ថៃ រកឃើញ ៣៤អគារ ដែលត្រូវខូចខាតធ្ងន់ធ្ងរដោយសាររញ្ជួយដី

ក្រោយរងឥទ្ធិពលដោយគ្រោះរញ្ជួយដីកម្រិត៧.៧រ៉ិចទ័រពីប្រទេសមីយ៉ាន់ម៉ានៅថ្ងៃសុក្រទី២៨ខែមីនា, រដ្ឋាភិបាលថៃ ក៏ចាប់ផ្តើមយុទ្ធនាការត្រួតពិនិត្យសំណង់ខូចខាតទូទាំងប្រទេស ដោយរកឃើញថា មានអគារចំនួន៣៤ត្រូវរងការខូចខាតធ្ងន់ធ្ងរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ The Nation, យុទ្ធនាការនេះចាប់ផ្តើមពីថ្ងៃទី២៨ខែមីនាដល់ថ្ងៃទី១ខែមេសា ហើយទទួលរ៉ាប់រងដោយនាយកដ្ឋានសាធារណការនិងនគរូបនីយកម្ម (DPT) និងរដ្ឋបាលទីក្រុងបាងកក (BMA)។ 

ស្ថាប័នទាំងពីរបានចាប់ផ្តើមអនុវត្តការត្រួតពិនិត្យលើអគារសរុប ៣ ៣៧៥ទូទាំងប្រទេស ដោយក្នុងនោះរកឃើញថា អគារដែលចាត់ទុកថាមានសុវត្ថិភាពគឺមាន ៣ ១៣០ និងអគារច្រើនទៀត ត្រូវរងការខូចខាតមធ្យម។

ទោះបីជាយ៉ាងណាក៏ដោយ មិនទាន់មានរបាយការណ៍លម្អិតទេថាតើ អគារដែលរងការខូចខាតធ្ងន់ធ្ងរទាំង៣៤នោះ ជាអគារអ្វីខ្លះនិងស្ថិតនៅទីតាំងណាខ្លះ?

សូមជម្រាបជាថ្មី រញ្ជួយដីកម្រិត៧.៧រ៉ិចទ័រ ជាមួយជម្រៅ១០គីឡូម៉ែត្រ បានវាយប្រហារប្រទេសមីយ៉ាន់ម៉ា ដោយបំផ្លាញទីក្រុង Mandalay យ៉ាងធ្ងន់ធ្ងរ ហើយឥទ្ធិពលរបស់វាក៏ជះមកដល់ប្រទេសថៃផងដែរ ដោយប៉ះពាល់ខ្លាំងលើរាជធានីបាងកក ដល់់ថ្នាក់បណ្តាលឲ្យបាក់រលំអគារ។

តួលេខមនុស្សស្លាប់នៅប្រទេសថៃ គិតត្រឹមថ្ងៃព្រហស្បតិ៍គឺមានចំនួន២៩នាក់ ភាគច្រើនជាកម្មករសំណង់ ដែលបាត់បង់ជីវិតក្នុងការបាក់អគារសវនកម្មរដ្ឋនៅខណ្ឌចតុចក្រ ខណៈ៣៣នាក់រងរបួស។

ងាកទៅប្រទេសមីយ៉ាន់ម៉ាឯណោះ មនុស្សស្លាប់ក្នុងគ្រោះធម្មជាតិដ៏មហន្តរាយនេះ បានកើនដល់ជិត៤ ០០០នាក់ ភាគច្រើននៅក្នុងទីក្រុង Mandalay ដែលជាចំណុចកណ្តាលនៃការរញ្ជួយ៕

អត្ថបទ៖ សុខ សុវណ្ណ

ចុចអាន៖ ​ក្រុមជួយសង្គ្រោះ​​​នៅថៃ សម្រុក​ជួយ​ខ្លាំង​ ពេលឮសម្រែក​ «ជួយផងៗ!»