​​នាំគ្នា​ផ្អើល​​ជីកដី​ក្បែរធនាគារ​ធំៗនៅចិន​ ច្រកថង់​ ដាក់​លក់ ដែល​គេ​ជឿថា ​ដីនោះ​នាំលាភ​ នាំសំណាង កាត់​ស៊យ បង្កើន​​ទ្រព្យសម្បត្តិ

ហាងអនឡាញជាច្រើននៅក្នុងប្រទេសចិន កំពុងសម្រុកដាក់លក់ដីច្រកថង់តូចៗដែលពួកគេជីកក្បែរធនាគារធំៗ ក្នុងតម្លៃ៨៨៨ យន់ (១២០ដុល្លារ) ដោយហ៊ានធានាអះអាងតាមក្បួនហុងស៊ុយថា ជួយរំលាយថាមពលអាក្រក់ នាំមកនូវទ្រព្យសម្បត្តិ និងលាភសំណាងដល់អ្នកទិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមរបាយការណ៍របស់ South China Morning Post បានដកស្រង់់សម្ដីពីអ្នកលក់តាមអ៊ីនធឺណិតម្នាក់ថា គាត់បានប្រមូលដីទាំងនោះពីស្ថាប័នហិរញ្ញវត្ថុឈានមុខគេចំនួន ៥ គឺធនាគារនៃប្រទេសចិន, ធនាគារឧស្សាហកម្មនិងពាណិជ្ជកម្ម, ធនាគារកសិកម្ម, ធនាគារសំណង់ចិន និងធនាគារទំនាក់ទំនង ជាមួយនឹងចំណែកថោកបំផុត ត្រឹមតែ ២៤ យន់ (៣ដុល្លារអាមេរិក) ខណៈហាងមួយចំនួនធំ អាចដាក់ដល់១២០ដុល្លារអាមេរិក ក្នុងមួយថង់ឯណោះ។

អ្នកតំណាងផ្នែកលក់បាននិយាយថា ដីនេះត្រូវបានប្រមូលដោយដៃ ពីធនាគារធំៗទាំងប្រាំក្នុងប្រទេសចិន ហើយត្រូវបានគេជឿថា អាចបង្កើនទ្រព្យសម្បត្តិ និងរំលាយថាមពលអាក្រក់ ទោះបីជាយើងមិនអាចបញ្ជាក់ដោយវិទ្យាសាស្រ្តក៏ដោយ។ ជាពិសេស ដីត្រូវបានប្រមូលនៅពេលយប់ ពីទីធ្លាបៃតងនៅពីមុខធនាគារ ដែលជាច្រកហិរញ្ញវត្ថុជាក់លាក់មួយ។

ដោយឡែក នៅក្នុងហាងមួយផ្សេងទៀត ផលិតផលនេះត្រូវបានផ្សព្វផ្សាយថា ប្រមូលបានតែនៅពេលថ្ងៃត្រង់ប៉ុណ្ណោះ ខណៈដែលអ្នកលក់ទីបីអះអាងថា ដីរបស់ពួកគេមានអត្រាជោគជ័យ ៩៩៩.៩៩៩ភាគរយ ក្នុងការបង្កើតទ្រព្យសម្បត្តិនិងលុយកាក់ហូរចូលមកឥតឈប់ឈរ។

មិនតែប៉ុណ្ណោះ ដើម្បីគាំទ្រការទាមទាររបស់ពួកគេ ហាងនានាកំពុងបង្ហោះវីដេអូអំពីដីដែលត្រូវបានជីកនៅខាងក្រៅធនាគារ។ ក្នុងឃ្លីបវីដេអូមួយ មនុស្សម្នាក់បានកាន់ធុងមួយជីកដីហើយប្រកាសក្ដែងថា «ចៅហ្វាយ Liu មកពីខេត្តក្វាងទុង ដីនាំលាភរបស់អ្នករួចរាល់ហើយ»។ វីដេអូមួយទៀតបង្ហាញពីបុរសម្នាក់ប្រើស្លាបព្រាដើម្បីយកដីដាក់លើចានមាស ព្រមទាំងបង្ហាញមានស្លាកលេខទំនាក់ទំនងអតិថិជនថែមទៀតផង។

