នោតអាចដកតំណែងលោក Yoon បានទេ ហើយក៏​មិនអាច​​​បង្កើត​ក្រុមប្រឹក្សា​ស៊ើប​អង្កេត​​លើ​​​ភរិយា​ប្រធានាធិបតីបានដែរ៕

អត្ថបទ៖ សុខ សុវណ្ណ

ចុចអាន៖ ប៉ូលិសកូរ៉េនឹងហាមឃាត់ការធ្វើដំណើរលើលោកប្រធានាធិបតី Yoon Suk-yeol