តើវ៉ាក់សាំងមួយណា មានប្រសិទ្ធភាពខ្លាំងជាងគេ ប្រឆាំងវីរុសបំប្លែងខ្លួន Delta?

ការចាក់វ៉ាក់សាំងបង្ការកូវីដ-១៩ សុទ្ធតែអាចការពារហានិភ័យចម្លងវីរុសនេះតិចឬច្រើនតាមគុណភាពនៃវ៉ាក់សាំងរបស់ក្រុមហ៊ុននីមួយៗ។

វ៉ាក់សាំង ពីរ​ដូសឬមួយដូសក្ដីអាច​ផ្តល់​ការការពារ​ល្អ​​ដោយ​មិន​ចាំ​បាច់​ចូល​ព្យាបាល​នៅ​មន្ទីរ​ពេទ្យ និង​បង្ការ​គ្រោះ​ថ្នាក់​ដល់​អាយុជីវិត​ពី​វីរុសកូវីដ-១៩ រួមទាំងវីរុសបំប្លែង​ខ្លួន​ដទៃទៀតផងដែរ។

ខណៈវីរុសបំប្លែងខ្លួន​ Delta កំពុងអុកឡុកសហគមន៍ ចម្ងល់គឺថា តើវ៉ាក់សាំងនីមួយៗដែលពិភពលោកកំពុងប្រើប្រាស់អាចការពារវីរុសបំប្លែងខ្លួននេះបានកម្រិតណា?

វ៉ាក់សាំង Pfizer-Biotech

ការសិក្សាដែលចេញផ្សាយដោយ ALJAZEERA បានរកឃើញថា វ៉ាក់សាំង Pfizer ចំនួន ២ ដូសមានប្រសិទ្ធភាព ៨៨ ភាគរយក្នុងការការពារជំងឺរោគសញ្ញាពីវីរុសបំប្លែងខ្លួន Delta និងមានប្រសិទ្ធភាពរហូតដល់ទៅ ៩៣.៧ ភាគរយប្រឆាំងវីរុសបំប្លែងខ្លួន Alpha។

វ៉ាក់សាំង AstraZeneca (អង់គ្លេស)

ប្រភពដដែល ក៏បានបញ្ជាក់ពីប្រសិទ្ធភាពនៃវ៉ាក់សាំង AstraZeneca ទៅនឹងវីរុសបំប្លែងខ្លួនថ្មីផងដែរ។ វ៉ាក់សាំង AstraZeneca ចំនួន ២ ដូសបង្ហាញប្រសិទ្ធិភាព ៦៧ ភាគរយប្រឆាំងនឹងវីរុសបំប្លែងខ្លួន Delta និង ៧៤.៥ ភាគរយប្រឆាំងវីរុសបំប្លែងខ្លួន Alpha។

វ៉ាក់សាំង Moderna

ងាកមកក្រុមហ៊ុនផលិតឱសថអាមេរិក Moderna វិញ បានអះអាងថា វ៉ាក់សាំងការពារជំងឺកូវីដ-១៩ របស់ខ្លួន មានសមត្ថភាពប្រឆាំងនឹងវីរុសបំប្លែងខ្លួនជាច្រើនដែលកំពុងអុកឡុកទូទាំងពិភពលោក រួមទាំងវីរុសបំប្លែងខ្លួន Delta ផងដែរ ។

ប្រភពពី Healthline បានឱ្យដឹងថា វ៉ាក់សាំង Moderna ចាក់ពីរលើកពេញលេញអាចតយុទ្ធជាមួយវីរុសបំប្លែងខ្លួន Delta ចំនួន ៧២ ភាគរយ។

វ៉ាក់សាំង Johnson & Johnson

យោងតាមការសិក្សាដែលចេញផ្សាយដោយក្រុមអ្នកស្រាវជ្រាវ មកពីទីក្រុង Harvard បានឲ្យដឹងថា វ៉ាក់សាំង Johnson & Johnson ជំរុញឲ្យមានការឆ្លើយតបនឹងប្រព័ន្ធភាពស៊ាំប្រឆាំងនឹងវីរុសបំប្លែងខ្លួនជាច្រើនប្រភេទ ។

រីឯវេជ្ជបណ្ឌិត Scott Gottlieb អតីតនាយករដ្ឋបាលចំណីអាហារនិងឱសថអាមេរិក (FDA) និយាយថា វ៉ាក់សាំង Johnson & Johnson មានប្រសិទ្ធភាពប្រមាណ ៦០% ប្រឆាំងនឹងវីរុសបំប្លែង Delta។ នេះបើតាមការចុះផ្សាយពី NBC Boston កាលពីដើមខែក្កដា ឆ្នាំ២០២១។

វ៉ាក់សាំង Sinopharm

យោងតាមការសិក្សាស្រាវជ្រាវរបស់អ្នកអ្នកវិទ្យសាស្ត្រ ស្រីលង្ការ បានឲ្យដឹងថា វ៉ាក់សាំង Sinopharm ចំនួន ២ ដូសអាចបង្កើតអង់ទីគ័រការពាររវីរុសបំប្លែងខ្លួន Delta ស្រដៀងគ្នាទៅនឹងជំងឺកូវីដ-១៩ដែរ ដែលវាប្រសិទ្ធភាពប្រហែល ៨១.២៥ ភាគរយ។ នេះជាទិន្នន័យដែលចុះផ្សាយដោយសារព័ត៌មាន Xinhua។

វ៉ាក់សាំង Sinovac

ផ្អែកតាមការអះអាងពីលោក Zhong Nanshan អ្នកជំនាញរោគរាតត្បាតកំពូលរបស់ចិន នាពេលថ្មីៗនេះ បាននិយាយថា គ្រប់វ៉ាក់សាំងការពារកូវីដ-១៩ របស់ចិន (Sinovac និង Sinopharm) សុទ្ធសឹងអាចការពារមនុស្សប្រឆាំងនឹងវីរុសបំប្លែងខ្លួន Delta ។

សារព័ត៌មាន Global Times  បានដកស្រង់សម្ដីពីអ្នកស្រាវជ្រាវថា វ៉ាក់សាំងចិនការពារករណីធ្ងន់ធ្ងរពីវីរុស Delta ចំនួន ១០០ ភាគរយ ៧៦.៩ ភាគរយប្រឆាំងករណីមធ្យម៦៧.២ ភាគរយការពារករណីស្រាល និង ៦៣.២ ភាគរយប្រឆាំងនឹងករណីឆ្លងមិនបញ្ចេញរោគសញ្ញា៕

ប្រែសម្រួល៖ ​សន្យា

ចុចអាន៖ វ៉ាក់សាំងកូវីដ-១៩ អាចទប់ទល់នឹងវីរុសបំប្លែង Delta បានដល់កម្រិតណា?

ចុចអាន៖ ប្រុងប្រយ័ត្ន! មនុស្ស៤ប្រភេទនេះ ងាយឆ្លងវីរុស Delta ខ្លាំងបំផុត

ចុុចអាន៖ អនុវត្ត ៥វិធីនេះបាន វីរុសបំប្លែងខ្លួន Delta មិនហ៊ានមកក្បែរ