ខ្សោយតម្រងនោម បណ្តាលមកពីមូលហេតុអ្វី?

តម្រងនោម មានមុខងារសំខាន់ៗជាច្រើន ពិសេសគឺមុខងារចម្រោះជាតិពុល និង កាកសំណល់ពីក្នុងឈាម ហើយបញ្ចេញចោលតាមទឹកនោម។ ដូច្នេះកាលណាមានបញ្ហាខ្សោយតម្រងហើយ តម្រងនោមមិនអាចបំពេញមុខងាររបស់ខ្លួនទាំងនោះទេ។ តើមានមូលហេតុអ្វីដែលបណ្តាលឱ្យយើងមានបញ្ហាខ្សោយតម្រងនោម?

នៅក្នុងកិច្ចសម្ភាសជាមួយកម្ពុជាថ្មី លោកវេជ្ជបណ្ឌិត នីវ រត្នវីរៈ ឯកទេសតម្រងនោម និងលាងឈាម បម្រើការងារនៅមន្ទីរពេទ្យកាល់ម៉ែត បានពន្យល់ថា បញ្ហាខ្សោយតម្រងនោមមិនមែនជាបញ្ហាដែលកើតមានឡើងពីកំណើតនោះទេ ភាគច្រើននៃអ្នកកើតជំងឺតម្រងនោម គឺបណ្តាលមកពីជំងឺលើសឈាមរ៉ាំរ៉ៃ និងបណ្តាលមកពីជំងឺទឹកនោមផ្អែម។ បញ្ហាខ្សោយតម្រងនោមក៏អាចកើតឡើងគ្រប់វ័យ គ្រាន់តែភាគច្រើនកើតឡើងទៅលើមនុស្សចាស់ច្រើនជាង
ក្មេង។

លោកវេជ្ជបណ្ឌិត ឯកទេសតម្រងនោម និងលាងឈាមដដែលរូបនេះបានឱ្យដឹងបន្ថែមទៀតថា នៅក្នុងប្រទេសកម្ពុជាយើងបច្ចុប្បន្ននេះ អត្រានៃអ្នកដែលមានបញ្ហាខ្សោយតម្រងនោមមានការកើនឡើងជាបន្តបន្ទាប់ ដោយសារតែកំណើននៃអ្នកដែលមានងំងឺប្រចាំកាយ ដូចជាជំងឺទឹកនោមផ្អែម និងជំងឺលើសឈាមរ៉ាំរ៉ៃ ដែលមិនបានគ្រប់គ្រងសម្ពាធឈាម ឬជាតិស្កររបស់ខ្លួនមិនបានត្រឹមត្រូវ។

ទោះបីជាបញ្ហាខ្សោយតម្រងនោមមិនមែនកើតឡើងពីកំណើតក្តី ប៉ុន្តែលោកវេជ្ជបណ្ឌិតថា ជំងឺមួយប្រភេទនេះងាយនឹងកើតឡើងជំពោះអ្នកដែលមានជំងឺរ៉ាំរ៉ៃ ហើយអាចមានផលប៉ះពាល់ខ្លាំងរហូតឈានទៅដល់ការលាងឈាមជាប្រចាំ ព្រោះនៅពេលដែលតម្រងនោមខ្សោយធ្វើឱ្យតម្រងនោមរបស់អ្នកជំងឺមិនអាចសម្អាតជាតិពុល កាកសំណល់ផ្សេងៗចេញពីក្នុងខ្លួនបានទេ។