ហេតុតែស្រលាញ់ឆ្កែខ្លាំង​ពេក បុរសចិន ជប់លៀងចេញខែ​ក្រោយ​កើតកូន​ ​រងការចោទ​ពីបទ​រំខាន​​

បុរសម្នាក់មកពីខេត្ត Hebei ភាគខាងជើងប្រទេសចិន និងមាននាមត្រកូល Ren បានបង្ហាញក្ដីស្រលាញ់ដ៏ធំធេញចំពោះចិញ្ចឹមរបស់គាត់ តាមរយៈការធ្វើពិធីជប់លៀងបែប​ប្រពៃណីចិន គឺ​​ចេញខែឲ្យឆ្កែ​របស់​គាត់​ ប៉ុន្តែបែរជា​មន្ត្រីរិះគន់ថា ​សកម្មភាព​នោះ​រំខានដល់សណ្តាប់ធ្នាប់ និងសីលធម៌សាធារណៈ​ទៅវិញ​​។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មែនទែនទៅ រឿងរ៉ាវមួយនេះបានកើតឡើងកាលថ្ងៃទី ១៦ខែមេសា នៅពេលដែលបុរសរូបនោះ និងមិត្តបានប្រារព្ធពិធីជប់លៀងតាមបែបប្រពៃណីចិន ដែលគេហៅថា ព្រះចន្ទពេញវង់ សម្រាប់កូនឆ្កែ husky ទាំងប្រាំពីរក្បាលដែលកើតកាលពីមួយខែមុន នៅឯហាងលក់គ្រឿងបន្លាស់រថយន្តរបស់គាត់។

គាត់បានអញ្ជើញភ្ញៀវជាង ១០០នាក់ ហើយថែមទាំងបានសុំម្ដាយមីង និងមិត្តភ័ក្តិរបស់គាត់មកសម្តែងក្នុងថ្ងៃជប់លៀង។ ពេលនោះ គាត់ចំណាយប្រាក់ត្រឹមតែពីរបីរយយន់​ដើម្បីធ្វើម្ហូបយ៉ាងច្រើន ចែករំលែកជាមួយភ្ញៀវ ហើយជាថ្នូរនឹងមនុស្សមួយចំនួនបានឲ្យឆ្អឹងឆ្កែ និងសាច់ក្រកជាអំណោយ។

លោក​ថា លោក​ចាត់​ទុក​សត្វ​សុនខនោះ​ជា​កូន​ ហើយ​បាន​ប្រារព្ធ​ពិធី​បុណ្យ​ព្រះចន្ទពេញវង់ ដើម្បី​ជូនពរ​ពួក​វា​ឲ្យ​មាន​សំណាង​ល្អ​។ វាជាប្រពៃណីនៅក្នុងប្រទេសចិនដែលរៀបចំពិធីជប់លៀងបែបនេះសម្រាប់ទារកពេលអាយុបានមួយខែ បន្ទាប់ពីថ្ងៃកើតរបស់ពួកគេ ប៉ុន្តែពិធីបែបនេះកម្រនឹងធ្វើឡើងសម្រាប់សត្វចិញ្ចឹមណាស់។

លោក Ren បាន​និយាយបន្ថែមទៀត​ថា លោក​មាន​ការ​ភ្ញាក់ផ្អើល​ជា​ខ្លាំង​ នៅ​ពេល​ដែល​មន្ត្រី​ក្នុង​តំបន់​បាន​ស្តីបន្ទោស​លោក​ពី​បទ «រំខាន​ដល់​សណ្តាប់ធ្នាប់ និង​សីលធម៌​សាធារណៈ»។ បុរសដែលតាំងនាមជាអ្នកស្រឡាញ់សត្វឆ្កែរូបនេះ​ថែម​ទាំង​ពោលពាក្យថា គាត់ពិតជាងឿងឆ្ងល់ចំពោះការរិះគន់បែបនេះ ដោយសារតែគាត់គ្រាន់តែបង្ហាញពីក្តីស្រលាញ់របស់ខ្លួន ចំពោះសត្វចិញ្ចឹមសំណព្វចិត្តប៉ុណ្ណោះ។

