ចិន​បដិសេធ​​ថា​ខ្លួនបាន​​បញ្ជូន​អាវុធ​ឲ្យ​ប៉ាគីស្ថាន ចំ​ពេល​មាន​ជម្លោះ​ជាមួយ​ឥណ្ឌា

ប្រទេសចិន បានបដិសេធជាផ្លូវការនូវការចោទប្រកាន់​ដែល​ថា ខ្លួនបានបញ្ជូនយន្តហោះយោធាដែលផ្ទុក​សុទ្ធ​តែ​អាវុធទៅកាន់​ទីក្រុង​អ៊ីស្លាម៉ាបាដ ចំពេលមានការកើនឡើង​នៃ​ជម្លោះ​​​ថ្មីៗនេះរវាង​ប៉ាគីស្ថាន និង​ឥណ្ឌា។

យោង​តាម​ការ​ចុះ​ផ្សាយ​របស់​ Economic Times នៅ​ថ្ងៃទី​១៣​​ឧសភា​នេះ កងទ័ពអាកាស​ចិន (PLAAF) បានបដិសេធការអះអាងដែលថា យន្តហោះដឹកទំនិញ Xi’an Y-20 របស់ខ្លួនបានចែកចាយការផ្គត់ផ្គង់យោធាដល់​ប៉ាគីស្ថាន ដោយ​សង្កត់​ធ្ងន់​​ថា ​របាយការណ៍​នៅ​លើ​បណ្ដាញ​សង្គម​ទាំង​​នោះ​​ជា «ពាក្យចចាមអារ៉ាម» និង​ធ្វើ​ការ​ព្រមានចាត់វិធានការ​​តាម​ផ្លូវច្បាប់សម្រាប់ការផ្សព្វផ្សាយព័ត៌មានមិនពិត។

PLAAF បាន​រៀបរាប់​ថា៖ «អ៊ីនធឺណិត​មិន​អាច​ជៀស​ផុត​ពី​​ច្បាប់​ទេ។ អ្នក​ដែល​ផលិត​និង​ផ្សព្វផ្សាយ​ពាក្យ​ចចាមអារ៉ាម​ពាក់ព័ន្ធ​នឹង​យោធា​នឹង​ត្រូវ​ទទួល​ខុស​ត្រូវ​តាម​ផ្លូវ​ច្បាប់»។

ការបដិសេធនេះ ធ្វើឡើងបន្ទាប់ពី​មាន​ពាក្យ​ចចាមអារ៉ាម​លើ​ប្រព័ន្ធផ្សព្វផ្សាយសង្គមដែល​ថា ទីក្រុង​ប៉េកាំង​បានផ្តល់ជំនួយយោធាដល់ប៉ាគីស្ថានក្នុងអំឡុងពេលប្រតិបត្តិការ Sindoor របស់ឥណ្ឌា ដែលជាការវាយប្រហារសងសឹកប្រឆាំងនឹងហេដ្ឋារចនាសម្ព័ន្ធភេរវករនៅក្នុងប្រទេសប៉ាគីស្ថាន និងតំបន់កាស្មៀរដែលគ្រប់គ្រងដោយប៉ាគីស្ថាន។ ថ្វីត្បិត​ចិនបានច្រានចោល​នូវ​របាយការណ៍​​​​ទាំង​នោះ​​ក៏​ដោយ ក៏​វិទ្យាស្ថាន​​ស្រាវជ្រាវ​សន្តិភាព​អន្តរជាតិ​ Stockholm បាន​បង្ហាញ​ថា ចិន​នៅតែជាប្រទេសផ្គត់ផ្គង់អាវុធដ៏ធំបំផុតរបស់ប៉ាគីស្ថាន ដែលស្មើនឹង ៨១% នៃការនាំចូលអាវុធរបស់ទីក្រុងអ៊ីស្លាម៉ាបាដ​នៅ​រវាងឆ្នាំ​២០២០​ និង​ឆ្នាំ​២០២៤ ដែល​មាន​ដូចជា យន្តហោះ​ចម្បាំង ប្រព័ន្ធ​រ៉ាដា នាវា​កងទ័ព នាវា​មុជទឹក និង​មីស៊ីល៕

ដោយ៖ ឈាង