ឥណ្ឌា​បង្កើន​ការ​ប្រុងប្រយ័ត្ន​​​ទ្វេដង ខណៈមាន​ខ្យល់ពុលកាន់តែធ្ងន់ធ្ងរ

ប្រទេសឥណ្ឌាបានរឹតបន្តឹងការការពារទ្វេដងក្នុងគោលបំណងជួយសាធារណជនទប់ទល់នឹងការបំពុលក្នុងរយៈពេល ២៤ម៉ោងសម្រាប់ទីក្រុងញូវដេលី និងតំបន់ជុំវិញទីក្រុងនេះ បន្ទាប់ពីគុណភាពខ្យល់ធ្លាក់ចុះខ្លាំង។ នេះបើយោងតាមការចេញផ្សាយរបស់សារព័ត៌មាន​ CNA នៅថ្ងៃទី១៧ខែធ្នូនេះ។

ការចេញប្រកាសចុងក្រោយបំផុតដែលបានចេញផ្សាយកាលពីល្ងាចថ្ងៃចន្ទបន្ទាប់ពីសន្ទស្សន៍គុណភាពខ្យល់ (AQI) បានកើនឡើងលើសពី៤០០ នៅលើមាត្រដ្ឋានពី ០ទៅ៥០០ ដែលប្រែទៅជា «ធ្ងន់ធ្ងរ» បានជំរុញឱ្យមានកិច្ចប្រជុំបន្ទាន់ក្នុងស្ថាប័នរដ្ឋាភិបាលដែលមានភារកិច្ចគ្រប់គ្រងការបំពុល។

កាលពីព្រឹកថ្ងៃចន្ទ ការណែនាំសម្រាប់សិស្សសាលាត្រូវបានដាក់ចេញ ដោយកំណត់ចំពោះកុមារដែលរៀនថ្នាក់ទី១ រហូត​ដល់ថ្នាក់ទី៥ប្តូរទៅរៀនតាម​អនឡាញ ប៉ុន្តែក្រោយមកត្រូវបានពង្រីកដល់គ្រប់​ថ្នាក់ទាំងអស់ លើកលែងតែថ្នាក់​ទី១០ និង១២។ លើសពីនេះ សេចក្តីណែនាំដែលចេញដោយការិយាល័យរដ្ឋាភិបាលបានណែនាំឲ្យបុគ្កលិកធ្វើការពីផ្ទះ។

បើតាមការវាស់​ដោយ AQI នៅញូវដេលី គឺ៤២៤ នៅព្រឹកថ្ងៃអង្គារ ខណៈសីតុណ្ហភាពបានធ្លាក់ចុះដល់ ៥.៩ អង្សារសេ ដែល​ធ្វើឲ្យទីក្រុងនេះត្រូវបានគ្របដណ្ដប់ដោយអ័ព្ទពុល និងបណ្ដាលឲ្យមានការលំបាកក្នុងការមើលឃើញជាពិសេសសម្រាប់ការហោះហើរនៅអាកាសយានដ្ឋាន។ គណៈកម្មាការសម្រាប់ការគ្រប់គ្រងគុណភាពខ្យល់បានសន្មតថា «ការ​កើន​ឡើង​យ៉ាងខ្លាំងនៃការបំពុលខ្យល់ គឺដោយសារលក្ខខណ្ឌអាកាសមិនអំណោយផលនិងខ្យល់ស្ងប់ពេក»។

គណៈកម្មាការនេះក៏បានបញ្ជាឱ្យហាមឃាត់ការងារសាងសង់ភាគច្រើនផងដែរ។ លើសពីនេះបានណែនាំ កុមារ មនុស្សចាស់ និងអ្នកដែលមានជំងឺផ្លូវដង្ហើម សរសៃឈាមបេះដូង សរសៃឈាមខួរក្បាល ឬជំងឺរ៉ាំរ៉ៃផ្សេងទៀត គួរតែជៀសវាងសកម្មភាពដែលចេញក្រៅផ្ទះ ហើយស្នាក់នៅក្នុងផ្ទះឱ្យបានច្រើនតាមដែលអាចធ្វើទៅបាន។

គួរបញ្ជាក់ថាប្រទេសឥណ្ឌាភាគខាងជើងជួបប្រទះការបំពុលយ៉ាងធ្ងន់ធ្ងររៀងរាល់រដូវរងា នៅពេលដែលសីតុណ្ហភាពធ្លាក់ចុះ និងការបំភាយខ្យល់ត្រជាក់ ធូលីសំណង់ និងផ្សែងចេញពីភ្លើងឆេះដីស្រែដែលដុតដោយខុសច្បាប់នៅក្នុងរដ្ឋដែលសម្បូរការធ្វើកសិកម្មដូចជារដ្ឋ Punjab, Haryana និង Uttar Pradesh ។

ទីក្រុងញូវដេលីធ្លាប់បានកត់ត្រាការបំពុលខ្ពស់បំផុតរបស់ខ្លួនសម្រាប់រដូវកាលនេះកាលពីខែមុននៅពេលដែល AQI ឡើងដល់ ៤៩៤ ។ តុលាការកំពូលរបស់ប្រទេសនេះក៏បានលើកយករឿងនេះដែរ ហើយនៅក្នុងខែតុលា វាបានកំណត់ការរស់នៅក្នុងបរិយាកាសគ្មានការបំពុលថាជា «សិទ្ធិជាមូលដ្ឋាន» ដែលរដ្ឋាភិបាលនឹងត្រូវដោះស្រាយ៕

អត្ថបទ៖ ប៊ុន សុភាព