KPT+

CEO របស់ Huffington មានគន្លឹះគ្រប់គ្រងស្ត្រេសយ៉ាងល្អ

បានផុស

៥ years មុន

នៅ

ថ្ងៃសុក្រ ២០ វិច្ឆិកា ២០២០

ដោយ

Sonya

អ្នកស្រី Arianna Stassinopoulos Huffington ជាអ្នកនិពន្ធជនជាតិក្រិកកាត់អាមេរិកាំង និងជាអ្នកជំនួញមួយរូប។ អ្នកស្រីជាសហស្ថាបនិកនៃកាសែត The Huffington Post ព្រមទាំងជាស្ថាបនិកនិងនាយកប្រតិបត្តិក្រុមហ៊ុនបច្ចេកវិទ្យាផ្សព្វផ្សាយ Thrive Global ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ស្ត្រីឆ្នើមរូបនេះ ជាសហគ្រិន និងជាមេដឹកនាំដ៏មានឥទ្ធិពលមួយរូបដែលមានមនុស្សជាច្រើនកំពុងរៀនសូត្រពីជីវិតរបស់អ្នកស្រី។

ខាងក្រោមជាបទពិសោធន៍មួយចំនួនពាក់ព័ន្ធនឹងភាពស្មុគស្មាញក្នុងវិស័យជំនួញ ដែលអ្នកស្រីបានចែករំលែកដល់សហគ្រិនស្ត្រីដទៃ!

បែងចែកពេលវេលាឲ្យត្រឹមត្រូវ

អ្នកស្រី Huffington មានប្រសាសន៍ថា គុណភាពជីវិតផ្អែកលើការរក្សាតុល្យភាពពេលវេលាបានត្រឹមត្រូវ។ យើងគួរតែលះបង់ពេលវេលាដែលចាយលើបណ្តាញសង្គមខ្លះ ដោយចំណាយពេលវេលាទៅអភិវឌ្ឍន៍ជំនួញ ឬផ្នែកណាមួយដែលធ្វើឲ្យខ្លួនឯងរីកចម្រើន។

ប្ដូរទម្លាប់នៃការគេង

ស្ថាបនិករូបនេះប្រាប់ថា រឿងដំបូងដែលសំខាន់ យើងត្រូវប្រាកដថាបានដកទូរសព្ទដាក់ឆ្ងាយពីខ្លួន ហើយឆ្ងាយពីដៃ ដើម្បីកុំចេះតែចង់យកវាមកប្រើ។ ទម្លាប់បែបនេះនឹងធ្វើឲ្យ យើងឆាប់បានគេង និងក្រោកមកមានថាមពល។ មួយវិញទៀតអ្នកស្រីផ្ដល់យោបល់ថា ការធ្វើសមាធិក៏អាចជួយឲ្យគេងលក់បានស្កប់ស្កល់ផងដែរ។

គ្រប់គ្រងភាពតានតឹង

អ្នកស្រី Huffington ណែនាំអំពីការគ្រប់គ្រងភាពស្មុគស្មាញថា ត្រូវតែមានការថែទាំសុខភាពតាមរយៈការញ៉ាំអាហារល្អៗ ព្រមទាំងគេងគ្រប់គ្រាន់ជាមុនសិន ទើបអាចដោះស្រាយបញ្ហានានាជាក្រោយបាន។

នៅពេលយើងមានសុខភាពល្អ យើងអាចនឹងមានការគិតដ៏ល្អមួយដែលនាំឲ្យសម្រេចចិត្តបានល្អទៅតាមនោះ។ នាយិកាកាសែតរូបនេះបន្ថែមថា យើងគួរគេងឲ្យបានគ្រប់គ្រាន់ និងកាត់បន្ថយពេលវេលាក្នុងពិភពឌីជីថលខ្លះ។ រីឯការគេងមិនលក់បណ្តាលមកពីការធ្វើការច្រើនពេក និងភាពសកម្មជ្រុលលើបណ្តាញសង្គម។

ហ៊ានប្រឈមមុខនឹងភាពភ័យខ្លាច

គន្លឹះចុងក្រោយដើម្បីជម្នះភាពតានតឹងគឺ ហ៊ានប្រឈមមុខនឹងភាពភ័យខ្លាច។ អ្នកស្រីថា ការព្រួយបារម្ភពីភាពបរាជ័យ ឬភ័យខ្លាចមិនសម្រេចអ្វីមួយ មិនគួរឲ្យរអាទេ។ ផ្ទុយទៅវិញ នៅពេលលយើងហ៊ានទទួលយក វានឹងបង្ហាញពីសមត្ថភាពនិងភាពរឹងមាំរបស់យើងខ្លាំងប៉ុណ្ណា៕

ប្រែសម្រួល ៖ សន្យា

ប្រភព ៖ Entrepreneur

ចុចអាន៖ លេង FACEBOOK យ៉ាងណាកុំឲ្យសុខភាពផ្លូវចិត្តយុវវ័យរងការប៉ះពាល់?