ចារកម្ម​អ៊ុយក្រែន ប្រាប់​ថា កូរ៉េខាងជើង​នឹង​បញ្ជូន​ទ័ព​បន្ថែម​ ៣០ ០០០​នាក់​ទៅ​រុស្ស៊ី​

ចារកម្មយោធារបស់អ៊ុយក្រែន ព្រមានថា កូរ៉េខាងជើងគ្រោងនឹងដាក់ពង្រាយទាហានរហូតដល់ ៣០ ០០០​នាក់បន្ថែមទៀត ដើម្បីគាំទ្ររុស្ស៊ីក្នុងសង្គ្រាមឈ្លាន​ពាន​អ៊ុយក្រែន ដែលបង្កើនការចូលរួមរបស់ក្រុងព្យុងយ៉ាង​កាន់​តែ​ខ្លាំង​ឡើង​នៅ​ក្នុងការប្រយុទ្ធជួរមុខ។

លោក Kyrylo Budanov ប្រធានផ្នែកចារកម្មការពារជាតិអ៊ុយក្រែន បាននិយាយថា «លោក គីម ជុងអ៊ុន (មេដឹកនាំ​កូរ៉េ​ខាង​ជើង) កំពុងរៀបចំបញ្ជូនទាហានរាប់ម៉ឺននាក់ទៀត ដើម្បីពង្រឹងការវាយលុកនាពេលខាងមុខរបស់រុស្ស៊ី»។ ការ​ដាក់​ពង្រាយ​លើក​​នេះ នឹង​មាន​ចំនួន​លើស​មុន​ប្រហែល​ជិត​៣​ដង បើ​ធៀប​នឹង​ការ​បញ្ជូន​ទ័ព​របស់​ក្រុង​ព្យុងយ៉ាង​កាល​ពី​ឆ្នាំ​មុន ដែល​មាន​កង​កម្លាំង​​ប្រមាណ ១២ ០០០​នាក់​នៅ​តំបន់ Kursk។

បើយោង​តាម​​ការ​ចុះផ្សាយ​របស់​ CNN ក្នុង​អំឡុង​ពេល​២​ខែ​ខាង​មុខ វា​នឹង​អាច​មាន​​ប្រតិបត្តិការ​ទ្រង់ទ្រាយ​ធំ​មួយ​របស់​រុស្ស៊ី​​នៅ​លើ​ទឹក​ដី​អ៊ុយក្រែន ក្រោយ​​​ពី​ការ​ដាក់​ពង្រាយ​ទ័ព​ក្នុង​ចំនួន​ដ៏​ច្រើន​បែប​នេះ​​របស់​​កូរ៉េ​ខាង​ជើង។ ការព្រមាននេះ ធ្វើឡើង​​គាប់​ជួន​​គ្នា​ទៅ​នឹង​របាយការណ៍​ដែល​ថា មាន​ការ​សង្កេត​ឃើញ​​​កប៉ាល់​ធំៗ និង​យន្តហោះ​ដឹក​ទំនិញ​នៅអាកាសយានដ្ឋាន Sunan របស់ប្រទេសកូរ៉េខាងជើង ដូច​គ្នា​ទៅ​នឹង​​ការដាក់ពង្រាយកងទ័ពកាលពីឆ្នាំមុន​ទៅកាន់ប្រទេសរុស្ស៊ី​អ៊ីចឹង​ដែរ។

ចារកម្ម​អ៊ុយក្រែន បាន​​ឲ្យ​ដឹង​ទៀត​​ថា ក្រសួងការពារជាតិរុស្ស៊ី​ បាន​អះអាង​ថា ខ្លួន​មាន​សមត្ថភាពពេញលេញក្នុងការផ្តល់ការហ្វឹកហ្វឺន និង​«ឧបករណ៍ចាំបាច់ សព្វាវុធ និងគ្រាប់រំសេវ» ដើម្បីនាំ​ទាហានក្រុងព្យុងយ៉ាងទៅកាន់សមរភូមិមុខ​​ឲ្យ​បានលឿនតាមដែលអាចធ្វើបាន។

សូម​ជម្រាប​ជា​ថ្មី​ថា ការ​ដាក់​ពង្រាយ​នេះ បង្ហាញ​ពី​​ភាព​​ជា​​​ដៃគូ​​​ស៊ីជម្រៅ​រវាង​រុស្ស៊ី​ និង​កូរ៉េ​ខាង​ជើង ជា​ពិសេស​បន្ទាប់​ពី​​​ការ​ចុះ​​កិច្ច​ព្រមព្រៀង​ការពារ​គ្នា​ទៅ​វិញ​ទៅ​មក​កាល​ពី​ខែ​មិថុនា​ឆ្នាំ​២០២៤​។ ជា​ថ្នូរ​នឹង​ការ​​​បញ្ជូន​ទ័ព កូរ៉េ​ខាង​ជើង​បាន​ទទួល​អាវុធ និងបច្ចេកវិទ្យាយោធា​ពី​ទីក្រុង​មូស្គូ​មក​​វិញ តួ​យ៉ាង​ដូចជា ប្រព័ន្ធ​ការពារ​ដែន​អាកាស​ Panstir S1 និង​បច្ចេកវិទ្យាសម្រាប់​ផលិត​ដ្រូន​ Shahed KPI ជា​ដើម៕

ដោយ៖ ឈាង

ចុចអាន៖ កូរ៉េ​ខាង​ជើង បង្ហាញ​វីដេអូ​លោក គីម ​ផ្ដេកផ្តួល​លើ​មឈូស​ទាហាន​របស់​ខ្លួន​ដែល​ស្លាប់​ព្រោះ​ជួយ​រុស្ស៊ី