សុខភាព

ចាក់ Astra Zeneca ដូសជំរុញមិនចេញអាការអី អត់ប្រសិទ្ធភាពដូចគេថាមែនឬ?

បានផុស

៥ years មុន

នៅ

ថ្ងៃអាទិត្យ ៣ តុលា ២០២១

ដោយ

Sonya

ក្រោយពីចាក់វ៉ាក់សាំងបង្ការជំងឺកូវីដ-១៩ ដូសទី៣ ឬដូសជំរុញ ត្រូវបានគេដឹងថា បុគ្គលភាគច្រើនមានប្រតិកម្ម ឬធ្វើទុក្ខជាងកាលចាក់ដូសទី១ និងទី២ ជាពិសេសចំពោះអ្នកដែលចាក់វ៉ាក់សាំងប្រភេទ អាស្រ្តាហ្សេនីកា របស់អង់គ្លេសតែម្ដង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពាក់ព័ន្ធនឹងករណីនេះ លោកស្រី ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ-១៩ ធ្លាប់បានពន្យល់អំពីមូលហេតុរួចមកហើយថា ប្រតិកម្មដូចជាក្ដៅខ្លួន ឈឺមួយចំហៀងខ្លួន ឈឺក្បាល ក្អួត និងឈឺពោះជាដើម ជារឿងធម្មតារបស់វ៉ាក់សាំងតែប៉ុណ្ណោះ ហើយវានឹងបាត់ទៅវិញក្នុងចន្លោះពេលពី ២៤-៧២ម៉ោង។

ផ្ទុយទៅវិញ ប្រសិនបើចាក់វ៉ាកសាំងដូចជំរុញរួចរាល់ ប៉ុន្តែមិនមានចេញរោគសញ្ញាអ្វីទាំងអស់ តើវ៉ាក់សាំងអត់មានប្រសិទ្ធភាពមែនឬទេ?

ទោះបីជាមិនមានអារម្មណ៍ពិបាកក្នុងខ្លួន គ្មានអាការក្ដៅខ្លួន ក្រោយចាក់វ៉ាក់សាំងដូសទី៣ក៏ដោយ ក៏រាងកាយកំពុងផលិតអង់ទីគ័រដើម្បីប្រឆាំងនឹងវីរុស មិនមានអ្វីគួរឲ្យបារម្ភនោះទេ។ នេះបើតាមការលើកឡើងលោកវេជ្ជបណ្ឌិត Chris Thompson សាស្ត្រាចារ្យ នៃសកលវិទ្យាល័យ Loyola នៃរដ្ឋ Maryland សហរដ្ឋអាមេរិក។

មនុស្សម្នាក់ៗមានប្រតិកម្មខុសគ្នាចំពោះវ៉ាក់សាំងដូសទី១ ទី២ និងទី៣ ដោយសារកត្តាមួយចំនួនដូចជា សុខភាព អាយុ ភេទ ហ្សែន អាហារូបត្ថម្ភ បរិស្ថាន ព្រមទាំងការប្រើប្រាស់ថ្នាំប្រឆាំងនឹងការរលាកពីមុនមក។ បន្ថែមពីលើនេះ ចំពោះអ្នកដែលធ្លាប់កើតជំងឺកូវីដ-១៩ ម្ដងហើយ ការទទួលបានវ៉ាក់សាំង រាងកាយអាចនឹងបញ្ចេញប្រតិកម្មឆ្លើយតបនឹងវ៉ាក់សាំងខ្លាំងជាងមនុស្សធម្មតា។

វេជ្ជបណ្ឌិតរូបនេះ បន្ថែមទៀតថា ចំពោះមនុស្សដែលមានប្រព័ន្ធការពាររាងកាយខ្សោយក៏ដូចគ្នាដែរ នៅតែទទួលបានការការពារក្រោយចាក់វ៉ាក់សាំងមិនថាដូសទីប៉ុន្មាននោះទេ ទោះជាមិនចេញអាការក្រោយចាក់វ៉ាក់សាំងក៏ដោយ គ្រាន់តែថា អ្នកដែលមានប្រព័ន្ធភាពស៊ាំខ្សោយ រាងកាយបង្កើតអង់ទីគ័រយឺត និងអាចតិចជាងមនុស្សមានសុខភាពធម្មតា។ ទោះជាយ៉ាងណា ក្រោយចាក់វ៉ាក់សាំងនឹងទទួលបានការការពារសុខភាពដូចៗគ្នា៕

អត្ថបទ៖ សន្យា

ចុចអាន៖ វ៉ាក់សាំងកូវីដដូសទី៣ គ្មានប្រសិទ្ធភាពឡើយចំពោះមនុស្ស ៣ប្រភេទនេះ

ចុចអាន៖ លោកស្រី ឱ វណ្ណឌីន បកស្រាយមូលហេតុចាក់វ៉ាក់សាំងដូសទី៣ធ្វើទុក្ខជាងដូសទី១ និងទី២

Related Topics: