លោក គីម ​ប្រាប់​លោក ពូទីន ថា សម្ព័ន្ធភាព​ពួកគេ​ឈាន​ដល់«ចំណុច​កំពូល» ហើយ​នឹង​មិនប្រែប្រួលថ្ងៃទៅមុខ

មេដឹកនាំកូរ៉េខាងជើង លោក គីម ជុងអ៊ុន បានសន្យាថានឹងបន្តពង្រឹងទំនាក់ទំនងជាមួយរុស្ស៊ី ដោយប្រាប់ប្រធានាធិបតី វ្ល៉ាឌីមៀរ ពូទីន ថាសម្ព័ន្ធភាពរបស់ពួកគេ «នឹងត្រូវបានអនុវត្តទៅមុខមិនប្រួល​ប្រែ​នាពេលអនាគត»។

យោង​តាម​​ប្រព័ន្ធ​ផ្សព្វផ្សាយ​រដ្ឋ KCNA កាល​ពី​ថ្ងៃ​អាទិត្យ​ទី​៦​ខែ​តុលា​ឆ្នាំ​២០២៥ នៅក្នុងលិខិតអបអរសាទរលោក ពូទីន នៅថ្ងៃខួបកំណើត លោក គីម បានបញ្ជាក់​ថា ទំនាក់ទំនងរបស់ប្រទេសទាំងពីរបានឈានចូលដល់«ចំណុច​កំពូល» ហើយនឹងបន្តរីកចម្រើនកាន់តែខ្លាំងឡើងក្រោមចំណងមិត្តភាពផ្ទាល់ខ្លួនរបស់ពួកគេ។

លោក គីម បានសរសេរថា «ខ្ញុំមិនសង្ស័យថា ទំនាក់ទំនងនៃសម្ព័ន្ធភាពរវាងប្រទេសទាំងពីរ … នឹងរួមចំណែកយ៉ាងធំធេងក្នុងការជំរុញ​ឲ្យ​មានការអភិវឌ្ឍ​យ៉ាងទូលំទូលាយនៃទំនាក់ទំនងទ្វេភាគី និងការបង្កើតសណ្តាប់ធ្នាប់ពិភពលោកដែលត្រឹមត្រូវ និងពហុប៉ូល»។

មេដឹកនាំកូរ៉េខាងជើងក៏បានអះអាងជាថ្មីនូវការគាំទ្រយ៉ាងពេញទំហឹងចំពោះអ្វីដែលលោកហៅថា «ការតស៊ូ» របស់រុស្ស៊ី ដើម្បីការពារអធិបតេយ្យភាពរបស់ខ្លួន ដែលសំដៅ​ទៅលើសង្រ្គាមដែលកំពុងបន្តរបស់ទីក្រុងមូស្គូប្រឆាំងនឹងអ៊ុយក្រែន។

ភ្នាក់ងារ​ស៊ើបការណ៍សម្ងាត់ជាតិរបស់កូរ៉េខាងត្បូង បានប៉ាន់ប្រមាណថា ទីក្រុងព្យុងយ៉ាងបានបញ្ជូនទាហានប្រហែល ១៥ ០០០​នាក់ និងឧបករណ៍យោធាទៅជួយរុស្ស៊ីចាប់តាំងពីខែតុលាឆ្នាំមុន ដោយធ្វើ​ឲ្យ​មានការព្រួយបារម្ភយ៉ាងខ្លាំងចំពោះកិច្ចសហប្រតិបត្តិការយោធារបស់ប្រទេសទាំងពីរដែលកំពុងកើនឡើង។

សារចុងក្រោយនេះ គូសបញ្ជាក់អំពីភាពជាដៃគូដែលកំពុងពង្រីករវាងទីក្រុងព្យុងយ៉ាង និងទីក្រុងមូស្គូ ដែលបានពង្រឹងខ្លួនពួកគេប្រឆាំងនឹងសហរដ្ឋអាមេរិក និងសម្ព័ន្ធមិត្តរបស់អាមេរិក ចំពេលមានភាពតានតឹងសកលកើនឡើង៕

ដោយ៖ ឈាង