ព័ត៌មានជាតិ
លោកស្រី ឱ វណ្ណឌីន បកស្រាយមូលហេតុចាក់វ៉ាក់សាំងដូសទី៣ធ្វើទុក្ខជាងដូសទី១ និងទី២
ភ្នំពេញ៖ លោកស្រី ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ-១៩ នៅថ្ងៃទី១៩ ខែសីហា ឆ្នាំ២០២១នេះ បានពន្យល់អំពីមូលហេតុចាក់វ៉ាក់សាំងបង្ការជំងឺកូវីដ១៩ ដូសទី៣ ឬដូសជំរុញហើយមានប្រតិកម្ម ឬធ្វើទុក្ខជាចាក់ដូសទី១ និងទី២។
លោកស្រី ឱ វណ្ណឌីន បានមានប្រសាសន៍ថា ការចាក់វ៉ាក់សាំងដូសទី៣ គឺចាក់វ៉ាក់សាំង អាស្រ្តាហ្សេនីកា ដែលផលិតនៅប្រទេសអង់គ្លេសផង និងជាប្រភេទវ៉ាក់សាំងផលិតនៅជប៉ុនផង ដែលជាទូទៅសម្រាប់វ៉ាក់សាំងវាតែងតែមានប្រតិកម្មឆ្លើយតប អាស្រ័យទៅតាមប្រភេទនៃវ៉ាក់សាំងនីមួយៗ។
លោកស្រីវេជ្ជបណ្ឌិត ឱ វណ្ណឌីន មានប្រសាសន៍បន្តថា៖ “វ៉ាក់សាំងមួយចំនួនដែលផលិតតាមបែបបុរាណក៏មានប្រតិតកម្មដែរ។ ដោយឡែកវ៉ាក់សាំងនេះ ជាវ៉ាក់សាំងដែលគេប្រើប្រាស់នូវវីរុសដើម្បីយកមកអភិវឌ្ឍឱ្យចេញជាវ៉ាក់សាំង។ ដូច្នេះប្រតិកម្មរបស់វាក៏ត្រូវតែកើតមានដែរ។ ហើយការណ៍ដែលមានប្រតិកម្មដូចជាក្ដៅខ្លួន ឈឺមួយចំហៀងខ្លួន ឈឺក្បាល ក្អួត និងឈឺពោះជាដើម”។
រដ្ឋលេខាធិការក្រសួងសុខាភិបាលរូបនេះ បានបញ្ជាក់ថា ប្រតិកម្មនេះជារឿងធម្មតារបស់វ៉ាក់សាំងតែប៉ុណ្ណោះ សូមប្រជាពលរដ្ឋកុំមានការព្រួយបារម្ភ។ ការចេញនូវសញ្ញានេះ មានន័យថា វ៉ាក់សាំងកំពុងតែធ្វើការជាមួយសរីរាង្គដើម្បីឱ្យស្គាល់គ្នា ហើយប្រសិនបើថ្ងៃក្រោយ មានវីរុសប្រភេទហ្នឹងចូលទៅក្នុងសរីរាង្គ នោះកោសិកាត្រូវចេញទៅវ៉ៃទប់។
លោកស្រី ឱ វណ្ណឌីន បានពន្យល់បន្ថែមថា៖ “រោគសញ្ញាខាងលើនេះ នឹងអាចបាត់ទៅវិញ ក្នុងរយៈពេល២៤ម៉ោង ៤៨ម៉ោង អ្នកខ្លះយ៉ាងយូរ៧២ម៉ោង ឬ៣ថ្ងៃប៉ុណ្ណោះ។ ប៉ុន្តែអ្វីដែលខ្ញុំណែនាំបន្តទៀតនេះ ប្រសិនបើបងប្អូនមានការថប់ដង្ហើម សូមប្រញាប់ជួបជាមួយគ្រូពេទ្យ ជួយផ្ដល់មតិយោបល់ ឬព្យាបាល កុំសំងំនៅផ្ទះ ព្រោះពេលខ្លះពេលវ៉ាក់សាំងចូលទៅធ្វើឱ្យមិនត្រូវគ្នាជាមួយសរីរាង្គ”។
ប្រធានគណៈកម្មការចំពោះកិច្ចចាក់វ៉ាក់សាំងកូវីដ-១៩ដដែលនេះ បានបញ្ជាក់ថា ចំពោះដែករណីប្រតិកម្មខាងលើនេះមានតិចណាស់ ក្នុង១លាននាក់ គឺមានតែ ២ ឬ៣នាក់ទេ។ បើមានអាការៈឈឺក្បាល ឬក្ដៅខ្លួនអីជាដើមនោះ គេអាចនៅផ្ទះបាន ដោយលេបថ្នាំប៉ារ៉ាសេតាម៉ុល១ថ្ងៃ៣គ្រាប់ ព្រឹក ថ្ងៃ ល្ងាច។ ប៉ុន្តែមកទល់នឹងពេលនេះ មិនទាន់មានអ្នកណាម្នាក់មានបញ្ហានេះនៅឡើយទេ។
គួរបញ្ជាក់ថា គិតត្រឹមយប់ថ្ងៃទី១៨ ខែសីហានេះ កម្ពុជាបានអនុវត្តយុទ្ធធានការចាក់វ៉ាក់សាំងកូវីដ១៩ ដោយទទួលបានលទ្ធផល៨៥.៧០%ធៀបនឹងគោលដៅ១០លាននាក់ចំពោះអ្នកមានអាយុពី១៨ឆ្នាំឡើងទៅ និង៣៥.៧៤%ធៀបនឹងគោលដៅ ១,៩៦៦,៩៣១នាក់ចំពោះកុមារអាយុពី១២ឆ្នាំទៅក្រោម១៨ឆ្នាំ។ ក្នុងនោះ ចំពោះអ្នកដែលបានចាក់វ៉ាក់សាំងដូសទី៣រួចហើយ មានចំនួន ៣៥៧,៨៩៧នាក់ ក្នុងនោះស្រីមានចំនួន ១១៨,០៥៣នាក់៕
អត្ថបទ៖ ច័ន្ទ វីរៈ
-
កីឡា៧ ថ្ងៃ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៥ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
ព័ត៌មានអន្ដរជាតិ២២ ម៉ោង ago
Breaking News! បណ្ដាញសង្គម Facebook មានបញ្ហានៅទូទាំងពិភពលោកជាថ្មី
-
សន្តិសុខសង្គម១ សប្តាហ៍ ago
ដកហូតមុខតំណែង មេបញ្ជាការរងស្រុកស្វាយជ្រុំ៣នាក់ ពាក់ព័ន្ធករណីទារប្រាក់ពីអ្នកប្រើប្រាស់គ្រឿងញៀនជាង១ពាន់ដុល្លារ
-
ព័ត៌មានជាតិ៦ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ព័ត៌មានអន្ដរជាតិ៥ ថ្ងៃ ago
អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ
-
ជីវិតកម្សាន្ដ៦ ថ្ងៃ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ
-
ព័ត៌មានអន្ដរជាតិ១ សប្តាហ៍ ago
នាវាចម្បាំងថៃ ច្រឡំដៃបាញ់កាំភ្លើងធំ ចំនាវាគ្នាឯង