Netanyahu ប្រើកណ្តាប់ដៃដែក សម្លាប់ពលរដ្ឋប៉ាឡេស្ទីន ៧០នាក់ទៀត នៅ ហ្គាហ្សា

កងកម្លាំងរបស់លោក Benjamin Netanyahu បានប្រើកណ្តាប់ដៃដែកសម្លាប់មនុស្សចំនួន៧០នាក់ទៀតនៅទូទាំងតំបន់ហ្គាហ្សា ស្របពេលមានការរបាយការណ៍អំពីភាពអត់ឃ្លាននៅទឹកដីប៉ាឡេស្ទីន កាន់តែធ្ងន់ធ្ងរទៅៗ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ Al Jazeera ក្នុងចំណោមអ្នកស្លាប់ទាំងអស់ គឺមាន២៣នាក់ដែលបាត់បង់ជីវិត នៅពេលអ៊ីស្រាអែល បើកការវាយប្រហារលើសំណង់អគារលំនៅដ្ឋាន ក្នុងតំបន់ជំរំជនភៀសខ្លួន Bureij កណ្តាលតំបន់ហ្គាហ្សា កាលពីថ្ងៃព្រហស្បតិ៍ទី២៩ខែឧសភាឆ្នាំ២០២៥។

តួលេខថ្មីនេះក៏បូករួមទាំងការផ្ទុះមួយនៅឯកន្លែងចែកជំនួយរបស់អង្គការមនុស្សធម៌ហ្គាហ្សា (GHF) ដែលបណ្តាលឲ្យមនុស្សស្លាប់ច្រើននាក់ផងដែរ នៅឯច្រករបៀង Netzarim។

យ៉ាងណា គេមិនទាន់ហ៊ានសន្មត់ឡើយថាតើនរណានៅពីក្រោយការផ្ទុះនេះ ប៉ុន្តែមានសេចក្តីរាយការណ៍ថា វាអាចជាស្នាដៃរបស់កងកម្លាំងអ៊ីស្រាអែល។

មុននេះដែរ មានមនុស្ស១០នាក់បាត់បង់ជីវិត ពេលទាហានអ៊ីស្រាអែល បាញ់រះលើក្រុមមនុស្សដែលសម្រុកទៅយកជំនួយនៅទីតាំងមួយទៀតរបស់ (GHF) នាភាគខាងត្បូងតំបន់ហ្គាហ្សា។

បន្ថែមពីលើអំពើហិង្សានិងវិបត្តិមនុស្សធម៌កាន់តែយ៉ាប់យ៉ឺននៅហ្គាហ្សា, មកដល់ពេលនេះមានតែមន្ទីរពេទ្យចំនួន ១៧ប៉ុណ្ណោះដែល​នៅតែដំណើរការដោយផ្នែក ខណៈថ្នាំពេទ្យនិងអុកស៊ីហ្សែន នៅតែខ្វះខាតខ្លាំង។

ស្របពេលជាមួយគ្នានោះ​ មានព័ត៌មានថា ក្រុមហាម៉ាស បានច្រានចោលជាផ្លូវការនូវសំណើបទឈប់បាញ់​ថ្មី ដែលសម្របសម្រួលដោយសហរដ្ឋអាមេរិក និង​​ទទួល​បាន​ការ​អនុម័ត​​ពីអ៊ីស្រាអែល។

សំណើ​​បទ​ឈប់បាញ់​ថ្មី ត្រូវបានសម្របសម្រួលដោយបេសកជនពិសេសរបស់​អាមេរិក លោក Steve Witkoff ក្នុងគោលបំណងបង្កើតបទឈប់បាញ់រយៈពេល ៦០​ថ្ងៃ ជួយសម្រួលដល់ការដោះលែងចំណាប់ខ្មាំង និងអនុញ្ញាត​ឲ្យ​មានការបង្កើនជំនួយមនុស្សធម៌ចូលទៅក្នុងតំបន់ហ្គាហ្សាស្ទ្រីប។

យោងតាមក្រសួងសុខភាពដែលគ្រប់គ្រងដោយក្រុមហាម៉ាស មនុស្សជិត ៤ ០០០​នាក់ត្រូវបានសម្លាប់នៅក្នុងតំបន់ហ្គាហ្សាក្នុងរយៈពេល ១០​សប្តាហ៍កន្លងមកនេះ។ អង្គការសហប្រជាជាតិ និយាយថា មនុស្ស ៦០​ម៉ឺន​នាក់ផ្សេងទៀតត្រូវបានផ្លាស់ទីលំនៅសាជាថ្មី​ ដោយប្រតិបត្តិការជើងគោកនិងបញ្ជាជម្លៀសរបស់អ៊ីស្រាអែល ខណៈមនុស្សប្រហែល ៥០​ម៉ឺន​នាក់​ប្រឈមមុខនឹងកម្រិតនៃភាពអត់ឃ្លានដ៏មហន្តរាយ នា​ប៉ុន្មានខែខាងមុខនេះ៕

អត្ថបទ៖ សុខ សុវណ្ណ

ចុចអាន៖ ក្រុម​ហាម៉ាស​ ច្រានចោល​បទ​ឈប់បាញ់​រយៈពេល​៦០ថ្ងៃដែល​គាំទ្រ​ដោយ​អាមេរិក