ហ្វីលីពីន ចាប់ផ្តើមបោះឆ្នោតពាក់កណ្តាលអាណត្តិ ក្រោមស្រមោលនៃជម្លោះនយោបាយដ៏ក្តៅគគុក

នៅថ្ងៃចន្ទទី១២ខែឧសភាឆ្នាំ២០២៥ ការបោះឆ្នោតពាក់កណ្តាលអាណត្តិរបស់ប្រទេសហ្វីលីពីន បានចាប់ផ្តើមជាផ្លូវការហើយ ស្របពេលក្បាលម៉ាស៊ីនដឹកនាំរបស់ប្រទេសនេះ កំពុងមានជម្លោះជាមួយគ្នាយ៉ាងក្តៅគគុក។

ការិយាល័យបោះឆ្នោតគឺបើកពីម៉ោង៧:០០ព្រឹក ដល់ម៉ោង៧:០០យប់ ដើម្បីទទួលអ្នកមានសិទ្ធបោះឆ្នោតជាង៦៨លាននាក់នៅទូទាំងប្រទេស។

វាគឺជាការបោះឆ្នោតដ៏សំខាន់បំផុត ព្រោះប្រជាជនហ្វីលីពីន ត្រូវជ្រើសរើសតំណែងជាង១៨ ០០០ រួមទាំងសមាជិកព្រឹទ្ធសភា១២រូប, តំណាងរាស្ត្រទាំង៣១៧ រូប និងមន្ត្រីមូលដ្ឋានរាប់ពាន់នាក់ដូចជាអភិបាលក្រុង ចៅហ្វាយក្រុង និងសមាជិកក្រុមប្រឹក្សាជាដើម។

មិនមែនត្រឹមប៉ុណ្ណឹងទេ ការបោះឆ្នោតនេះត្រូវបានគេមើលឃើញយ៉ាងច្បាស់ថាជាសមរភូមិប្រយុទ្ធរវាងប្រធានាធិបតី Ferdinand Marcos Jr និងអនុប្រធានាធិបតី Sara Duterte ស្របពេលសម្ព័ន្ធភាពនយោបាយរបស់អ្នកទាំងពីរកំពុងបែកបាក់យ៉ាងធ្ងន់ធ្ងរជាទីបំផុត។

អ្នកស្រី Sara កំពុងប្រឈមមុខនឹងសវនាការដកតំណែងនៅខែកក្កដាខាងមុខ លើការចោទប្រកាន់នានារួមទាំងករណីអំពើពុករលួយនិងការឃុបឃិតប្រឆាំងប្រធានាធិបតីផងដែរ។ ដូច្នេះហើយ លទ្ធផលនៃការបោះឆ្នោតព្រឹទ្ធសភា គឺពិតជាមានសារៈសំខាន់ខ្លាំងណាស់ ដោយសារគេត្រូវការសំឡេងភាគច្រើន ពីរភាគបី ដើម្បីចោទប្រកាន់អ្នកស្រី។

បន្ថែមពីលើកម្តៅនយោបាយនេះហើយនោះ អតីតប្រធានាធិបតី Rodrigo Duterte ដែលបច្ចុប្បន្នកំពុងឃុំឃាំងដោយតុលាការព្រហ្មទណ្ឌអន្តរជាតិ ពីបទចោទប្រកាន់ពីការរំលោភសិទ្ធិមនុស្សក្នុងអំឡុងយុទ្ធនាការប្រឆាំងគ្រឿងញៀនរបស់គាត់ ក៏កំពុងឈរឈ្មោះជាចៅហ្វាយក្រុង Davao ដែរ ហើយដ្បិតគាត់កំពុងជាប់ឃុំក៏ដោយ តែគាត់នៅតែជាឥស្សរជននយោបាយដ៏ខ្លាំងក្លានិងមានឥទ្ធិពលដដែល។

សូមជម្រាបថា ការបោះឆ្នោតនេះនឹងផ្លាស់ប្តូរស្ថានការណ៍នយោបាយរបស់ហ្វីលីពីន ហើយវានឹងក្លាយជាចំណុចចាប់ផ្តើមថ្មីនៃការប្រកួតប្រជែងគ្នាកាន់តែក្តៅគគុកសម្រាប់ការបោះឆ្នោតប្រធានាធិបតីឆ្នាំ២០២៨៕

អត្ថបទ៖ សុខ សុវណ្ណ

ចុចអាន៖ សភាហ្វីលីពីន​បោះឆ្នោត​ទម្លាក់​អនុប្រធានាធិបតីលោកស្រី Sara Duterte