ប្រទេសកូឡុំប៊ីបណ្តេញអ្នកការទូតអ៊ីស្រាអែលចេញ ក្រោយកងទ័ពជើងទឹកអ៊ីស្រាអែលស្ទាក់ចាប់កងនាវាដឹកជំនួយទៅហ្គាហ្សា

យោងតាមការចេញផ្សាយរបស់សារព័ត៌មាន Al Jazeera នៅថ្ងៃទី០៣ខែតុលា ប្រទេសកូឡុំប៊ីបានបណ្តេញអ្នកការទូតអ៊ីស្រាអែល និងលុបចោលកិច្ចព្រមព្រៀងពាណិជ្ជកម្ម បន្ទាប់ពីកងទ័ពជើងទឹករបស់អ៊ីស្រាអែលបានស្ទាក់ចាប់នាវាស្ទើរតែទាំងអស់របស់កងនាវា Global Sumud Flotilla ដែលជាបេសកកម្មទូកចំនួន ៤៤ ដែលដឹកសម្ភារៈមនុស្សធម៌ទៅកាន់តំបន់ហ្គាហ្សា និងឃាត់ខ្លួនសកម្មជនប្រហែល ៥០០ នាក់មកពីជាង ៤០ប្រទេស។

ក្នុង​ចំណោម​អ្នក​ដែល​ត្រូវ​បាន​ចាប់​ខ្លួន​នោះ មាន​សកម្មជន​ល្បី​ឈ្មោះ​ដូច​ជា Greta Thunberg អតីត​អភិបាល​ក្រុង Barcelona ប្រទេសអេស្ប៉ាញ លោក Ada Colau និង​សមាជិក​សភា​សហភាព​អឺរ៉ុប Rima Hassan។ អ៊ីស្រាអែល​អះអាង​ថា កង​នាវាទាំងអស់បាន​ប៉ុនប៉ង​រំលោភ​លើ​ការ​រារាំង​របស់​ខ្លួន ប៉ុន្តែ​អ្នក​រិះគន់​និយាយ​ថា ការ​រឹបអូស​នៅ​ក្នុង​ដែនទឹក​អន្តរជាតិ​បំពាន​ច្បាប់​អន្តរជាតិ។

ទោះបីជាមានការបង្រ្កាបក៏ដោយ ក៏ទូកដែលមានទង់ជាតិប៉ូឡូញមួយគឺ Marinette បន្តដំណើរឆ្ពោះទៅកាន់តំបន់ហ្គាហ្សា។ ទូកនេះត្រូវ​បាន​ដឹក​នាំ​ដោយ​បុរស​ជនជាតិ​អូស្ត្រាលី​ម្នាក់​ដែល​គេ​ស្គាល់​ថា​ជា Cameron និងមានមនុស្ស ៦ នាក់នៅលើទូក។ ដំបូងឡើយ ទូកនេះមានបញ្ហាម៉ាស៊ីន ហើយឥឡូវកំពុងធ្វើដំណើរទៅហ្គាហ្សា ដែលនៅសល់ចម្ងាយប្រហែល ៨០ គីឡូម៉ែត្រទៀតពីដែនទឹករបស់ហ្គាហ្សា។

ការរឹបអូសយកកងនាវាជំនួយដោយអ៊ីស្រាអែលនេះបានបង្កឱ្យមានការរិះគន់ទូទាំងពិភពលោក។ ក្នុងនោះប្រធានាធិបតីកូឡុំប៊ីលោក Gustavo Petro បានប្រកាសថារដ្ឋាភិបាលរបស់លោកកំពុងបណ្តេញអ្នកការទូតអ៊ីស្រាអែល និងលុបចោលកិច្ចព្រមព្រៀងពាណិជ្ជកម្មសេរីជាមួយអ៊ីស្រាអែលដោយសារសកម្មភាពរបស់អ៊ីស្រាអែល ខណៈដែលប្រទេសអឺរ៉ុបមួយចំនួនបានជំរុញឱ្យអ៊ីស្រាអែលគោរពសិទ្ធិនាវិក។

មេដឹកនាំសហជីពអន្តរជាតិលោក Stephen Cotton ក៏បាននិយាយដែរថា ការបញ្ឈប់នាវាជំនួយដោយសន្តិវិធីនៅក្នុងដែនទឹកអន្តរជាតិគឺជាអំពើខុសច្បាប់។ លើសពីនេះមន្ត្រីអង្គការសហប្រជាជាតិលោកស្រី Francesca Albanese បានហៅការស្ទាក់ចាប់នេះថា «ការចាប់ពង្រត់ខុសច្បាប់» ដោយព្រមានថាប្រជាជននៅតំបន់ហ្គាហ្សានៅតែជាប់នៅក្រោមលក្ខខណ្ឌដ៏សាហាវ៕

អត្ថបទ៖ ប៊ុន សុភាព