ព័ត៌មានអន្ដរជាតិ

មេដឹកនាំអ៊ីស្រាអែល គំរាមសងសឹកក្រុមហាម៉ាស ក្រោយប្រគល់សាកសពចំណាប់ខ្មាំងខុសមនុស្ស

បានផុស

៣ ខែ មុន

នៅ

ថ្ងៃសុក្រ ២១ កុម្ភៈ ២០២៥

ដោយ

Chheang

នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ បានប្តេជ្ញាថា ក្រុមហាម៉ាស នឹងត្រូវរ៉ាប់រងចំពោះទង្វើរបស់ខ្លួន បន្ទាប់ពីមិនបានប្រគល់សាកសពរបស់ Shiri Bibas ដែលជាម្តាយចំណាប់ខ្មាំងវ័យក្មេងជាងគេដែលត្រូវបានសម្លាប់ និងចាប់ខ្លួនទៅតំបន់ហ្គាហ្សា ក្រោយការវាយប្រហារថ្ងៃទី៧ខែតុលាឆ្នាំ២០២៣។

រូបថតសាកសពនៃចំណាប់ខ្មាំងទាំង៤នាក់ (រូបថត៖ Reuters)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សាកសពដែលក្រុមហាម៉ាស បានប្រគល់ឲ្យអ៊ីស្រាអែលមិនមែនជារបស់សាកសពអ្នកស្រី Shiri ទេ ប៉ុន្តែជារបស់សាកសពស្ត្រីហ្គាហ្សាម្នាក់ផ្សេងទៀត ដែលនាំឲ្យមានការផ្ទុះកំហឹងពេញប្រទេសអ៊ីស្រាអែល។

លោក ណេតាន់យ៉ាហ៊ូ បានថ្លែងនៅថ្ងៃសុក្រទី២១ខែកុម្ភៈនេះថា៖ «យើងនឹងធ្វើសកម្មភាពដោយការប្តេជ្ញាចិត្តក្នុងការនាំយក Shiri មកផ្ទះវិញ រួមជាមួយនឹងចំណាប់ខ្មាំងរបស់យើងទាំងអស់ មិនថារស់ ឬស្លាប់ ហើយធានាថាក្រុមហាម៉ាសត្រូវរ៉ាប់រងទាំងស្រុងសម្រាប់ការរំលោភបំពានយ៉ាងឃោរឃៅ និងថោកទាបនៃកិច្ចព្រមព្រៀងនេះ»។

លោកក៏បានរំលឹកឡើងវិញនូវការប្តេជ្ញាចិត្តរបស់រដ្ឋាភិបាលអ៊ីស្រាអែល ក្នុងការធានារក្សាអដ្ឋិធាតុនៃចំណាប់ខ្មាំងអ៊ីស្រាអែលទាំងអស់ ដែលត្រូវបានចាប់ខ្លួនដោយក្រុមសកម្មប្រយុទ្ធប៉ាឡេស្ទីន។

លោក បេនចាមីន ណេតាន់យ៉ាហ៊ូ (រូបថត៖ Reuters)

យោងតាមយោធាអ៊ីស្រាអែល នៅក្នុងការដោះដូរចុងក្រោយនេះ ហាម៉ាសបានប្រគល់សាកសពចំណាប់ខ្មាំងចំនួន ៤នាក់ មានដូចជា អ្នកកាសែតឈ្មោះ Oded Lifshitz, ទារកឈ្មោះ Kfir Bibas និងបងប្រុសរបស់គេអាយុ ៤ឆ្នាំឈ្មោះ Ariel ខណៈសាកសពមួយទៀតត្រូវគេរំពឹងថាជាអ្នកស្រី Shiri ដែលជាម្ដាយរបស់ក្មេងទាំងពីរ តែផ្ទុយទៅវិញវាបែរជាសាកសពមនុស្សផ្សេងទៅវិញ។ យោធាអ៊ីស្រាអែល បានឲ្យដឹងទៀតថា ឥឡូវសាកសពនោះមិនទាន់អាចសម្គាល់អត្តសញ្ញាណទេ។

យ៉ាងណាមិញ មិនមានប្រតិកម្មភ្លាមៗពីក្រុមហាម៉ាសឡើយ៕

ដោយ៖ ឈាង

ចុចអាន៖ អ៊ីស្រាអែល ប្រាប់ថា សាកសពម្នាក់ដែលហាម៉ាសប្រគល់ឲ្យ មិនមែនជាចំណាប់ខ្មាំងទេ

Related Topics:សង្គ្រាមអ៊ីស្រាអែល-ប៉ាឡេស្ទីន