មិនធ្លាប់មាន! សមាជិក​សភា​អាមេរិកជាង ១០០នាក់បោះឆ្នោត គាំទ្រ​ការ​ផ្ដាច់​ជំនួយយោធាឱ្យ​អ៊ីស្រាអែល

ការបោះឆ្នោតនៅក្នុងសភាតំណាងរាស្ត្រសហរដ្ឋអាមេរិក កាលពីថ្ងៃពុធ បានបង្ហាញពីការបែកបាក់នយោបាយដ៏ធ្ងន់ធ្ងរមួយ នៅក្នុងបក្សប្រជាធិបតេយ្យ ជុំវិញគោលនយោបាយការបរទេស ចំពោះប្រទេសអ៊ីស្រាអែល។

យោងតាម CNN ចុះផ្សាយ​ថ្ងៃ​ព្រហស្បតិ៍ ទី​១៦ ខែ​កក្កដា ឆ្នាំ២០២៦ សមាជិកសភាចំនួន ១០៣រូបមកពីបក្សប្រជាធិបតេយ្យ បានសម្រេចចិត្តបោះឆ្នោតគាំទ្រសេចក្តីស្នើកាត់ផ្តាច់ជំនួយយោធារាប់ពាន់លានដុល្លារ ដែលអាមេរិកធ្លាប់ផ្តល់ឱ្យអ៊ីស្រាអែល។ ថ្វីដ្បិត​សេចក្តីស្នើនេះ ត្រូវបានបរាជ័យដោយសំឡេងភាគច្រើនក៏ដោយ ក៏វាជាលើកដំបូងដែលសមាជិកបក្សប្រជាធិបតេយ្យភាគច្រើន បង្ហាញជំហរប្រឆាំងនឹងជំនួយយោធាដ៏ធំសម្បើមមួយនេះ។

សេចក្តីស្នើដែលដាក់ដោយសមាជិកសភាបក្សសាធារណរដ្ឋ លោក Thomas Massie នេះ បានធ្វើឱ្យមានការជជែកដេញដោលយ៉ាងខ្លាំងក្លានៅក្នុងសភា។ ថ្នាក់ដឹកនាំកំពូលៗរបស់បក្សប្រជាធិបតេយ្យ មិនមានជំហរតែមួយទេ ដោយមេដឹកនាំមួយចំនួន បានបោះឆ្នោតជំទាស់នឹងសំណើនេះ ដោយសារពួកគេយល់ថា វាមិនត្រឹមតែប៉ះពាល់ដល់យោធាប៉ុណ្ណោះទេ ប៉ុន្តែថែមទាំងប៉ះពាល់ដល់ជំនួយមនុស្សធម៌ សម្រាប់ជនស៊ីវិលដែលកំពុងរងគ្រោះផងដែរ។ ចំណែកឯសមាជិកបក្សប្រជាធិបតេយ្យដែលគាំទ្រការកាត់ជំនួយវិញ បានចាត់ទុកនេះថា ជាការបញ្ចប់នៃសម័យកាលដែលអ៊ីស្រាអែលទទួលបានជំនួយដោយគ្មានការត្រួតពិនិត្យពីអាមេរិក។

មេដឹកនាំបក្សប្រជាធិបតេយ្យក្នុងសភា លោក Hakeem Jeffries បានអនុញ្ញាតឱ្យសមាជិកបក្សរបស់លោកបោះឆ្នោតតាមឆន្ទៈផ្ទាល់ខ្លួន ដើម្បីចៀសវាងការបង្ខិតបង្ខំលើបញ្ហាមនសិការនេះ។ ក្រុមសមាជិកសភាវ័យក្មេង និងក្រុមអ្នកនយោបាយនិយមរីកចម្រើន បានអបអរសាទរចំពោះលទ្ធផលនេះ ដោយពួកគេចាត់ទុកថា វាជាសារព្រមានដ៏ខ្លាំងក្លាមួយផ្ញើទៅកាន់រដ្ឋាភិបាលអ៊ីស្រាអែល។ ព្រឹត្តិការណ៍នេះ បានឆ្លុះបញ្ចាំងយ៉ាងច្បាស់ថា សម្ព័ន្ធភាពរវាងបក្សប្រជាធិបតេយ្យ និងអ៊ីស្រាអែលដែលធ្លាប់តែមានភាពរឹងមាំនោះ កំពុងស្ថិតក្នុងដំណាក់កាលផ្លាស់ប្តូរ និងប្រឈមនឹងការសាកល្បងយ៉ាងធ្ងន់ធ្ងរ៕

ប្រែសម្រួល៖ ឈាង