លោក Medvedev ស្ដី​បន្ទោសថាមកពី​ណាតូ ទើបរុស្ស៊ី​ដក​ខ្លួន​ពី​សន្ធិសញ្ញានុយក្លេអ៊ែរ INF

អនុប្រធានក្រុមប្រឹក្សាសន្តិសុខ និង​ជា​អតីត​ប្រធានាធិ​បតី​រុស្ស៊ី​ លោក Dmitry Medvedev កាលពីថ្ងៃចន្ទ​ទី​៤​ខែ​សីហា បាន​លើក​ឡើង​ថា ព្រោះ​តែ​«គោលនយោបាយប្រឆាំងរុស្ស៊ី»របស់អង្គការណាតូ ទើប​ធ្វើ​ឲ្យ​ក្រុង​មូស្គូ​សម្រេច​ចិត្ត​ដក​ខ្លួន​ជា​ផ្លូវការ​ពី​សន្ធិសញ្ញាកងកម្លាំងនុយក្លេអ៊ែរកម្រិតមធ្យម (INF)។

លោក Medvedev បាននិយាយនៅលើ​បណ្ដាញ​សង្គម X ថា «សេចក្តីថ្លែងការណ៍របស់ក្រសួងការបរទេសរុស្ស៊ីស្តីពីការដក​ខ្លួន​ចេញ​ពី​សន្ធិសញ្ញា​ដាក់ពង្រាយមីស៊ីលរយៈចម្ងាយមធ្យម និងខ្លី គឺជាលទ្ធផលនៃគោលនយោបាយប្រឆាំងរុស្ស៊ីរបស់ណាតូ។ នេះគឺជាការពិតថ្មីមួយដែលគូប្រជែងរបស់យើងទាំងអស់នឹងត្រូវគិតគូរ»។

បានចុះហត្ថលេខានៅឆ្នាំ​១៩៨៧ សន្ធិសញ្ញា INF តម្រូវឲ្យសហរដ្ឋអាមេរិក និងសហភាពសូវៀត លុបបំបាត់មីស៊ីលបាញ់ពីដី ដែលមាន​រយៈ​ចម្ងាយពី ៥០០ ទៅ ៥ ៥០០​គីឡូម៉ែត្រ។ សហរដ្ឋអាមេរិកបានដកខ្លួនចេញពីសន្ធិសញ្ញាក្នុងឆ្នាំ​២០១៩ ក្នុងអំឡុងពេលរដ្ឋបាលរបស់ប្រធានាធិបតី ដូណាល់ ត្រាំ ដោយលើកឡើងពីការរំលោភបំពានម្តងហើយម្តងទៀតរបស់រុស្ស៊ី ដែល​ការចោទប្រកាន់​នេះ​ត្រូវ​ទីក្រុងមូស្គូបដិសេធ។

សេចក្តីប្រកាសរបស់រុស្ស៊ី បានធ្វើ​ឡើង​ក្រោយ​មាន​​ការ​បញ្ជារបស់ប្រធានាធិបតី ត្រាំ កាលពីសប្តាហ៍មុន ក្នុង​ការ​ដាក់​ពង្រាយ​​នាវាមុជទឹកនុយក្លេអ៊ែរ​ចំនួន​២​គ្រឿង​នៅជិតដែនទឹករុស្ស៊ី ជាការឆ្លើយតបទៅនឹងការគំរាមកំហែង​ដែល​បង្ហោះ​នៅ​លើ​ប្រព័ន្ធ​បណ្ដាញ​សង្គម​របស់​លោក​ Medvedev។

អ្នកនាំពាក្យវិមានក្រឹមឡាំង លោក Dmitry Peskov បានសង្កត់ធ្ងន់ថា រុស្ស៊ីនៅតែ«ប្រុងប្រយ័ត្ន»អំពីសេចក្តីថ្លែងការណ៍ទាក់ទងនឹងនុយក្លេអ៊ែរ ហើយបន្តគាំទ្រដល់កិច្ចខិតខំប្រឹងប្រែងមិនរីកសាយភាយជាសកល។ លោក Peskov បានប្រាប់អ្នកយកព័ត៌មានថា «អ្នកគ្រប់គ្នាគួរតែមានការប្រុងប្រយ័ត្នខ្ពស់ជាមួយនឹងវោហាសាស្ត្រនុយក្លេអ៊ែរ»។

សូម​ជម្រាប​ថា ការដួលរលំនៃសន្ធិសញ្ញា INF ប្រៀប​បាន​ដូច​ជា​ការ​ដក​ការការពារសំខាន់ៗប្រឆាំងនឹងការកើនឡើងនុយក្លេអ៊ែរយ៉ាងឆាប់រហ័សនៅអឺរ៉ុប និងអាស៊ី។ អ្នកជំនាញព្រមានថា វាអាចបង្ក​ឲ្យ​មានការប្រណាំង​ប្រជែង​សព្វាវុធថ្មីៗនៅ​លើ​ពិភពលោក៕

ដោយ៖ ឈាង

ចុចអាន៖ រុស្ស៊ី ប្រកាស​ដកខ្លួនជាផ្លូវការពីសន្ធិសញ្ញាអាវុធនុយក្លេអ៊ែរ INF