លោក ត្រាំ ជាប់ឈ្មោះជាបុគ្គលឆ្នើម របស់ទស្សនាវដ្តី Time ប្រចាំឆ្នាំ២០២៤

លោក ដូណាល់ ត្រាំ បានជាប់ឈ្មោះជាបុគ្គលឆ្នើមប្រចាំឆ្នាំ២០២៤ របស់ទស្សនាវដ្តី Time ដែលនេះក៏ដោយសារតែលោកបានជាប់ឆ្នោតក្លាយជាប្រធានាធិបតីទី៤៧របស់សហរដ្ឋអាមេរិក វិលត្រឡប់ចូលទៅអង្គុយកៅអីនៅក្នុងសេតវិមានសាជាថ្មី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទស្សនាវដ្តី Time សរសេរថា «តាំងពីចាប់ផ្តើមឈរឈ្មោះជាប្រធានាធិបតីក្នុងឆ្នាំ២០១៥ ប្រហែលជាគ្មានបុគ្គលណា ដើរតួនាទីក្នុងការផ្លាស់ប្តូររបត់នយោបាយនិងប្រវត្តិសាស្រ្ត ធំជាងលោក ត្រាំ នោះទេ។ ក្នុង​រយៈពេល​ជាច្រើន​ឆ្នាំមកនេះ ជម្រើស​នោះ​គឺ​ជារឿងដ៏​លំបាក​មួយ»។

នេះជាលើកទី៣ហើយដែលលោក ត្រាំ លេចវត្តមានលើគម្របទស្សនាវដ្តី Time ក្នុងឆ្នាំ២០២៤។ យ៉ាងណា ចំពោះលោក ត្រាំ គាត់មិនដែលពេញចិត្តចំពោះទស្សនាវដ្តីនេះទេ ដោយតែងតែរិះគន់ថា Time ជ្រើសរើសបុគ្គលឆ្នើមមិនត្រឹមត្រូវ។

សូមបញ្ជាក់ថា ទស្សនាវដ្តី Time ចាប់ផ្តើមជ្រើសរើសបុគ្គលឆ្នើមប្រចាំឆ្នាំចាប់តាំងពីឆ្នាំ១៩២៧មក ប៉ុន្តែដើមឡើយគេហៅថា «បុរសប្រចាំឆ្នាំ» មិនមែនបុគ្គលឆ្នើមទេ។ អស់រយៈពេលជាច្រើនទសវត្សរ៍មកនេះ Time ភាគច្រើនគឺតែងជ្រើសរើសថ្នាក់ដឹកនាំនយោបាយ អ្នកច្នៃប្រឌិតបង្កើតថ្មី និងឥស្សរជនវប្បធម៌ ឲ្យក្លាយជាម្ចាស់ជយលាភី។

កាលពីឆ្នាំមុន ម្ចាស់ជយលាភីពានរង្វាន់ Grammy អាមេរិក Taylor Swift បានជាប់ឈ្មោះជាបុគ្គលឆ្នើមប្រចាំ​ឆ្នាំរបស់ទស្សនាវដ្ដីនេះ ដោយយកឈ្នះលើខ្សែភាពយន្ត Barbie និងស្តេច Charles ទី៣​របស់ចក្រភពអង់គ្លេស។

ទស្សនាវដ្តីបានផ្តល់រង្វាន់ដល់ Swift សម្រាប់ជំនាញដ៏អស្ចារ្យក្នុងការរៀបរាប់រឿងរ៉ាវ​ផ្ទាល់ខ្លួន ហើយនេះធ្វើឲ្យ Swift ក្លាយជាស្ត្រីដំបូងគេ ដែលឈ្នះរង្វាន់នេះ២ដង ចាប់​តាំងពីការចាប់ផ្តើមផ្តល់រង្វាន់នៅឆ្នាំ១៩២៧មក៕

អត្ថបទ៖ សុខ សុវណ្ណ

ចុចអាន៖ Taylor Swift ជាប់ជាបុគ្គលឆ្នើមប្រចាំ​ឆ្នាំរបស់ទស្សនាវដ្ដី Time