អ្នកជំនាញប្រាប់វិធី ទូន្មានក្មេង ដោយមិនបាច់ប្រើហិង្សា

ឪពុកម្ដាយ ឬអាណាព្យាបាលតែងស្រលាញ់កូន និងចង់ឱ្យកូនល្អ ទើបអប់រំ និងប្រាប់ឱ្យកូនញ៉ាំបាយ ចង់ឱ្យកូនចូលគេង ចង់ឱ្យកូនខំរៀនជាដើម។ ប៉ុន្តែនៅពេលដែលប្រាប់ ឬទូន្មានកូនជាបន្តបន្ទាប់ហើយ កូនមិនស្ដាប់ អាណាព្យាបាលខ្លះក៏ប្រែក្លាយការអប់រំធម៌ត្រជាក់ ទៅជាធម៌ក្ដៅវិញ។

អ្នកស្រី យឹម សុធារី អ្នកព្យាបាលផ្លូវចិត្ត និង ទីប្រឹក្សាទំនាស់ និងសន្តិភាព បានឱ្យ “កម្ពុជាថ្មី” ដឹងថា ឪពុកម្ដាយអប់រំកូនមិនខុសទេ តែអ្វីដែលខុសគឺអ្នកខ្លះអត់ចេះរបៀបអប់រំ ព្រោះកូននៅក្មេង ត្រូវការការណែនាំ អ្នកនាំផ្លូវ របៀបអប់រំ។ ដោយសាររបៀបអប់រំខុសហ្នឹងហើយ ធ្វើឱ្យក្មេងពិបាក យល់ច្រឡំ អត់ផ្លាស់ប្ដូរ ដែលនាំឱ្យមនុស្សធំក្នុងគ្រួសារនោះកាន់តែមួម៉ៅ ដាក់បន្ទុកឱ្យគ្នា បន្ទោសគ្នា មិនធ្វើល្អ មិននិយាយល្អជាមួយគ្នា។

អ្នកស្រី យឹម សុធារី លើកឡើងបន្តថា៖ “ជាកូន ឪពុកម្ដាយនៅតែស្រឡាញ់ គ្រាន់តែរបៀបអប់រំគឺខុស។ ចំពោះក្មេង នៅពេលឪពុកម្ដាយឡូឡាដាក់គាត់ វ៉ៃគាត់ ខួរក្បាលរបស់គាត់មិនយល់ថា នេះជាការស្រឡាញ់ទេ។ គាត់គិតថា នេះជាការស្អប់ គិតថាខ្លួនកើតមកមិនត្រូវ បានជាឪពុកម្ដាយឡូឡា មួម៉ៅ ឈ្លោះគ្នាអ៊ីចឹង”។

នាយិកាមជ្ឈមណ្ឌលស្នេហា រូបនេះ បានឱ្យដឹងបន្ថែមថា ប្រសិនគ្រួសារមួយ ដែលឪពុកម្ដាយឧស្សាហ៍ឈ្លោះគ្នា ឬលែងលះគ្នា ការគិតទី១ របស់កូន ច្រើនគិត បន្ទោសខ្លួនឯងថា មកពីខ្លួន បានឪពុកម្ដាយឈ្លោះគ្នា ឬលែងលះគ្នា។ ដើម្បីអប់រំកូនបានល្អ គឺ ចៀសវាងអំពើហិង្សា រៀននិយាយ រៀនប្រើរបៀបអប់រំបែបវិជ្ជមាន បើទោះជាយើងមានវិន័យ ដាក់ពិន័យអីផ្សេងៗ ក៏ត្រូវវិជ្ជមាន គឺមិនអាចអវិជ្ជមាន ឬដាក់ទណ្ឌកម្មទេ។

អ្នកស្រី យឹម សុធារី បញ្ជាក់ថា៖ “ទណ្ឌកម្ម គេលែងឱ្យធ្វើហើយ ព្រោះប៉ះពាល់សុខភាពទាំង ផ្លូវកាយ ផ្លូវចិត្ត និងបញ្ញាស្មារតីរបស់កុមារ។ ដើម្បីអប់រំកូនបានល្អ តួនាទីចម្បង ឪពុកម្ដាយ ត្រូវតែត្រូវគ្នា ពូមីងយាយតាដែលនៅជាមួយគាត់នោះ ត្រូវតែត្រូវគ្នា ជាគំរូដល់កូន។ ដូចគេថា ដើម្បីចិញ្ចឹមក្មេង ១នាក់បាន គឺត្រូវការមនុស្ស ១ភូមិ ដែលសហការគ្នា។ ប្រសិនចង់ឱ្យគាត់ញ៉ាំបាយ ហើយយករំពាត់វ៉ៃគាត់ គឺអស់រសជាតិលែងឆ្ងាញ់ហើយ គាត់ទ្រាំញ៉ាំព្រោះឈឺទេ។ ដូច្នេះគួរផ្លាស់ប្ដូររបបអាហារ ពេលវេលាញ៉ាំ ផ្លាស់ប្ដូរទម្លាប់ញ៉ាំរបស់ក្មេង”។​

អ្នកព្យាបាលផ្លូវចិត្ត និង ទីប្រឹក្សាទំនាស់ និងសន្តិភាព រូបនេះ លើកឡើងថា នាពេលបច្ចុប្បន្ននេះ ឪពុកម្ដាយតានតឹងអារម្មណ៍គ្រប់រឿង ការងារ អាជីវកម្ម… ស្ត្រេសច្រើនពេក ធ្វើឱ្យគាត់អត់មានសេចក្ដីស្ងប់ អត់សេចក្ដីសុខក្នុងចិត្តរបស់គាត់ អាចនាំឱ្យសាយភាយដល់កូនចៅ សមាជិកគ្រួសារ៕

អត្ថបទ៖ ច័ន្ទ វីរៈ