លោក ត្រាំ៖ អ៊ុយក្រែន ត្រូវតែរៀបចំការបោះឆ្នោត

ត្រឹមប៉ុន្មានម៉ោងប៉ុណ្ណោះ បន្ទាប់ពីគណៈប្រតិភូអាមេរិកនិងរុស្ស៊ី ជួបចរចាគ្នានៅទីក្រុងរីយ៉ាដ​ នៃប្រទេសអារ៉ាប៊ីសាអូឌីត, ប្រមុខសេតវិមានលោក ដូណាល់ ត្រាំ ស្រាប់តែនិយាយថា អ៊ុយក្រែន ត្រូវតែរៀបចំការបោះឆ្នោតថ្មី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កិច្ចពិភាក្សាអំពីវិធីបញ្ចប់ជម្លោះអ៊ុយក្រែននេះ គឺជាជំនួបលើកដំបូងចាប់តាំងពីអតីតប្រធានាធិបតីអាមេរិក ចូ បៃដិន ផ្អាកទំនាក់ទំនងសឹងតែគ្រប់ផ្នែកជាមួយទីក្រុងមូស្គូក្នុងឆ្នាំ២០២២។

ថ្លែងប្រាប់អ្នកសារព័ត៌មាននៅ Mar-a-Lago ក្នុងរដ្ឋ ហ្វ្លរីដា កាលពីថ្ងៃអង្គារទី១៨ខែកុម្ភៈឆ្នាំ២០២៥ ​ប្រធានាធិបតីអាមេរិកបានឲ្យដឹងថា «មេដឹកនាំអ៊ុយក្រែន ហ្សេលេនស្គី លែងមានប្រជាប្រិយភាពទៀតហើយនៅក្នុងប្រទេស។ ខ្ញុំមិនចង់និយាយទេ ប៉ុន្តែកម្រិតគាំទ្ររបស់គាត់គឺបានធ្លាក់ចុះ ៤%បាត់ទៅហើយ»។ លោកបន្តថា «​ប្រសិនបើ​អ៊ុយក្រែន​ចង់​បាន​កៅអី​នៅ​តុចរចា វាដល់ពេលត្រូវបោះឆ្នោតហើយ។ នោះមិនមែនជារឿងរបស់រុស្ស៊ីទេ នោះជារឿងរបស់ខ្ញុំ និងពីប្រទេសជាច្រើនទៀត»។

ទន្ទឹមនោះ លោក ត្រាំ បានលើកឡើងថា សង្គ្រាមរបស់រុស្ស៊ីនៅអ៊ុយក្រែន តាមពិតអាចដោះស្រាយបានយ៉ាងងាយ។ គ្រាន់តែអ្នកចរចាពាក់កណ្តាល ក៏អាចដោះស្រាយបានដែរកាលពីឆ្នាំមុន ទាំងមិនចាំបាច់ដល់ថ្នាក់បាត់បង់ទឹកដីជាច្រើននិងស្លាប់មនុស្សច្រើនបែបនេះទេ។

ទោះបីជាយ៉ាងណាក៏ដោយ ពាក់ព័ន្ធរឿងនេះ អ៊ុយក្រែន បានបញ្ជាក់ហើយបញ្ជាក់ទៀតថា ខ្លួនមិនអាចរៀបចំការបោះឆ្នោតបានឡើយ ដរាបណាសង្គ្រាមជាមួយរុស្ស៊ី នៅតែបន្តឆាបឆេះ។

សូមជម្រាបថា កម្រិតគាំទ្រលោក ហ្សេលេនស្គី បានហក់ឡើងខ្ពស់ដល់ ៩០% ពេលសង្គ្រាមជាមួយរុស្ស៊ីផ្ទុះឡើងនៅដើមឆ្នាំ២០២២ ប៉ុន្តែចាប់តាំងពីពេលនោះមកបានធ្លាក់ចុះដល់ប្រហែល ៥០% បន្ទាប់ពីចាញ់នៅសមរភូមិ និងប្រទេសជួបវិបត្តិសេដ្ឋកិច្ច៕

អត្ថបទ៖ សុខ សុវណ្ណ

ចុចអាន៖ អាមេរិក-រុស្ស៊ី ធ្វើ​កិច្ច​ប្រជុំ​ផ្ទាល់​មុខ​ជាផ្លូវការ​អំពី​​សង្គ្រាមនៅ​​អ៊ុយក្រែន ក្រោយ​ជាប់​ទ្រឹង​ជិត​៣ឆ្នាំ