អាមេរិក ស្នើ​ឲ្យ​ពន្យារ​ពេល​បទ​ឈប់បាញ់​៥០​ថ្ងៃ​ទៀត​រវាង​ក្រុម​ហាម៉ាស និង​អ៊ីស្រាអែល

បេសកជនមជ្ឈិមបូព៌ារបស់សហរដ្ឋអាមេរិក លោក Steve Witkoff បានស្នើការពន្យារពេល​៥០​ថ្ងៃចំពោះបទឈប់បាញ់នៅតំបន់ហ្គាហ្សា ក្នុងគោលបំណងជួយសម្រួលដល់ការដោះលែងចំណាប់ខ្មាំងបន្ថែមដោយក្រុមហាម៉ាស និងការបន្តផ្តល់ជំនួយមនុស្សធម៌ដល់តំបន់។

យោង​តាម​ការ​ចុះ​​ផ្សាយ​របស់​ Jerusalem Post កាល​ពី​ថ្ងៃ​១៣​ខែ​មីនា លោក Witkoff បានបង្ហាញសំណើនេះក្នុងអំឡុងពេលកិច្ចប្រជុំនៅទីក្រុង​ដូហា ជាមួយកាតា និងអ្នកសម្រុះសម្រួលអេហ្ស៊ីប ក៏ដូចជាអ្នកចរចាអ៊ីស្រាអែលផងដែរ។ ការពន្យារពេលនេះ មានគោលបំណងដើម្បី​បើក​ឲ្យ​មាន​ការ​ប្រារព្ធ​ពិធី​បុណ្យ​​ធំៗ​ចំនួន​ពីរ​នាពេលខាងមុខ ដូចជា បុណ្យរ៉ាម៉ាដាន (Ramadan) និងបុណ្យ Passover របស់ជនជាតិ​ជ្វីហ្វ ហើយ​មាន​បំណង​ទប់ស្កាត់ការកើតឡើងនៃជម្លោះឡើងវិញ និងផ្តល់នូវ​ផ្លូវ​ត្រួសត្រាយ​មួយ​ដើម្បី​ឈាន​ដល់​​បទឈប់បាញ់រយៈពេលវែងនៅហ្គាហ្សា។

នៅក្រោម​​សំណើ​របស់​អាមេរិក «ក្រុមហាម៉ាសនឹងដោះលែងចំណាប់ខ្មាំងដែលនៅរស់​ប្រមាណ​៥​នាក់ ក៏ដូចជាសាកសពចំណាប់ខ្មាំងដែលបានស្លាប់។ ជាថ្នូរ អ៊ីស្រាអែលនឹងអនុញ្ញាត​ឲ្យ​មានបទឈប់បាញ់រយៈពេល​៥០​ថ្ងៃ ដោយ​រាប់​ចាប់​ពីថ្ងៃទី​១​ខែមីនា»។

អ៊ីស្រាអែលបានឆ្លើយតបជាវិជ្ជមានចំពោះសំណើនេះ ដោយបង្ហាញពីឆន្ទៈក្នុងការពិចារណាលើបទឈប់បាញ់ដែលបានបន្ត និងការ​ផ្តល់ជំនួយមនុស្សធម៌ឡើងវិញ។ យ៉ាងណាក៏ដោយ ក្រុមហាម៉ាសបានច្រានចោលសំណើរបស់​អាមេរិក​ក្នុង​ការ​បន្តបទឈប់បាញ់រយៈពេល​៥០​ថ្ងៃទៀត ខណៈ​កន្លង​មក ក្រុម​សកម្ម​ប្រយុទ្ធ​ប៉ាឡេស្ទីន​ចង់​ចាប់ផ្ដើម​ការ​ចរចា​​លើ​ដំណាក់កាល​ទី​ពីរ ដែល​ត្រូវ​គេ​សន្មត់​ថា​ឈាន​ដល់​កិច្ច​ព្រមព្រៀង​មួយ​ជុំវិញ​ការ​ដក​ខ្លួន​ទាំង​ស្រុង​របស់​កង​កម្លាំង​អ៊ីស្រាអែល។

បទឈប់បាញ់បច្ចុប្បន្នដែលត្រូវបានបង្កើតឡើងក្នុង​ខែមករាឆ្នាំ​២០២៥ កើតចេញពីការចរចាដែលពាក់ព័ន្ធនឹងបេសកជនអាមេរិកលោក Brett McGurk និង​លោក Steve Witkoff រួមជាមួយនាយករដ្ឋមន្ត្រីកាតាលោក Sheikh Mohammed bin Abdulrahman Al Thani។ បទឈប់បាញ់នេះ បានសម្របសម្រួលការផ្លាស់ប្តូរចំណាប់ខ្មាំងចំនួន៣៣​នាក់ដែលក្រុមហាម៉ាសបានឃុំខ្លួនសម្រាប់អ្នកទោសប៉ាឡេស្ទីនប្រហែល ២ ០០០​នាក់ និងអនុញ្ញាត​ឲ្យ​មានការកើនឡើងនៃជំនួយមនុស្សធម៌ទៅកាន់តំបន់ហ្គាហ្សា៕

ដោយ៖ ឈាង

ចុចអាន៖ អ៊ីស្រាអែល​បើក​ការ​វាយប្រហារ ស្លាប់​មនុស្ស​៤នាក់​នៅ​ហ្គាហ្សា អំឡុង​ពេល​កិច្ច​ពិភាក្សាអំពី​បទ​ឈប់បាញ់​ថ្មី