ហ្វីលីពីន​​ចាប់​ជនជាតិ​ចិន​​ពី​បទចារកម្ម​​​​​តាម​​​ជំរំ​យោធា​

យោង​​តាមការចេញផ្សាយរបស់សារព័ត៌មាន​ CNA ផ្សា​​យនៅថ្ងៃទី​២២​ខែមករា​នេះ មន្ត្រីសន្តិសុខហ្វីលីពីនបានចាប់ខ្លួនវិស្វករកម្មវិធី​​​​កុំព្យួរទ័រ​ចិនម្នាក់ ពីបទធ្វើចារកម្មលើជំរុំយោធានិងប៉ូលិសហ្វីលីពីន។

ការចាប់ខ្លួននេះ ធ្វើឡើង ចំពេលមានការប្រឈមមុខដាក់គ្នាលើដែនសមុទ្ររវាងហ្វីលីពីន និងចិន ជុំវិញ​​បញ្ហា​នៅ​​កោះ​ថ្មប៉ប្រះទឹក និងដែនទឹកនៅក្នុងសមុទ្រចិនខាងត្បូងដែលបានកើនឡើងក្នុងប៉ុន្មានខែថ្មីៗនេះ។ ប្រទេសចិន​បាន​ទាមទារភាគច្រើន​នៃ​ផ្លូវទឹកយុទ្ធសាស្ត្រ បើទោះបីជាមានសេចក្តីសម្រេច​​អន្តរជាតិ​ថា ការអះអាងរបស់ចិនមិនមានមូលដ្ឋានច្បាប់ក៏ដោយ។

ប្រធានការិយាល័យស៊ើបអង្កេតជាតិ (NBI) របស់​ប្រទេស​ហ្វីលីពីន លោក Jaime Santiago បានប្រាប់​សន្និសីទសារព័ត៌មាន​មួយថា វិស្វករជនជាតិចិន​ត្រូវបានកំណត់អត្តសញ្ញាណ មាន​ឈ្មោះ​ Deng Yuanqing និងអ្នកបើក​បរជន​​ជាតិហ្វីលីពីនពីរនាក់របស់គាត់ត្រូវបានចាប់ខ្លួន​ដូចគ្នា​កាលពីសប្តាហ៍មុន។

លោក Deng ត្រូវបានចោទប្រកាន់ថា មានទំនាក់ទំនង​ជាមួយសាកលវិទ្យាល័យចិន​ដែលគ្រប់គ្រងដោយកងទ័ពរំដោះប្រជាជន និងជាផ្នែកមួយនៃក្រុម បានបញ្ជូនទៅធ្វើចារកម្មនៅក្នុងទឹកដីរបស់ហ្វីលីពីន។

ប្រធាន​ឧក្រិដ្ឋកម្មតាមអ៊ីនធឺណិត របស់ NBI លោក Jeremy Lotoc បាននិយាយថា ជា​ញឹកញាប់ លោក Deng បានទៅលេងនៅកន្លែងហេដ្ឋារចនាសម្ព័ន្ធសំខាន់ៗ ជាពិសេសជំរុំយោធា ការិយាល័យរដ្ឋាភិបាលក្នុងតំបន់ រោងចក្រថាមពល ជំរុំប៉ូលិស តាម​ស្ថានីយ​​នានា សូម្បីតែផ្សារទំនើប។

លោក Lotoc បាននិយាយថា៖​«Deng​កំពុងប្រមូលទិន្នន័យជាមូលដ្ឋាន ហើយពួកគេមានកម្មវិធីពីចម្ងាយនេះ ដែលបញ្ជូនទិន្នន័យទៅក្រៅប្រទេសតាមពេលវេលាជាក់ស្តែង ដែលបានប្រមូលនៅក្នុងប្រទេសរបស់ហ្វីលីពីន»។

លោក Lotoc ថា វាជា«ការ​គួរឱ្យព្រួយបារម្ភ» ពីព្រោះព័ត៌មានដែលត្រូវបានបញ្ជូនអាចរួមបញ្ចូលកូអរដោនេភូមិសាស្ត្រនិងសណ្ឋានដី ខណៈដែលលោក Deng បាននៅក្នុងប្រទេសហ្វីលីពីនអស់រយៈពេល​៥ឆ្នាំមកហើយ៕​

អត្ថបទ៖ ប៊ុន សុភាព