ថ្នាក់រៀននិងជើងហោះហើរត្រូវផ្អាក ខណៈព្យុះថ្មីកំពុងគំរាមកំហែងហ្វីលីពីន​

យោងតាមការចេញផ្សាយរបស់ទីភ្នាក់ងារព័ត៌មាន CNA កាលពីថ្ងៃទី២៦ខែកញ្ញា ប្រទេសហ្វីលីពីន ដែលទើបតែធូរស្បើយពីការបំផ្លិចបំផ្លាញរបស់ព្យុះទីហ្វុង Ragasa ត្រូវបានបង្ខំឱ្យលុបចោលថ្នាក់ និងជើងហោះហើរម្ដងទៀត ខណៈដែលព្យុះថ្មីមួយទៀតគឺព្យុះត្រូពិច Bualoi ដ៏ខ្លាំងក្លាបានគំរាមកំហែងប្រទេសនេះ។

ការព្យាករណ៍បង្ហាញថាព្យុះ Bualoi នឹងបង្កើនឥទ្ធិពលកាន់តែខ្លាំងទៅជាព្យុះទីហ្វុងនៅថ្ងៃសុក្រនេះ ដែលនាំមកនូវហានិភ័យនៃទឹកជំនន់រីករាលដាល បំណាក់ដី និងរលកសមុទ្រកើនដល់ ៣ ម៉ែត្រ ជាពិសេសនៅតំបន់ភាគខាងត្បូងនៃកោះ Luzon ។

អាជ្ញាធរបានជម្លៀសមនុស្សរាប់ពាន់នាក់រួចហើយ ខណៈដែលឆ្មាំឆ្នេរសមុទ្រហ្វីលីពីនរាយការណ៍ថាអ្នកដំណើរប្រហែល ១៥០០ នាក់បានជាប់គាំងនៅក្នុងកំពង់ផែ Bicol ខណៈដែលព្យុះខិតជិតមកដល់។ ជាមួយគ្នានេះសហគមន៍ជាច្រើននៅតែលិចទឹក និងងាយរងគ្រោះបន្ទាប់ពីការបំផ្លិចបំផ្លាញរបស់ព្យុះ Ragasa ដែលបានសម្លាប់មនុស្សយ៉ាងហោចណាស់ប្រាំបួននាក់។

ប្រធានាធិបតីហ្វីលីពីនលោក Ferdinand Marcos បានផ្ដល់ជំនួយជាមុនដូចជា ស្បៀងអាហារ ថ្នាំពេទ្យ និងការផ្គត់ផ្គង់សង្គ្រោះបន្ទាន់នៅក្នុងតំបន់ដែលមានហានិភ័យ។ ទោះជាយ៉ាងណាក៏ដោយ រដ្ឋាភិបាលហ្វីលីពីនក៏ប្រឈមមុខនឹងការខឹងសម្បារកាន់តែខ្លាំងឡើងពីសាធារណៈជនដែរ ជុំវិញរឿងអាស្រូវការគ្រប់គ្រងទឹកជំនន់ ដែលចំណាយលុយអស់រាប់ពាន់លានដុល្លារធ្វើឱ្យប្រជាជនខកចិត្តកាន់តែខ្លាំង និងទាមទារការការពារដ៏គួរឱ្យទុកចិត្តបន្ថែមទៀតចំពោះគ្រោះមហន្តរាយធម្មជាតិ។

គួរបញ្ជាក់ថាប្រទេសហ្វីលីពីនត្រូវបានវាយប្រហារដោយព្យុះជាមធ្យមចំនួន ២០ ក្នុងមួយឆ្នាំ នៅតែជាប្រទេសមួយដែលងាយរងគ្រោះបំផុតរបស់ពិភពលោកចំពោះបញ្ហាអាកាសធាតុ។ អ្នកវិទ្យាសាស្ត្រព្រមានថា ការប្រែប្រួលអាកាសធាតុកំពុងធ្វើឱ្យព្យុះបែបនេះមានកម្លាំងកាន់តែខ្លាំងនិងប៉ះពាល់ដល់មនុស្សកាន់តែច្រើន៕

អត្ថបទ៖ ប៊ុន សុភាព