ព័ត៌មានអន្ដរជាតិ

ICC ពន្យារពេលសវនាការលោក Duterte ព្រោះបញ្ហាសុខភាព

បានផុស

៨ ខែ មុន

នៅ

ថ្ងៃអង្គារ ៩ កញ្ញា ២០២៥

ដោយ

Chheang

តុលាការឧក្រិដ្ឋកម្មអន្តរជាតិ (ICC) បានពន្យារពេលសវនាការដើម្បីកំណត់ការចោទប្រកាន់ជាផ្លូវការប្រឆាំងនឹងអតីតប្រធានាធិបតីហ្វីលីពីនលោក Rodrigo Duterte ដោយលើកឡើងពីតម្រូវការដើម្បីវាយតម្លៃថាតើបុរសវ័យ៨០ឆ្នាំរូបនេះសមនឹងអនុវត្តតាមនីតិវិធីមុនការកាត់ក្តីដែរឬទេ។

លោក Duterte ដែលត្រូវបានចាប់ខ្លួនកាលពីខែមីនា និងផ្ទេរទៅកាន់ទីក្រុងឡាអេ ប្រឈមមុខនឹងការចោទប្រកាន់ពីបទមនុស្សឃាតជុំវិញ«សង្គ្រាមប្រឆាំងគ្រឿងញៀន» ដ៏បង្ហូរឈាមរបស់គាត់ ក្នុងអំឡុងពេលដែលជនសង្ស័យលក់ និងប្រើប្រាស់ថ្នាំញៀនរាប់ពាន់នាក់ត្រូវបានសម្លាប់។ លោក Duterte បានច្រានចោលការចាប់ខ្លួននេះថាជារឿងខុសច្បាប់ ហើយបានពណ៌នាថាជាការចាប់ជំរិត។

តុលាការបានកំណត់ពេលសវនាការបញ្ជាក់ការចោទប្រកាន់នៅថ្ងៃទី២៣ខែកញ្ញា ប៉ុន្តែចៅក្រមកាលពីថ្ងៃចន្ទទី៨ខែកញ្ញាបានបញ្ជាឲ្យពន្យារពេល ដោយនិយាយថា ដំណើរការនឹងត្រូវផ្អាក ដើម្បីកំណត់ថាតើលោក Duterte សមនឹងតាមដាន និងចូលរួមក្នុងដំណើរការមុនជំនុំជម្រះឬអត់។

មេធាវីការពារក្តីលោក Duterte បានស្វែងរកការពន្យារពេលក្នុងខែសីហា ដោយអះអាងថា អតីតមេដឹកនាំរូបនេះ មានសុខភាពមិនល្អ ទោះបីជាព័ត៌មានលម្អិតនៃស្ថានភាពរបស់គាត់មិនត្រូវបង្ហាញជាសាធារណៈក៏ដោយ។

វាមិនច្បាស់ទេថានៅពេលណា ICC នឹងចេញសេចក្តីសម្រេចស្តីពីសុខភាពរបស់លោក Duterte។ វាជាករណីកម្រណាស់ដែលតុលាការអន្តរជាតិលើកឡើងថា ជនសង្ស័យមិនស័ក្តិសមសម្រាប់ការកាត់ក្តី ព្រោះតែជរាភាព ឬបញ្ហាសុខភាព។ តុលាការ ICC មិនដែលធ្លាប់ចាត់ទុកជនសង្ស័យណាម្នាក់ទេថាមិនស័ក្តិសមសម្រាប់ការកាត់ក្តី បើទោះបីជាមានញត្តិជាច្រើនលើកច្រើនសាពីចុងចោទក៏ដោយ។

សូមជម្រាបថា លោក Duterte ដែលធ្លាប់ធ្វើជាប្រធានាធិបតីហ្វីលីពីនពីឆ្នាំ២០១៦ ដល់ឆ្នាំ២០២២ បានចាប់ផ្តើមយុទ្ធនាការប្រឆាំងគ្រឿងញៀន ដែលក្រុមសិទ្ធិមនុស្សនិយាយថា ស្មើនឹងការសម្លាប់ក្រៅប្រព័ន្ធតុលាការ និងឧក្រិដ្ឋកម្មប្រឆាំងមនុស្សជាតិ។ ICC បានបើកការស៊ើបអង្កេតជាផ្លូវការលើយុទ្ធនាការរបស់លោក Duterte នៅក្នុងឆ្នាំ២០២១៕