ទោះជាយ៉ាងណា យោងតាមក្រមរដ្ឋប្បវេណីរបស់ប្រទេសចិន ប្រជាជនត្រូវបានហាមឃាត់មិនឲ្យបំពានច្បាប់ ឬបំពានសណ្តាប់ធ្នាប់សាធារណៈ ឬសីលធម៌ល្អ។ មន្ត្រីក្នុងតំបន់បាននិយាយថា ពួកគេនឹងអប់រំបុរសរូបនោះអំពីសីលធម៌នៃការរស់នៅ និងកុំរំខានដល់អ្នកជិតខាងផ្សេងទៀត។

ថ្វីដ្បិតតែ លោក Ren ត្រូវមន្រ្តីស្តីបន្ទោសក៏ពិតមែន ប៉ុន្តែទង្វើរបស់លោកបែរជាមានមនុស្សជាច្រើនចូលទៅបញ្ចេញមតិគាំទ្រដោយធ្វើការអះអាងថា តើគាត់រំខានសណ្តាប់ធ្នាប់សាធារណៈបែបណា? គាត់មានសេរីភាពក្នុងការចំណាយប្រាក់ផ្ទាល់ខ្លួន ដើម្បីផលប្រយោជន៍និងសិទ្ធនៃការស្រលាញសត្វបុណ្ណោះ ។ ជាពិសេស សត្វឆ្កែគួរឲ្យស្រឡាញ់ជាងមនុស្សមួយចំនួនផង!

យ៉ាងណាមិញ យោងតាមវិទ្យាស្ថានស្រាវជ្រាវសត្វចិញ្ចឹមអាស៊ី ប្រទេសចិនគឺជាជម្រកសម្រាប់សត្វឆ្កែ និងឆ្មាចំនួន ១៨៧ លានក្បាលក្នុងឆ្នាំ ២០២៤ ពោលគឺស្ទើរតែទ្វេដងក្នុងឆ្នាំ ២០១៨។ ក្រុមហ៊ុន Goldman Sachs បានព្យាករណ៍ថាចំនួនសត្វចិញ្ចឹមរបស់ចិន នឹងកើនឡើងជិតទ្វេដងនៃកុមារដែលមានអាយុក្រោម ៤ ឆ្នាំនៅឆ្នាំ ២០១០ ។

មិនតែប៉ុណ្ណោះ ជនជាតិចិនវ័យក្មេងកាន់តែច្រើនបានជ្រើសរើសសត្វចិញ្ចឹមជាជាងកូនក្មេង ជាពិសេសដើម្បីរក្សាពួកគេឲ្យនៅជាមួយ ចៀសវាងសម្ពាធផ្នែកហិរញ្ញវត្ថុ និងផ្លូវចិត្តក្នុងការចិញ្ចឹមកូន។ ទន្ទឹមនឹងនេះ ម្ចាស់ឥឡូវនេះចាត់ទុកសត្វចិញ្ចឹមមិនត្រឹមតែជាសត្វសម្រាប់យាមផ្ទះរបស់ពួកគេទេ ប៉ុន្តែក្នុងនាមជាសមាជិកនៃគ្រួសារ។​ នេះបើយោងតាមលោក Wu Yi សាស្ត្រាចារ្យរងនៅមហាវិទ្យាល័យវិទ្យាសាស្ត្រសត្វ និងបច្ចេកវិទ្យានៃសាកលវិទ្យាល័យកសិកម្មចិន៕

អត្ថបទ៖ សាង ស្រីល័ក្ខ

ចុចអាន៖​អ្នក​គ្រូបង្រៀនចិនម្នាក់ ក្លាយជាបុគ្គលល្បីមិនដឹងខ្លួន ព្រោះ​មុខមាត់​ស្រដៀង​​ Liu Yifei ពេក​