ព័ត៌មានអន្ដរជាតិ

ហ្វីលីពីនបន្ទោសចិន ចំពោះហេតុការណ៍នាវាបុកគ្នានៅសមុទ្រចិនខាងត្បូង

បានផុស

៩ ខែ មុន

នៅ

ថ្ងៃពុធ ១៣ សីហា ២០២៥

ដោយ

យោធាហ្វីលីពីនបានចោទប្រកាន់ចិនថាបានបង្កការប៉ះទង្គិចគ្នារវាងនាវាចិនពីរគ្រឿងក្នុងអំឡុងពេលប្រឈមមុខគ្នាជាមួយនាវាឆ្មាំឆ្នេរសមុទ្រហ្វីលីពីននៅជិត Scarborough Shoal ដែលជាតំបន់ជម្លោះនៅសមុទ្រចិនខាងត្បូង។ នេះបើយោងតាមកាចេញផ្សាយរបស់ទីភ្នាក់ងារព័ត៌មាន AP នៅថ្ងៃទី១៣ខែសីហា។

កងនាវាចរ និងនាវាឆ្មាំសមុទ្រចិនបុកគ្នា។ (រូបភាព៖ AP)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឧបទ្ទវហេតុនេះបានកើតឡើងកាលពីថ្ងៃច័ន្ទ នៅពេលដែលកងនាវាចរ និងនាវាឆ្មាំសមុទ្រចិនព្យាយាមរារាំងនាវាឆ្មាំឆ្នេរសមុទ្រហ្វីលីពីន BRP Suluan ពីការការពារអ្នកនេសាទក្នុងស្រុក។

វីដេអូដែលចេញផ្សាយដោយប្រទេសហ្វីលីពីន បង្ហាញពីនាវាកងទ័ពជើងទឹកចិនមួយគ្រឿង បានបុកនាវាឆ្មាំសមុទ្រចិន ខណៈពេលដែលនាវាទាំងពីរព្យាយាមស្ទាក់ចាប់នាវាហ្វីលីពីន។ នាវាឆ្មាំសមុទ្រចិនបានរងការខូចខាតយ៉ាងធ្ងន់ធ្ងរ ហើយនាវាកងទ័ពជើងទឹកបានរងការបាក់បែកផងដែរ។ ហ្វីលីពីនបានផ្តល់ជំនួយផ្នែកវេជ្ជសាស្រ្ដតាមវិទ្យុ ប៉ុន្តែចិនមិនបានឆ្លើយតបទេ។

ប្រមុខយោធាហ្វីលីពីន ឧត្តមសេនីយ៍ Romeo Brawner Jr. បាននិយាយថា ការប៉ះទង្គិចគ្នានេះ បណ្តាលមកពី «ការឈ្លានពាន» របស់ចិន និងបានបង្ហាញពីការផ្លាស់ប្តូរយុទ្ធសាស្ត្រ ខណៈដែលចិនបានដាក់ពង្រាយកងទ័ពជើងទឹករបស់ខ្លួនប្រឆាំងនឹងជនស៊ីវិល។ គាត់បាននិយាយថាទីក្រុងម៉ានីលនឹងពិភាក្សាអំពីការឆ្លើយតបជាមួយប្រធានាធិបតី Ferdinand Marcos Jr.

ទោះយ៉ាងណាប្រទេសចិនបានអះអាងថា ហ្វីលីពីនបានរំលោភចូលក្នុងទឹកដីរបស់ខ្លួន ហើយបានការពារសកម្មភាពរបស់ខ្លួនជាការចាំបាច់ដើម្បីការពារអធិបតេយ្យភាព។ ចំណែកសហរដ្ឋអាមេរិក ដែលជាសម្ព័ន្ធមិត្តរបស់ហ្វីលីពីន បានថ្កោលទោសថានេះ «សកម្មភាពមិនប្រុងប្រយ័ត្ន» របស់ចិន។

Scarborough Shoal នៅតែជាតំបន់តានតឹង ដោយប្រទេសទាំងពីរបដិសេធមិនបោះបង់ការទាមទារ ឬសិទ្ធិនេសាទរបស់ពួកគេនោះទេ៕