អាមេរិក ជម្លៀសមន្ត្រីទូតចេញពីអ៊ីរ៉ាក់ ព្រោះស្ថានការណ៍មិនស្រួល

ដោយមើលឃើញស្ថានការណ៍មិនស្រួល សហរដ្ឋអាមេរិក បានប្រកាសពីការជម្លៀសបុគ្គលិកស្ថានទូតនិងអ្នកនៅក្នុងបន្ទុករបស់ពួកគេចេញពីប្រទេសអ៊ីរ៉ាក់ ខណៈប្រមុខសេតវិមាន ដូណាល់ ត្រាំ និយាយថា «យើងកំពុងជម្លៀសពួកគេចេញពីកន្លែងដែលមានគ្រោះថ្នាក់ ហើយយើងរង់ចាំមើលថាតើនឹងមានអ្វីកើតឡើង»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យ៉ាងណាក៏ដោយ មន្ត្រីនៃក្រសួងការពារជាតិអាមេរិក មិនបញ្ជាក់ច្បាស់ឡើយថាតើ ហេតុផលអ្វីនៅពីក្រោយបទបញ្ជាជម្លៀសនេះ ដោយគ្រាន់តែបង្ហើបថា ប្រទេសអ៊ីរ៉ាក់ កំពុងមានហានិភ័យសន្តិសុខខ្ពស់ណាស់។

ទន្ទឹមនោះ រដ្ឋមន្ត្រីការពារជាតិអាមេរិក Pete Hegseth ក៏សំណូមពរឲ្យក្រុមគ្រួសាររបស់បុគ្គលិកយោធាអាមេរិក ត្រូវស្ម័គ្រចិត្តចាកចេញពីបណ្តាប្រទេសនៅទូទាំងតំបន់មជ្ឈិមបូព៌ា រួមទាំងគុយវ៉ែត និងបារ៉ែនផងដែរ។

ការជម្លៀសនេះកើតឡើងបន្ទាប់ពីរដ្ឋមន្ត្រីការពារជាតិអ៊ីរ៉ង់ Aziz Nasirzadeh ​ប្រកាសថា ប្រទេសរបស់លោកនឹងសងសឹកអាមេរិកវិញ បើកិច្ចចរចាស្តីពីបញ្ហានុយក្លេអ៊ែរអ៊ីរ៉ង់រងបរាជ័យ ហើយលោក ត្រាំ បើកការវាយប្រហារយោធាប្រឆាំងសាធារណរដ្ឋឥស្លាម។

កាលពីចុងខែឧសភា អ៊ីរ៉ង់ បានចេញការព្រមានយ៉ាងម៉ឺងម៉ាត់​​ឆ្លើយតបទៅនឹងការគំរាមកំហែងរបស់លោក ត្រាំ ក្នុងការបំផ្លាញរោងចក្រនុយក្លេអ៊ែររបស់ខ្លួន ដោយចាត់​ទុក​សេចក្តីថ្លែងការណ៍​នេះ​ថាជា «បន្ទាត់ក្រហម​ដ៏​ជាក់ស្ដែង​មួយ» ដែលអាចនាំ​ឲ្យ​មានផលវិបាក​យ៉ាង​ធ្ងន់ធ្ងរ។

មន្ត្រីអ៊ីរ៉ង់ដែលមិនបញ្ចេញឈ្មោះ​មួយ​រូប​បានសង្កត់ធ្ងន់ថា បើអាមេរិកស្វែងរកដំណោះស្រាយការទូត នោះត្រូវតែបោះបង់ចោលភាសា​គំរាមកំហែង និងការដាក់ទណ្ឌកម្ម ដោយចាត់ទុកវោហាសាស្ត្របែបនេះថាជាអរិភាពបើកចំហប្រឆាំងនឹងផលប្រយោជន៍ជាតិរបស់អ៊ីរ៉ង់។

ភាពតានតឹងកាន់តែកើន​ឡើង បើ​ទោះ​ជា​កំពុង​មាន​កិច្ច​ចរចា​រវាង​អាមេរិក និងអ៊ីរ៉ង់ជុំវិញកម្មវិធីនុយក្លេអ៊ែររបស់ទីក្រុងតេហេរ៉ង់​ក៏​ដោយ។ ដ្បិត​លោក ត្រាំ បង្ហាញថា កិច្ចព្រមព្រៀងមួយនឹង​អាច​សម្រេច​ទៅ​រួចក៏ដោយ ប៉ុន្តែមន្រ្តីអ៊ីរ៉ង់នៅតែមានការប្រុងប្រយ័ត្នចំពោះវិធីសាស្រ្តរបស់រដ្ឋបាល​អាមេរិក ជាពិសេសទាក់ទងនឹងលក្ខខណ្ឌនៃការចម្រាញ់សារធាតុអ៊ុយរ៉ាញ៉ូម៕

អត្ថបទ៖ សុខ សុវណ្ណ

ចុចអាន៖ មីស៊ីល វាយប្រហារមូលដ្ឋានទ័ពអាមេរិក នៅអ៊ីរ៉ាក់ របួសទាហានច្រើននាក់