មន្ត្រី​អាមេរិក​ប្រាប់​អ៊ុយក្រែន ឲ្យឈប់ឈ្លោះជាមួយ​ ត្រាំ ហើយងាកមកស៊ីញ៉េកិច្ចព្រមព្រៀងផ្តល់ធនធាន​រ៉ែ​វិញ

ស្របពេល​ប្រធានាធិបតី​អាមេរិក​ លោក ដូណាល់ ត្រាំ និងប្រធានាធិបតី​អ៊ុយក្រែន​ លោក ហ្សេលេនស្គី​ កំពុងទាស់សម្តីគ្នា មន្ត្រី​ជាន់ខ្ពស់​នៃ​រដ្ឋការ​របស់​លោក ត្រាំ បានក្រើន​រំឭក​ដល់​​លោកហ្សេលេនស្គីឲ្យឈប់ឈ្លោះជាមួយលោកត្រាំ ហើយងាកមកចុះហត្ថលេខាលើកិច្ចព្រមព្រៀងផ្តល់ធនធានរ៉ែឲ្យទីក្រុងវ៉ាស៊ីនតោនវិញ។ 

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្តីនេះគឺចេញពីមាត់ទីប្រឹក្សាសន្តិសុខជាតិសេតវិមានលោក Mike Waltz នៅក្នុងសន្និសីទកាសែតកាលពីថ្ងៃព្រហស្បតិ៍ទី២០ខែកុម្ភៈឆ្នាំ២០២៥ ដោយនិយាយថា ទីក្រុងវ៉ាស៊ីនតោន ខកចិត្តបំផុតចំពោះលោក ហ្សេលេនស្គី ដែលហ៊ានរិះគន់លោកប្រធានាធិបតី ត្រាំ ខ្លាំងមិនអាចទទួលយកបាន។

លោក Waltz និយាយថា លោកបានផ្តល់ឱកាសមាសដល់អ៊ុយក្រែន ដើម្បីដោះដូរជាមួយការធានាសន្តិសុខ ដែលពួកគេអាចសង្ឃឹមបាន។ ធនធានរ៉ែកម្រទាំងនោះ ទីក្រុងកៀវអាចដោះដូរជាមួយជំនួយយោធាអាមេរិក ឬអាចទូទាត់ជាសំណាង សម្រាប់ជំនួយដែលទីក្រុងវ៉ាស៊ីនតោន ជួយនាពេលកន្លងមក។

រឿងនេះកើតឡើងបន្ទាប់ពីមានសេចក្តីរាយការណ៍ថា លោក ហ្សេលេនស្គី រារាំងរដ្ឋមន្ត្រីអ៊ុយក្រែនទាំងអស់ មិនឲ្យស៊ីញ៉េលើកិច្ចព្រមព្រៀងដោះដូរធនធានរ៉ែណាមួយឡើយ។

កាលពីដើមខែកុម្ភៈ លោក ត្រាំ បានដាក់លក្ខខណ្ឌទៅអ៊ុយក្រែនថា បើទីក្រុងកៀវចង់ឲ្យអាមេរិកបន្តជួយដើម្បីទប់ទល់ជាមួយរុស្ស៊ីទៀតនោះ ពួកគេត្រូវតែផ្តល់ធនធានរ៉ែកម្រ «Rare Earth» មកវិញជាការដោះដូរ ហើយប្រទេសទាំងពីរត្រូវធ្វើកិច្ចសន្យាជាមួយគ្នា ដើម្បីកុំឲ្យទីក្រុងវ៉ាស៊ីនខ្វល់ខ្វាយ។

សូមបញ្ជាក់ជាថ្មី យោងតាមរបាយការណ៍វេទិកាសេដ្ឋកិច្ចពិភពលោកឆ្នាំ២០២៤, អ៊ុយក្រែន ជាប្រទេសមានសក្តានុពលធំធេង ក្នុងនាមជាអ្នកផ្គត់ផ្គង់វត្ថុធាតុដើមសំខាន់ៗទូទាំងពិភពលោកដែលចាំបាច់សម្រាប់វិស័យឧស្សាហកម្មការពារជាតិ បច្ចេកវិទ្យាទំនើប និងថាមពលបៃតង។

ប្រទេសនេះមានទុនបម្រុងទីតានីញ៉ូមធំជាងគេនៅអឺរ៉ុប ហើយស្មើនឹង៧% នៃទុនបម្រុងពិភពលោក។ ពិសេស មុនពេលជម្លោះជាមួយរុស្ស៊ីផ្ទុះឡើងក្នុងឆ្នាំ២០២២ អ៊ុយក្រែនគឺជាអ្នកផ្គត់ផ្គង់ទីតានីញ៉ូមដ៏សំខាន់សម្រាប់ឧស្សាហកម្មយោធា ទៀតផង។

ចំពោះលោហធាតុកម្រ គេដឹងថានៅអ៊ុយក្រែនមានដូចជា បេរីលីយ៉ូម ម៉ង់ហ្គាណែស ហ្គាលីញ៉ូម អ៊ុយរ៉ាញ៉ូម ហ្សីកញ៉ូម ក្រាហ្វីត អាប៉ាទីត ហ្វ្លុយអូរីត និងនីកែល។ មិនត្រឹមប៉ុណ្ណឹង ប្រទេសនេះក៏មានទុនបម្រុងលីចូមធំបំផុតប្រចាំអឺរ៉ុបផងដែរ ដែលគេប៉ាន់ស្មានថាមានចំនួន ៥០០ ០០០តោន៕

អត្ថបទ៖ សុខ សុវណ្ណ

ចុចអាន៖ អ៊ុយក្រែន វាយបកទៅ ត្រាំ វិញ