និន្នាការនេះបានទាក់ទាញអ្នកទិញជាច្រើន រួមទាំងម្ចាស់អាជីវកម្មអនាមិកម្នាក់ ដែលបានប្រាប់សារ័ត៌មាន Red Star News ថា ពួកគេបានទិញដីក្នុងក្តីសង្ឃឹមថា នឹងជំរុញភាពជោគជ័យរបស់ក្រុមហ៊ុនឲ្យកាន់តែរីកមច្រើនទៅមុខ ហើយ សូម្បីតែមិត្ត​ភក្តិ​ជា​ច្រើន​នាក់​ ក៏កំពុងសម្រុក​ទិញ​ដី​នេះដូចគ្នាដែរ។

យ៉ាង​ណា​ក៏ដោយ អ្នក​ជំនាញ​ផ្នែក​ច្បាប់​ លោក Fu Jian និងជាមេធាវីមកពីក្រុមហ៊ុនមេធាវី Zejin បានព្រមានថា ប្រសិនបើអ្នកលក់មានការក្លែងបន្លំពីប្រភពដើម ឬលក្ខណៈសម្បត្តិរបស់ដី នោះអាចចាត់ទុកថា ជាការក្លែងបន្លំ។ ដូច្នេះ អ្នកប្រើប្រាស់មានសិទ្ធិស្នើសុំការបង្វិលសងជាសាចប្រាក់វិញ។

លើសពីនេះ លោកបានគូសបញ្ជាក់ថា យោងតាមបទប្បញ្ញត្តិស្តីពីការរៀបចំទេសភាពទីក្រុង ការជីកយក​ដី​ពី​ទីធ្លាបៃតងក្នុងទីក្រុង ដូចជានៅក្រៅធនាគារ គឺដូចទៅនឹងការរំលោភលើបទប្បញ្ញត្តិរបស់ប្រទេសចិន ស្តីពីការរៀបចំទេសភាពទីក្រុង។

យាងណាមិញ ផលិតផលដ៏ចម្លែកនេះបានបង្កការចំអកនៅលើប្រព័ន្ធផ្សព្វផ្សាយសង្គមដីគោកយ៉ាងគគ្រឹកគគ្រេង ​ដោយ​​អ្នកសង្កេតការណ៍ម្នាក់បានចោទសួរទៅកាន់អ្នកមានជំនឿងុបងល់ថា តើដីធនាគារនេះជាអ្វី? ក្នុងពេលដែលរូបគេធ្វើការនៅធនាគារស្រាប់ទៅហើយមិនឃើញលុយកាក់ហូរចូលទេ ប្រសិនបើមិនខិតខំប្រឹងប្រែងរកនោះ។

ចំណែកអ្នកផ្សេងទៀតក៏បានចូលទៅនិយាយបន្ថែម​ថា ពួកគេ​រស់​នៅ​ក្បែរ​ធនាគារស្រាប់ហើយ ហេតុ​អ្វី​បាន​ជា​សំណាង​មិន​ប្រសើរ​ឡើង? ដូច្នេះមុនមានជំនឿលើអ្វីមួយ សូមពិចារណាឲ្យបានល្អិតល្អន់ ចៀសវាងការចាញ់បោកគេ ចោលលុយឥតអំពើ៕

អត្ថបទ៖ សាង ស្រីល័ក្ខ

ចុចអាន៖ហេតុតែស្រលាញ់ឆ្កែខ្លាំង​ពេក បុរសចិន ជប់លៀងចេញខែ​ក្រោយ​កើតកូន​ ​រងការចោទ​ពីបទ​រំខាន​​