ថៃ ចាប់ផ្តើមយកចិត្ត ជនភៀសខ្លួនមីយ៉ាន់ម៉ា 

បន្ទាប់ពីស្តាយក្រោយនិងកំពុងឈឺក្បាលខ្លាំងព្រោះបាត់កម្លាំងពលកម្មសំខាន់ ក្រោយពលករខ្មែរវិលចូលប្រទេសវិញនោះ ពេលនេះថៃ ចាប់ផ្តើមយកចិត្តយកថ្លើមជនភៀសខ្លួនមីយ៉ាន់ម៉ា ក្នុងគោលបំណងបញ្ចុះបញ្ចូលពួកគេឲ្យទៅធ្វើជាពលករ ដើម្បីបំពេញកន្លែងខ្វះខាត ទាំងដែលពីមុនថៃធ្លាប់មើលងាយនិងមិនឲ្យតម្លៃពួកគេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការផ្សាយរបស់ Bangkok Post នៅថ្ងៃព្រហស្បតិ៍ទី៤ខែកញ្ញាឆ្នាំ២០២៥ ក្រសួងសុខាភិបាលសាធារណៈថៃ គ្រោងជះលុយ១៦០លានបាត ដើម្បីពង្រឹងផ្នែកសុខាភិបាល មើលថែទាំជនភៀសខ្លួនមីយ៉ាន់ម៉ាជាង ៧០០ ០០០នាក់ក្នុងជំរំជនភៀសខ្លួនចំនួន៧ នៅតាមបណ្តាយព្រំដែនថៃ-មីយ៉ាន់ម៉ា។

លោករដ្ឋមន្ត្រី Somsak Thepsutin និយាយថា ក្រសួងនឹងធ្វើការយ៉ាងជិតស្និទ្ធជាមួយភ្នាក់ងាររបស់រដ្ឋ រួមទាំងក្រសួងមហាផ្ទៃ និងការិយាល័យក្រុមប្រឹក្សាសន្តិសុខជាតិផងដែរ ដើម្បីធានាថាគោលនយោបាយសម្រាប់ជនភៀសខ្លួនអាចមាននិរន្តរភាពក្នុងរយៈពេលយូរ។

លើសពីនេះ ការអនុញ្ញាតឲ្យជនភៀសខ្លួនដែលមានលិខិតអនុញ្ញាត ឲ្យធ្វើការនៅខាងក្រៅជំរំក៏នឹងក្លា​យជាចំណុចស្នូលសម្រាប់ជនភៀសខ្លួនដែលត្រូវបានគ្របដណ្តប់ដោយប្រព័ន្ធសុខុមាលភាពសង្គមផងដែរ។

មុននេះ ​ថៃថែមទាំង​អនុម័ត​គោលនយោបាយ​សំខាន់​មួយ​ដែល​អនុញ្ញាត​ឲ្យ​ជនភៀសខ្លួន​មី​យ៉ាន់​ម៉ា​រាប់​ពាន់​នាក់​នៅ​ជំរំតាម​ព្រំដែន ឲ្យ​ធ្វើការ​ដោយ​ស្របច្បាប់​ជា​លើក​ដំបូងទៀតផង។

ជនភៀសខ្លួននឹងអាចស្នើសុំលិខិតអនុញ្ញាតការងាររយៈពេលមួយឆ្នាំ និងការអនុញ្ញាតឲ្យចាកចេញពីជំរំ ដោយបំបែកការរឹតបន្តឹងជាច្រើនទសវត្សរ៍ ស្របពេលជំនួយបរទេសក៏ធ្លាក់ចុះផងដែរ។

រឿងនេះកើតឡើងចំពេលមានការកាត់បន្ថយអាហារូបត្ថម្ភ និងភាពអស់សង្ឃឹមកាន់តែខ្លាំងនៅតាមជំរំ ក៏ដូចជាកង្វះកម្លាំងពលកម្មនៅក្នុងប្រទេសថៃដែលបណ្តាលមកពីចំនួនប្រជាជនវ័យចំណាស់ និងការចាកចេញរបស់ពលករកម្ពុជានាពេលថ្មីៗនេះ៕

អត្ថបទ៖ សុខ សុវណ្ណ