ខេត្តថៃ១០​ ចាប់​ពីភាគកណ្តាល​ដល់​ភាគខាងជើង​ ប្រឈមនឹងទឹកជំនន់ភ្លាមៗ​និង​បំណាក់​ដី​

នាយកដ្ឋានធនធានរ៉ែបានចេញការព្រមានជាបន្ទាន់​មួយ​សម្រាប់ខេត្តចំនួន១០នៅភាគកណ្តា​ល និង​ភាគខាងជើងប្រទេសថៃ ដើម្បីត្រៀមខ្លួនប្រឈមនឹងបំណាក់ដីដែលអាចកើតឡើង​ និងទឹកជំនន់ភ្លាមៗនៅចន្លោះថ្ងៃទី ២៩ ខែមេសាដល់ថ្ងៃទី ០១ឧសភា។ នេះបើយោងតាមការចេញផ្សាយរបស់សារព័ត៌មាន ​The Nation នៅថ្ងៃទី៣០ខែមេសានេះ។

ខេត្ត​ដែល​មាន​ហានិភ័យ​ខ្ពស់​រួម​មាន Chiang Mai, Chiang Rai, Phayao, Phrae, Uttaradit, Nan, Mae Hong Son, Lamphun, Phitsanulok, និង Uthai Thani.។

នាយកដ្ឋានឧតុនិយមថៃបានណែនាំ អ្នកស្រុកនៅក្នុងខេត្តដែលរងផលប៉ះពាល់គួរតែប្រុងប្រយ័ត្នចំពោះហានិភ័យនៃការបាក់ដី និងទឹកជំនន់ភ្លាមៗរហូតដល់ថ្ងៃព្រហស្បតិ៍ រួមទាំងផ្គរ រន្ទះ ខ្យល់កន្ត្រាក់ និងភ្លៀងធ្លាក់ខ្លាំង ។ នាយកដ្ឋានបានស្នើឱ្យអ្នកស្ម័គ្រចិត្ដនៅតំបន់ទាំងនេះតាមដានយ៉ាងសកម្មនូវស្ថានភាព និងវាស់វែងជំនន់ទឹកភ្លៀងជាបន្តបន្ទាប់ ដើម្បីផ្តល់ការព្រមានជាមុនដល់ប្រជាពលរដ្ឋនៅតំបន់ងាយរងគ្រោះ។

ជាមួយគ្នានេះ មជ្ឈមណ្ឌលនឹងបន្តតាមដានទឹកភ្លៀង និងស្ថានភាពដី ដើម្បីវាយតម្លៃហានិភ័យ និងផ្តល់ព័ត៌មានទាន់ពេលដល់អាជ្ញាធរពាក់ព័ន្ធ និងសាធារណជន។

ប្រជាពលរដ្ឋនៅតំបន់ដែលរងផលប៉ះពាល់ត្រូវបានណែនាំឱ្យជៀសវាងសកម្មភាពនៅខាងក្រៅអំឡុងពេលមានព្យុះ និងនៅឱ្យឆ្ងាយពីដើមឈើធំៗ និងផ្ទាំងប៉ាណូដែលមិនមានសុវត្ថិភាព។ កសិករត្រូវត្រៀមដើម្បីការពារដំណាំ និងសត្វចិញ្ចឹមផងដែរ៕

អត្ថបទ៖ ប៊ុន សុភាព