តើ​មេដឹកនាំបក្សប្រឆាំងថៃ​​ដែល​ស្នើ​​ឲ្យ​​មានវិសោធនកម្ម​តុលាការ​ធម្មនុញ្ញថៃ​​ ជានរណា?​

ស្របពេលប្រទេសកំពុងមានបញ្ហានយោបាយ និងភាពស្រពិចស្រពិលក្នុងនយោបាយ លោក Natthaphong Ruengpanyawut ដែល​គេ​ស្គាល់​តាម​រហស្សនាម​ថា «Teng» គឺជា​ឥស្សរជន​ដែល​កំពុង​មាន​ប្រជាប្រិយភាពក្នុង​នយោបាយ​ថៃ ដែល​ទើប​ត្រូវបាន​តែងតាំង​ជា​មេដឹកនាំ​គណបក្សប្រឆាំង​ក្នុង​សភា​តំណាងរាស្រ្ត​ថៃ។

​ក្នុង​ព្រឹត្តិការណ៍​នយោបាយ​ចុងក្រោយ ​មេដឹកនាំបក្ស​ប្រឆាំង​​​វ័យក្មេង​រូប​នេះ​​កំពុង​​ត្រូវ​បាន​គេ​តាមដានយ៉ាង​ខ្លាំង ដោយ​សារតែ​ ការ​ស្នើ​​របស់​គណបក្ស​ប្រឆាំង​​​ទៅកាន់​សភា​​ ឲ្យ​មាន​ការ​ធ្វើវិសោធនកម្ម​ កែប្រែ​​​តុលាការ​ធម្មនុញ្ញ​ថៃ​ដ៏​មានឥទ្ធិពល ដែល​ជា​ស្ថាប័ន​​រំ​លាយ​គណបក្ស​នយោបាយ​ជាញឹកញាប់ និង ​​ដក​ហូតនាយករដ្ឋមន្ត្រី​​​ថៃ​ជាបន្តបន្ទាប់។

តើមេដឹកនាំបក្សប្រឆាំងថៃរូបនេះ​មាន​ប្រវត្តិបែបណា​?

កើតនៅថ្ងៃទី ១៨ខែឧសភា ឆ្នាំ ១៩៨៧ នៅខេត្ត Songkhla ប្រទេសថៃ លោក Natthaphong Ruengpanyawut គឺជាកូនប្រុសរបស់លោក Suchart Ruengpanyawut ដែលជាមហាសេដ្ឋីអចលនទ្រព្យ និងជាប្រធានក្រុមហ៊ុន Chanuntorn Development Group ។

លោក Natthaphong បានទទួលសញ្ញាប័ត្រផ្នែកវិស្វកម្មកុំព្យូទ័រពីសាកលវិទ្យាល័យ Chulalongkorn ដែលជាសាកលវិទ្យាល័យកំពូលមួយរបស់ប្រទេសថៃ។ បន្ទាប់ពីបញ្ចប់ការសិក្សា លោកបានសាងអាជីពជោគជ័យក្នុងឧស្សាហកម្មបច្ចេកវិទ្យា ដោយបានបង្កើតក្រុមហ៊ុន Absolute Management Solutions Co., Ltd ។

លោកបានចូលប្រឡូកក្នុងឆាកនយោបាយនៅឆ្នាំ ២០១៩ ជាមួយនឹងគណបក្សអនាគតឆ្ពោះទៅមុខ(Future Forward Party) ដែលលោកបានដើរតួយ៉ាងសំខាន់ក្នុងការគ្រប់គ្រងប្រតិបត្តិការឌីជីថលរបស់គណបក្ស។ ក្រោយ​គណបក្ស​នេះ​ត្រូវ​បាន​រំលាយ​នៅ​ឆ្នាំ ២០២០ លោក Natthaphong បាន​ចូល​រួម​ជាមួយ​គណបក្ស​ថ្មី​មួយ​ដែល​មាន​ឈ្មោះ​ថា គណបក្ស​ចលនាឆ្ពោះទៅមុខ (Move Forward Party) ។

