ដូណាល់ ត្រាំ ក្លាយជាប្រធានាធិបតីអាមេរិក ទី៤៧ ផ្លូវការ

នៅថ្ងៃទី២០ខែមករាឆ្នាំ២០២៥ ត្រូវនឹងថ្ងៃទី២១នៅកម្ពុជា, លោក ដូណាល់ ត្រាំ បានស្បថចូលកាន់តំណែងប្រធានាធិបតីអាមេរិកទី៤៧ជាផ្លូវការហើយ ក្នុងពិធីដែលដំណើរការយ៉ាងរលូន នៅវិមាន Rotunda ពោរពេញទៅដោយសំឡេងទះដៃអបអរសាទរយ៉ាងកងរំពង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងពិធីដែលមានការចូលរួមពីឥស្សរជន ថ្នាក់ដឹកនាំ និងបុគ្គលល្បីល្បាញជាច្រើនរូប, លោក ត្រាំ បានថ្លែងក្នុងសុន្ទរកថាចូលកាន់អំណាចថា ការជាប់ឆ្នោតរបស់គាត់គឺជាកាតព្វកិច្ចដើម្បីនាំមកនូវការផ្លាស់ប្តូរទាំងស្រុង ហើយមានទង្វើក្បត់ជាតិជាច្រើន បានកើតឡើងក្នុងរយៈពេល៤ឆ្នាំចុងក្រោយនេះ។ ចាប់​ពី​ពេល​នេះ​ត​ទៅ ​អាមេរិកលែងឱនចុះទៀតហើយ។

ដោយសំដៅទៅលើការប៉ងធ្វើឃាតក្នុងទីក្រុង Butler នៃរដ្ឋ Pennsylvania កាលពីខែកក្កដាឆ្នាំមុន លោកប្រកាសថា «ដំណើរការដើម្បីដណ្តើមយកអ្នកសាធារណរដ្ឋ មិនមែនជារឿងងាយស្រួលទេ។ ព្រះតែងជួយខ្ញុំ ដើម្បីធ្វើឲ្យអាមេរិកអស្ចារ្យសាជាថ្មី»។

សូមបញ្ជាក់ជាថ្មី ពិធីស្បថចូលកាន់តំណែងរបស់ប្រធានាធិបតីអាមេរិកអាណត្តិនេះ គឺខុសប្លែកពីអាណត្តិមុនៗ ពោលគឺមិនមែនរៀបចំនៅខាងក្រៅទេ ដោយសារអាកាសធាតុត្រជាក់ពេកប៉ះពាល់ដល់សុវត្ថិភាព ទើបលោកត្រាំ សម្រេចចិត្តប្រកាសទៅធ្វើក្នុងវិមាន Rotunda វិញ។

យ៉ាងណា នេះមិនមែនលើកដំបូងឡើយ ដែលពិធីស្បថចូលកាន់តំណែងរបស់ប្រធានាធិបតីអាមេរិក ត្រូវធ្វើនៅខាងក្នុងវិមាន Rotunda។ ជាក់ស្តែងកាលពីឆ្នាំ១៩៨៥ ពិធីរបស់លោក Ronald Reagan នៅអាណត្តិទី២ គឺធ្វើនៅខាងក្នុងបែបនេះដែរ ដោយសារហេតុផលដូចគ្នានេះ៕

អត្ថបទ៖ សុខ សុវណ្ណ

ចុចអាន៖ រឿងសំខាន់ៗ ក្នុងពិធីស្បថចូលកាន់តំណែងរបស់លោក ត្រាំ ជាប្រធានាធិបតីអាមេរិក ទី៤៧