ក្រុមហាម៉ាស ទទួល​យក​សំណើ​បទ​ឈប់​បាញ់​នៅ​ហ្គាហ្សា ប៉ុន្តែ​អ៊ីស្រាអែល​នៅតែចង់បន្តសង្គ្រាម

ក្រុមហាម៉ាស់បានប្រកាសទទួលយកសំណើបទឈប់បាញ់ថ្មីដែលសម្របសម្រួលដោយកាតា និងអេហ្ស៊ីប ដោយបង្កើនក្តីសង្ឃឹមសម្រាប់ការផ្អាកសង្គ្រាមនៅតំបន់ហ្គាហ្សា ដែលបានសម្លាប់ប្រជាជនប៉ាឡេស្ទីនជាង ៦២,០០០ នាក់ និងបង្កឱ្យមានទុរ្ភិក្សរីករាលដាល ប៉ុន្តែយ៉ាងណា​អ៊ីស្រាអែល​បង្ហាញ​សញ្ញាបន្តសង្គ្រាម។ នេះបើយោងតាមការចេញផ្សាយរបស់សារព័ត៌មាន Al Jazeera នៅថ្ងៃទី១៩ខែសីហា។

សំណើបទឈប់បាញ់នេះអំពាវនាវឱ្យមានការផ្អាករយៈពេល ៦០ថ្ងៃចំពោះប្រតិបត្តិការយោធា ការផ្តល់ជំនួយមនុស្សធម៌ និងការដោះដូរអ្នកទោសនិងចំណាប់ខ្មាំង។

ទោះ​បី​ជា​បែប​នេះ​ក្ដី អ៊ីស្រាអែល​ហាក់​មិន​ចង់​បញ្ចប់​សង្គ្រាម​ឡើយ។ នាយករដ្ឋមន្ត្រីអ៊ីស្រាអែលលោក Benjamin Netanyahu និងមន្ត្រីអ៊ីស្រាអែលផ្សេងទៀតបានទទូចឱ្យបន្តទៅមុខជាមួយនឹងផែនការដើម្បីដណ្តើមយកទីក្រុង ហ្គាហ្សាឲ្យបាន។ ថ្នាក់​ដឹកនាំ​របស់​អ៊ីស្រាអែល​អះអាង​ថា ក្រុម​ហាម៉ាស​កំពុង​តែ​ចរចា​ដោយ​សារ​តែ​សម្ពាធ​យោធា ប៉ុន្តែអ៊ីស្រាអែលនៅតែប្តេជ្ញា​បន្ត​ប្រតិបត្តិការ​ដើម្បី​សម្រេច​បាន​គោលដៅ​យុទ្ធសាស្ត្រ​របស់​ខ្លួន។

អ្នកសម្របសម្រួលកាតា និងអេហ្ស៊ីបបន្តជំរុញឱ្យមានកិច្ចពិភាក្សា ដោយលើកឡើងពីវិបត្តិមនុស្សធម៌ដ៏មហន្តរាយនៅហ្គាហ្សា ជាកន្លែងដែលក្រុមជំនួយព្រមានអំពីការអត់ឃ្លាន និងការផ្លាស់ទីលំនៅ។ អេហ្ស៊ីប និងកាតា សង្កត់ធ្ងន់លើភាពបន្ទាន់នៃកិច្ចព្រមព្រៀងមួយ ខណៈដែលអង្គការលើកលែងទោសអន្តរជាតិបានចោទប្រកាន់អ៊ីស្រាអែលថា មានចេតនាប្រើប្រាស់ភាពអត់ឃ្លានជាអាវុធក្នុងសង្គ្រាម។

ពាក់ព័ន្ធបញ្ហានេះក្រុមអ្នកសង្កេតការណ៍បានព្រមានថា ការប៉ុនប៉ងសម្រេចបទឈប់បាញ់ពីមុនបានដួលរលំដោយសារតែការបដិសេធរបស់អ៊ីស្រាអែលចំពោះបទឈប់បាញ់ជាអចិន្ត្រៃយ៍ ដែលបន្សល់ទុកនូវភាពមិនប្រាកដប្រជាលើថាតើកិច្ចខិតខំប្រឹងប្រែងចុងក្រោយនេះនឹងទទួលបានជោគជ័យឬយ៉ាងណានោះទេ៕

អត្ថបទ៖ ប៊ុន សុភាព