លោក បានក្លាយជាសមាជិកសភាដោយត្រូវបានជ្រើសរើសចេញពីបញ្ជីគណបក្សរបស់លោក ជំនួសឱ្យការបោះឆ្នោតដោយផ្ទាល់ដោយអ្នកបោះឆ្នោត។ ក្រោយមក លោកត្រូវបានជ្រើសរើសជាអគ្គលេខាធិការរងរបស់គណបក្ស និងដឹកនាំក្រុមសំខាន់ៗនៅក្នុងសភា រួមទាំងអ្នកដែលធ្វើការដើម្បីធ្វើឱ្យច្បាប់គ្រឿងស្រវឹងរបស់ប្រទេសថៃកាន់តែបើកចំហ និងយុត្តិធម៌។

បន្ទាប់ពីតុលាការធម្មនុញ្ញរបស់ប្រទេសថៃបានរំលាយគណបក្ស ចលនាឆ្ពោះទៅមុខ ក្នុងឆ្នាំ ២០២៤ អតីតសមាជិកសភារបស់ខ្លួនបានប្រមូលផ្តុំគ្នាឡើងវិញនៅក្រោមបដាថ្មីមួយ ដោយបង្កើតបក្សប្រជាជន (People’s Party)។ នៅថ្ងៃទី ៩ ខែសីហា ឆ្នាំ ២០២៤ លោក Natthaphong ត្រូវបានជ្រើសរើសជាឯកច្ឆ័ន្ទជាប្រធានគណបក្ស។ ជាមួយនឹងសមាជិកសភាចំនួន ១៤៣ នាក់ គណបក្សប្រជាជនបានក្លាយជាប្លុកប្រឆាំងដ៏ធំបំផុតក្នុងប្រទេសថៃ។

នៅថ្ងៃទី ២៥ ខែកញ្ញា ឆ្នាំ ២០២៤ លោក Natthaphong ត្រូវបានតែងតាំងជាមេដឹកនាំបក្សប្រឆាំងជាផ្លូវការដោយព្រះរាជបញ្ជាពីព្រះមហាក្សត្រ Maha Vajiralongkorn (Rama X) ដែលជាការកត់សម្គាល់ពីការរីកចម្រើនយ៉ាងឆាប់រហ័សរបស់លោកពីសហគ្រិនបច្ចេកវិទ្យាទៅជាឥស្សរជនកំពូលម្នាក់នៅក្នុងនយោបាយថៃ។

ចំពោះជីវិតផ្ទាល់ខ្លួនលោក Natthaphong បានរៀបការជាមួយ Natthaporn Chan-in ដែលតែងតែជួយគាំទ្រលោក ប៉ុន្តែភាគច្រើននៅឆ្ងាយពីភ្នែកសាធារណៈ។ គូស្នេហ៍​នេះ​រស់នៅ​បែប​សាមញ្ញ និងតាមរបៀបអ្នកស្រឡាញ់សុខភាព ដោយលោក Natthaphong ជា​អ្នក​បួស​មិន​បរិភោគ​សាច់នោះទេ។

លោក​បាន​ជ្រើសរើស​របៀប​ញ៉ាំ​អាហារ​នេះ​ដើម្បី​សុខភាព និង​សីលធម៌ ដោយលោកបាននិយាយនៅក្នុងបទសម្ភាសន៍ថា ការញ៉ាំបួសជួយឱ្យលោកផ្តោតអារម្មណ៍ ពោរពេញដោយថាមពល និងមានវិន័យ ដែលជួយលោកទាំងក្នុងជីវិតប្រចាំថ្ងៃ និងក្នុងការងាររបស់លោកជាអ្នកនយោបាយ៕

អត្ថបទ៖ ប៊ុន សុភាព