ហេតុអ្វី ត្រូវពិនិត្យសុខភាព មុនយកកូន?

ការពិនិត្យសុខភាព​មុន​នឹង​យក​កូន ជារឿងសំខាន់ និងមានគុណប្រយោជន៍ណាស់ សម្រាប់អ្នកដែលចង់បានបុត្រធីតា
ព្រោះ​អាច​កាត់​បន្ថយ​គ្រោះថ្នាក់​នៃការរលូតកូន ខូចរូបរាងទារក ប្រឈមនឹងកូនក្រៅស្បូន ទារកមានសុខភាពខ្សោយ ឬបញ្ហាប្រឈមផ្សេងទៀត ហេតុនេះ ត្រូវពិនិត្យ​សុខភាពហោចណាស់ ៣ខែ មុននឹងយកកូន។
នេះបើតាមការបញ្ជាក់ពី វេជ្ជបណ្ឌិត លឹម ចាន់មុន្នីរ័ត្ន ឯកទេសសម្ភព និងរោគស្ត្រី នៃមន្ទីរពហុសម្រាកព្យាបាល និងសម្ភពឯកទេស ។

ការពិនិត្យនេះ តម្រូវឱ្យទៅពិនិត្យទាំងពីរនាក់ ប្តីនិងប្រពន្ធ ព្រោះដើម្បីដឹងថា តើអ្នកដែលត្រៀមធ្វើជាប៉ាម៉ាក់គេ មានសុខភាពល្អ​ដែរទេ អាចមានជំងឺដែលចម្លងទៅកូនឬអត់ (ជំងឺដែល​ចម្លង​តាមរយៈ​ការរួមភេទ) ដែលរួមមានដូចជា ជំងឺថ្លើមប្រភេទបេ ជំងឺថ្លើមប្រភេទសេ ជំងឺអេដស៍ និងជំងឺស្វាយប្រមេះជាដើម។

វេជ្ជបណ្ឌិតឯកទេសសម្ភព និងរោគស្ត្រីរូបនេះ បន្ថែមទៀតថា គឺដើម្បីដឹងថាតើ អ្នកដែលជាម្តាយមានជំងឺពកកដែរទេ? មានបញ្ហាជំងឺក្រូម៉ូស្យូម បញ្ហាអេម៉ូក្លូប៊ីន (គឺជាប្រូតេអ៊ីនដឹកជញ្ជូនអុកស៊ីតូស៊ីនដែលផ្ទុកទៅដោយដែក) ឬជំងឺផ្សេងៗ ដែលជាបញ្ហាដឹកនាំឈាមទៅកូនដែរឬយ៉ាងណា។

មួយវិញទៀត ការពិនិត្យសុខភាពមុនយកកូននេះ គឺដើម្បីពិនិត្យមើលមាត់ស្បូនរបស់ម្តាយ ថាមានរលាកដែរទេ? ស្រទាប់ រដូវស្អាតទេ? អាចឱ្យកូនមកទុំជាប់ និងរស់នៅបានឬអត់? ក្រៅពីនេះ គឺពិនិត្យមើលស្បូន ក្រែងមានដុំមានគីស
ឬបញ្ហាដែលអាចមានផលរំខាន បង្កជាការគំរាមរលូតជាដើម។

បើតាមវេជ្ជបណ្ឌិត លឹម ចាន់មុន្នីរ័ត្ន មូលហេតុដែលតម្រូវឱ្យពិនិត្យសុខភាពមុននឹងយកកូន តិចណាស់ឱ្យបាន ៣ខែឡើង ព្រោះ​ប្រសិនបើ​រកឃើញ​បញ្ហាសុខភាព​មិនប្រក្រតីណាមួយ ក្រុមគ្រូពេទ្យ​អាច​មាន​ចន្លោះពេល​គ្រប់គ្រាន់ ដើម្បីព្យាបាល និងបំប៉នសុខភាពរបស់លោកអ្នកបាន។ ពិសេស គ្រូពេទ្យ​នឹងបានផ្តល់ថ្នាំ Folic អាស៊ីត ទៅកាន់អ្នកដែលត្រៀមជាម្តាយលេប បានគ្រប់គ្រាន់ ដើម្បីកាត់បន្ថយការខូចរូបរាងទារក ក៏ដូចជាប្រព័ន្ធប្រសាទទារក៕

អត្ថបទ៖ សុធាវី