ព័ត៌មានអន្ដរជាតិ

ព្យុះ Bualoi បង្កការបំផ្លិចបំផ្លាញធ្ងន់ធ្ងរក្នុងប្រទេសវៀតណាម ខណៈអ្នកស្លាប់កើនដល់២៦នាក់

បានផុស

៨ ខែ មុន

នៅ

ថ្ងៃពុធ ១ តុលា ២០២៥

ដោយ

យោងតាមការចេញផ្សាយរបស់សារព័ត៌មាន VN Express នៅថ្ងៃទី០១ខែ តុលា ព្យុះទីហ្វុង ប៊ូឡូយ(Bualoi) បានបណ្តាលឱ្យមនុស្សយ៉ាងហោចណាស់ ២៦ នាក់ស្លាប់ និង ២២ នាក់បាត់ខ្លួននៅទូទាំងប្រទេសវៀតណាម ខណៈដែលភ្លៀងធ្លាក់ខ្លាំង ទឹកជំនន់ និងបំណាក់ដីបន្តបំផ្លិចបំផ្លាញខេត្តភាគខាងជើង និងភាគកណ្តាលប្រទេសនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តំបន់ដែលរងគ្រោះខ្លាំងជាងគេរួមមានខេត្ត Ninh Binh និង Hung Yen ដោយព្យុះផ្គររន្ទះបានសម្លាប់មនុស្ស ១១ នាក់ ខណៈមនុស្ស ៨នាក់ផ្សេងទៀតបានស្លាប់ដោយសារបំណាក់ដី។ លើសពីនេះផ្ទះរាប់ពាន់ខ្នងបានរងការខូចខាត ឬលិចទឹក ដោយខេត្ត Ha Tinh រងការបំផ្លិចបំផ្លាញខ្លាំងបំផុតដោយមានផ្ទះជាង ៨ ម៉ឺន៤ពាន់ ខ្នងបានប៉ើងដំបូល។

កសិកម្មបានរងការខាតបង់យ៉ាងធ្ងន់ធ្ងរ ដោយស្រូវនិងបន្លែចំនួន ២៥៥០០ ហិកតាត្រូវបានបំផ្លាញ ហើយកសិដ្ឋានចិញ្ចឹមត្រី ៨៧០០ ហិកតាត្រូវជន់លិច។ ហេដ្ឋារចនាសម្ព័ន្ធជាច្រើនរងការខូចខាត ដូចជាបាក់ទំនប់ទឹក និងបំណាក់ដីជាង ១,៣០០ចំណុចដែលរំខានដល់ចរាចរណ៍។

គួរបញ្ជាក់ថាព្យុះនេះបានចាប់បោកបក់នៅខេត្ត Quang Tri-Ha Tinh ប្រទេសវៀតណាម កាលពីថ្ងៃទី ២៩ ខែកញ្ញា ជាមួយនឹងកម្លាំងខ្យល់១១៧ គីឡូម៉ែត្រក្នុងមួយម៉ោង តែបានចុះខ្សោយទៅជាព្យុះត្រូពិច បន្ទាប់ពីវាយលុកប្រទេសវៀតណាមអស់រយៈពេល ១៣ ម៉ោង។ ទោះបីជាព្យុះចុះខ្សោយ ប៉ុន្តែជំនន់ទឹកភ្លៀងនៅទូទាំងខេត្តជាច្រើនបានឈានដល់កម្រិតខ្ពស់ខ្លាំង ជាពិសេសនៅក្នុងខេត្តThua Thien Hue កម្រិតទឹកឡើងរហូតដល់ ៨៥៥ មីលីម៉ែត្រ ឯណោះដែលបង្កឲ្យមានទឹកជំនន់ថ្មីនៅក្នុងទីក្រុងហាណូយ និងតំបន់ជុំវិញ៕